PDM e ekelehi omahokololo gokunana nondatu painiwe

Ongundu yoThe Popular Democratic Movement (PDM) oya ti omahokololo kutya otayi nana nondatu painiwe kage shi goshili, noshowo anuwa kutya onkalo ndjoka oya thiminika ongundu yi dhiladhile yaa fute aaniilonga yomwaalu ogundji nokutameka nopropesesa yokuya kutha miilonga ngele otashi pumbiwa.



Aapopepi nongundu oya lombwele oshikundaneki shika kutya anuwa etokolo ndika olya ningwa moshigongi shokakomitiye pitithi kopashigwana ka gongalele ongula yEtine poombonge dhongundu mOvenduka, moka ya hokolola kutya okwa tokolwa opo aakwatakanithi yongundu, aawiliki yomawawa gongundu nooamushanga yi ilongekidhile oondjambi dha tetulwa.



PDM anuwa oku na oondjo dhoN$250 000 dhaNico Smit oshilyo shongundu yawo oshikwawo oku na wo oondjo ishewe, ndhoka dha kwatela mo oshimaliwa shaanyanyangidhi yomateriala gawo gomahogololo.



Iifuta yokomwedhi oya londo okuya po N$360 000, shoka sha nayipaleka iiniwe yongundu, oonzo dha ti.





'Okufundjwa'



Amushanga ndjai gwoPDM Manuel Ngaringombe mEtiyali okwe ekelehi omahokololo ngaka sho a pulwa a komende koshikumungu shika.



“Ngele inashi za mombelewa yandje, nena kamu na uushili musho," Ngaringombe a ti.



Omupopiliko gwongundu Geoffrey Mwilima naye wo okwa ti omahokololo kage na uushili, ta ti ongundu itayi dhiladhila okukutha aaniilonga miilonga.



"Uuyelele mbuno owe wu kutha peni? Aantu mbono taye mu fundju naye mu pe omikanda nenge uuyelele ye wu pewa kongundu," okwa ti.



"Itashi ningwa; kape na ngoka ta ka kanitha iilonga. Ongundu itayi shi dhiladhila nande," okwa hokolola ohela.

Omahokololo



Okukana huka kwiilonga otaku ka guma aakwatakanithi yongundu paitopolwa 16, kehe gumwe ha kwata N$7 000 komwedhi, aawiliki yomawawa gongundu, mboka ha ya kwata N$9 000. Anuwa ongundu otayi dhiladhila okulanditha po iihauto yawo, mbyoka ya landa pauvathano lyokufuta ko ethimbo nethimbo, opo ya kwate nawa oshimaliwa, oonzo tadhi ti.



Okugwedha ko kushonopeka omwaalu gwaaniilonga, oonzo odha ti PDM okwa thaneka wo okushunitha pevi eyambidhidho lye pethimbo lyuudhigu weso oshowo okushunitha pevi iifuta yilwe. Kakele koonkambadhala ndhika, ongundu oya tseyitha kutya omupevi presitende gwayo ota ka tameka okufutwa okuza mu Apilili 2025.



Onkalo ndjika yoshimaliwa itashi gwanene oye etwa kethimbo edhigu ongundu yi li mulyo, ndjoka lya kwatela mo iizemo ya nkundipala yomomahogololo gopashigwana gomuNovemba, moka ongundu ya zi mo owala niipundi itano mOmutumba gwoPashigwana, okuyelekanitha niipundi 16 ya mwene mo2019.