Uupeko wa yooloka wehogololo lyomo2024

Oshizemo shomahogololo gohela gopaupresitende nogiilyo yOmutumba gwoPashigwana, ngoka aantu taya fekele kutya ogo gamwe ga kindja noonkondo mondjokonona yoshilongo oshoka aathaganathani inaya ithiga po unene, omahogololo ngaka otashi vulika ga ete elunduluko mepangelo.Naashika otashi ningwa ngele kape na omusindani gwothaathaa momahogololo agehe gaali. Aantu oyendji otaya ti Swapo ota ka sindana oo omahogololo ngaka, ihe oniipindi iishona okuyeleka naambyoka yomo2019, sho ongundu ya kanithile iititatu iyali yawo moparliamente, mbyoka ongundu ya kala yi na uule woomvula 30 okuza mo1994.Yalwe otaya dhiladhila kutya Swapo otashi vulika kee shi pondole moparliamente – omolwa ookashuku taya endelele yooIndependent Patriots for Change (IPC) nongundu yaagundjuka yoAffirmative Repositioning movement – ashike omuulikwahogololwa gwongundu yoSwapo momahogololo gooaupresitende, Netumbo Nandi-Ndaitwah, otaka sindana.Iizemo yomahogololo gowina ngoka gaakwiita naapolisi, aaniilonga yomomeya nAanamibia ya kala pondje yoshilongo oya holola Nandi-Ndaitwah te shi enditha nawa vule ongundu ye. Okapeko 1: Ongiini ngele kape na nande ngoka a sindana momahogololo gopaupresitende?Namibia oha longitha omulandu gwaahogololi yomwaalu ogundji, ngoka hagu utha kutya omusindani – unenene momahogololo gopaupresitende – nakale nomawi goopelesenda dha konda po 50%. Shika osha yooloka komulandu gwo gwomawi kondandalunde gaahogololi hagu longithwa miilongo yimwe, moka omusindani ha kala okandidate ndjoka yi na omawi ogendji. Shoka otashi ti omuulikwahogololwa ohagu vulu okusindani, oshiholelwa, ngele a hogololwa owala koopelesenda 33%.Ngele kape na okandidate ya za mo nomawi ga konda po 50% momahogololo gohela, olweetho olutiyali lwokuhogolola omupresitende ohalu shuna mo pokati kokandidate yi na omawi ogendji naangoka e mu landula.“Olwo olugodhi olululu pokati kookakandidate mbali dhingi owala,” Omulongi moshiputudhilo shopombanda ngoka ina hala edhina lye li tumbulwe, a ti ohela. Paveta yOmahogololo, amushanga omukuluntu moshiputudhilo shoInstitute for Public Policy Research (IPPR) Graham Hopwood okwa ti olweetho olutiyali lwomahogololo gopaupresitende nalu ningwe muule womasiku 60 okuza kesiku lyomahogololo. Monkalo ndjika, otashi omahogololo ngaka ando otaga kala ko pehulilo lyaJanuali 2025.Okapeko 2: Swapo a sindana po uupresitende, nokukanitha iipundi oyindji moparliamente.Niizemo yomahogololo gowina giiwike iyali ya piti tayi ulike Nandi-Ndaitwah a kangela Swapo nayi, ope na uumbanda nuutile kutya ongundu tayi pangele otashi vulika yi nyengwe okusindana nomawi ogendji moparliamente. Shika osha yooloka kiizemo yahugunina yomo2019, sho Swapo a sindana po oopelesenda 65% dhomawi gaahogololi omanga okandidate yawo yopaupresitende – nakusa Hage Geingob – okwa zi mo owala nomawi goopelesenda 56% methigathano lyopaupresitende.Mompito moka Swapo inaa mona iipundi ye oyindji mOmutumba gwoPashigwana, omunawino miikwapolitika Rui Tyitende okwa ti ongundu otashi vulika yi hogolole mbalambala yimwe yomoongundu dhoompilameno oonshona, opo ya ninge embwinda nelalakano opo ya adhe omawi ngoka ogendji ga pumbiwa.“Omukalo gumwe tagu vulu okulongithwa okupitila mokugandja opoosa yuuminista komuleli gwongundu ndjoka, nelalakano okuya heka ya ninge omukuthimbinga membwinda ndika,” Tyitende a ti ohela moonkundathana noNetwork TV.“Oongundu dhoompilamena odha topoka unene momahogololo ngaka, naashika otashi yi moshipala ompito kehe yoongundu dhi longele kumwe nelalakano okukaleka Swapo e na iipundi tayi yalulwa moparliamende. Omahogololo ngaka oga faathana naangoka tage ke ya mo2029, moka twa tegelela Swapo a ka taalele eshongo enene – ashike ongele oongundu dhoompilameno dha hangana, oshiholelwa, dhi kale nomuulukwahogololwa gumwe gwopaupresitende,’ okwa gwedha po.Okapeko 3: oongundu dhoompilameno dha sindana po uupresitende woshilongo, Swapo ta sindana po omahogololo giilyo yOmutumba gwoPashigwana Ngele omupresitende gwongundu yompilameno okwa sindana po uupresitende woshilongo ashike ongundu yawo oyi na iipundi iishona mOmutumba gwoPashigwana, ongundu ndjika otayi ka nana nondatu mokulela. Ano, Ontopolwa 5 lyaNamibia oya holola kutya “omupresidente ota vulu okukuthwa koshipundi ngele iititatu iyali yomiilyo ayihe yOmutumba gwoPashigwana noya kolekwa kiititatu iyali yomiilyo ayihe yEgumbo Etiyali lyoPashigwana, ngele oya kutha etokolo lyokuhokololitha Omupresitende molwaashoka a monika ondjo mokutaaguluka Ekotampango nenge e na ondjo metaagukuko lela lyooveta dhoshilongo nenge a Monika ondjo meyono enene lyoludhi ndika nenge itaa vulu shoka she eta a talike itaa vulu okukala mOmbelewa yaPresitende nesimaneko”.Ngele Swapo oku na iilyo oyindji iitotimpango, otashi vulika okukutha omupresidente gwongundu yompilameno itaku kala kokule – ngaashi naanaa tashi vulu okuningwa ngele omupresitende Swapo, nongundu ye kayi na iipundi oyindji mOmutumba gwoPashigwana, naye okwa taalela eshongo ndjoka.Okapeko 4: Embwinda lyoongundu dhoompilameno moparliamenteNgele Swapo okwa kanitha iipundi ye oyindji moparliamente, oongundu dhoompilameno – ndhoka, okupitila miipundi yawo ya topoka, oyo yi li momwaalu ogundji – otashi vulika ya kwatwe kehalo lyokutula pambelewa onkalo ndjika pakutota po embwinda ndyoka taku ka talika olyo li na oonkondo okukeelela okukondjithwa koSwapo.Shika otashi fu dhimbulukitha nkene oongundu dhoompilameno dha sindana po iipundi ayihe kumwe 10 mElelo lyOshilando shaVenduka mo2020, okuyelekanitha niipundi itano yoSwapo.Pethimbo ndyoka, oongundu dhimwe dhopapolitika odha toto po okatayi haka ithanwa ‘omatanga taga humu komeho’, hoka ka kala noonkondo dhokuwilika elelo lyoshilando okathimbo kontumba, manga okukondjithathana inaku ka hanagula po ombaadhilila.Shika osha pe Swapo ompito, noye ngashingeyi e na oshipundi shuumayola niilyo oyindji mokakomitiye taka wilike elelo oya za mongundu ye. Konima yokunyengwa okwaadha omawi giititatu iyali moparliamente mo2019, omunapolitika Geingob okwa yele mbala omupresitende gwoNational Unity Democratic Organisation (Nudo), Ester Muinjangue, sho e mu ulike a ninge omupevi minista muuministeli wuundjolowele. Shika osha kuthwa ko oonkambadhala yokupa Swapo ewi lyiititatu iyali mbyoka a kanitha, netegameno kutya Muinjangue ota ka gama ko Swapo miipambele yasimana moparliamente ngele ompito ye shi pitika.Oshinima sha faathana otashi vulu okuningwa nomethimbo ndika, ngele sha pumbiwa.Otashi ka kala sha nika uuhasha ngele oongundu dhoompilameno tadhi longele owala kumwe ngele odhindji, peha lyokukwatathana melyenge lya kola ndjoka tali kondjitha Swapo momatokolo gasimana mOmutumba gwoPashigwana.#NamibiaTaTokola#NamibiaDecides2024

Uupeko wa yooloka wehogololo lyomo2024

Comments

Namibian Sun 2025-04-01

Please login to leave a comment

Uupeko wa yooloka wehogololo lyomo2024

Comments

Namibian Sun 2025-04-01

Please login to leave a comment

Login