Swapo nomalunduluko molwa omahogololo omatilithi

Omuhogololwa-presitende Netumbo Nandi-Ndaitwah okwi indile Aakwaswapo ya longele kumwe molwa uuwanawa woshilongo, oshoka iizemo yomahogololo goshiwike sha zi ko oya koleke kutya ongundu tayi pangele hanga ya kanitha oonkondo dhawo lwotango moparliamente, niipundi itatu.

Iizemo mbyoka oyo hwangu muuwinayi koSwapo okuza sho ongundu ya yi koshipundi mo1990, onkalo ndjoka ya thiminike Nandi-Ndaitwah i indile aantu ya lundulule opo ku kandulwe po omashongo ogendji ngoka taga hepeke Aanamibia.

Ongundu oya kanitha iipundi 26 mOmutumba gwoPashigwana okuza 2014 sigo 2024.

Aahogololi, ya lulilwa kondjele yokwaa-na- iilonga yi li pombanda nokiimbuluma ya geya, oya yambidhidha ngaa ongundu ya kondjela emanguluko nale.

“Inatu nyanyukwa sho twa kanitha iipundi oyindji, ashike olyo etokolo lyAanamibia,” Nandi-Ndaitwah a ti poshigongi shiikundaneki ohela mOvenduka.

Ethimbo olya thikana

Osaala yu udha moGateway Centre, Aakwaswapo ya zala omalwaala gawo omambulau, omatiligane nomatokele oyi igidha nokwiimba omaimbilo gongundu sho Nandi-Ndaitwah ta popi oshipopiwa she, sho a londodha Aakwaswapo kutya “okuza nena onkalo otayi ka lunduluka”.

Okwa gwedha po: “Natu lundululeni nkene tatu kandula po omashongo moshigwana shetu, unene kaadhinwa noohepele. Ethimbo olya thikana okukondjitha omashongo pwaa na uumbanda washa.

“Mboka taya longo mepangelo, kutya oye li kongundu yini yopapolitika, omukandauvaneko gwoSwapo ogwo oshipatululo twa pewa koshigwana. Ngele owa ningi sha shi ili, otwi ilongo muunadiplomate kutya ino longela mepangelo ngele ino hala mo; inda wu ka longe oshilonga shilwe.”

Okwa zimine kutya okuhogololwa kwe ongomupresitende gwoshilongo okwa tokola omalyenge gaakiintu Aanamibia, okwa dhenge omuthindo kutya: “Inandi hogololwa oshoka ngame omukiintu”.

Omuhogololwa- presidente okwa gwedha po: “Mokudhimbulula kutya otandi pala ondjila opo aakiintu ya landule mo, nashi yele kutya onda hogololwa molwa uukwatya noowino tandi vulu okulela oshilongo. Ongomukiintu omunandjungu, inatu hala okuundulwa – natu longe nomukumo nondi inekela otwe shi pondola, onkene aakiintu momawiliko ngashingeyi oyendji momukokomoko gwoomvula ndho.”



Einekelo

Sho a pulwa shoka taka ninga opo a hokithe aantu ongundu, Nandi-Ndaitwah okwa ti okwa ya moonkundathana naantu ya yooloka moshilongo ashihe elalakano okutala nkene ta vulu okugwanitha po oompumbwe dhawo.

“Otatu ka gwedhela einekelo lyAanamibia mongundu yoSwapo,” okwa ti, nokugwedha po kutya ewiliko lye otali kala lyoshili, lyokutula miilonga omilandu noopolohalama, okulonga nawa, nokwaa longa nuulingilingi nekwatelemo lyaayehe.

“Aantu naya landule omuleli gwawo. Ngele omuleli oku na ondjothithaneko yontumba, ondjodhithaneko yoye itayi vulu okukala ya yooloka, ngele hasho itatu shi pondola.”

Okwi indile Aanamibia ya “hokwe iiputudhilo noshilongo shetu nomwenyo aguhe; naampoka pe na uudhigu, natu longe momukalo omuwanawa oku wu kandula po".

Okwa gwedha po: “Konima yomahogololo, natu kwashilipaleke kutya shoka twa uvanekela oshigwana osha gwanithwa po".

Nandi-Ndaitwah okwa ti wo: “Hatse atuke twa kutha ombinga momahogololo, onkene, peha lyongundu yoSwapo, onda pandula aawiliki ayehe yongundu naakuthimbinga – oya kaleka po uudemokoli wetu. Natu tsikile nelongelokumwe okukwashilipaleka ombili otayi pangele ngaashi pethimbo lya tetekele omahogololo, opo tu vule okutala kuuwanawa waantu yetu."

Okwa kwashilipaleke Aanamibia kutya “einekelo lyawo moSwapo nomungame mwene itali kala osima owala, oshoka otu shi omashongo ngoka ga taalela oshigwana shetu”.

“Ne [aahogololi] omwa tula onakuyiwa yeni momake omawanawa goSwapo, Swapo ongosheenditho shomapendulopo gopankalathano nopamahupilo. Moomvula ndatu dha piti otwa talele po iitopolwa ayihe 14 nokupulakena koshigwana notwa uvu ko nawa oompumbwe dhomeendelelo okuhwepopaleka iikondo ngaashi uunamapya nuuniimuna, uundjolowele, elongo netendululo lyevi,” okwa gwedha po.