Oshikumungu shIilyo yoIPC mOmutumba gwoPashigwana

Ongundu yoThe Independent Patriots for Change (IPC) otashi vulika yi ka longe nuudhigu ngele itayi fatulula nawa iinakugwanithwa yomupresitende gwayo Dr Panduleni Itula noyomuleli gwongundu mOmutumba gwoPashigwana, ngashingeyi sho oyo ongundu yompilameno yopambelewa.Itula, pamwe nomupevi-presidente gwongundu Trevino Forbes noshowo amushanga ndjai gwongundu Christine Aochamus, kaye mo momusholondondo gwIilyo yoIPC mOmutumba gwoPashigwana, konima sho iilyo yoIPC ayihe muukumwe ya tokola aakomeho mbaka yatatu ya se oshimpwiyu owala shokuwilika ongundu.Kombinga yItula, okukala kwe kee mo momusholondondo nguka oshe etwa keitaalo ekulukulu lyongundu yoIPC kutya okukala nuukandidate wopaali inaku pitikwa mopolitika yaNamibia. Itula okwa li okandidate momahogololo gopaupresitende, e ya puutiyali a landula okandidate yoSwapo, Netumbo Nandi-Ndaitwah.Sho Itula ita kala oshilyo shOmutumba gwoPashigwana, otashi ka talika ngele otashi vulika Michael Mwashindange, ngoka oye e li ponomola yotango momusholondondo gwoIPC, ota ka landula McHenry Venaani gwoPopular Democratic Movement ongomuleli gwongundu yompilameno yopambelewa.Omisholondondo dhopambelewaOmuleli gwongundu yompilameno yopambelewa paveta oha pewa ohauto yepangelo nomuhingi gwe, noha kala nombelewa naanambelewa ye.Omusimanekwa nguka oha mono omauwanawa wo mOmutumba gwoPashigwana nogopapangelo. Ngaashi okupewa ompito tango yokupula omapulo nokuya moonkundathana nomupresitende pethimbo lyOmupresitende ta popitha oshigwana she, osho wo okuyapukilwa nokupopitha oshigwana piituthi niinyangadhalwa yi ili noyi ili yopambelewa.Amushanga mOmutumba gwoPashigwana Lydia Kandetu okwe shi yeleke kutya ombelewa yomuleli gwongundu yompilameno yopambelewa otayi kala owala yoshilyo mOmutumba gwoPashigwana.“Ihatu yi mo miinyangadhalwa yokuulika kutya olye ta ningi oshilyo shOmutumba gwoPashigwana, ashike ohatu longo owala nomisholondobdo dhopambelewa ndhoka twa pewa kOkakomisi kOmahogololo moNamibia. Ombelewa ndjono oyoshilyo shOmutumba gwoPashigwana,” okwa lombwele oshifo shoNamibian Sun ohela.OnakuyiwaKapyoko miipambele yokuwilika Dr Marius Kudumo okwa ti oIPC otayi ka longa nuudhigu ngele iinakugwanithwa inayi ndjandjukununwa nawa.“Pamalandulathano, omusimanekwa otaka thamunwa ngiini piituthi yopambelewa, okutala kutya omusimanekwa ngoka ota kala omuwiliki moparliamente ashike haye omupresitende gwongundu?”Kudumo okwa ti wo kutya etokolo lyongundu opo aakomeho yongundu yaa kale iilyo yOmutumba gwoPashigwana otashi “vulika li ka kale endangalati enene".“Katu shi uvite ko kutya omolwashike ya tula po omulandu ngoka, ashike otashi ka tokolitha omatokolo nuudhigu, oshoka omuwiliki gwongundu moparliamente otashi vulika itaa wapa okundjandjukununa nawa iipambele yongundu ngaashi omupresidente, omupevi-presidente namushanga ndjai gwongundu taya vulu okushi ninga. Otashi vulika ya ka kale taya thiminikwa ya pule epitikilo kaakomeho yongundu,” okwa fatulula. Okwa gwedha po: “ Moparliamente, owa pumbwa okukala wa kola, wu na oonkondo, nomakwatathano ga yela nawa; ngele hasho, otashi ka kala oshidhigu. Kombinga yomonakuyiwa nokukalelela, shika itashi ikwata nawa.”Mboka ya sheke etokolo ndika oya londodha kutya etokolo ndika lyaakomeho yongundu itaya kala iilyo mOmutumba gwoPashigwana otashi vulika li etele ongundu, omanga yamwe oya konene uukwatya nondjundo yiilyo yi li momusholondondo. Kape na nande gumwe mookandidate ndhika 96 dhoIPC a li nale oshilyo shOmutumba gwoPashigwana.Itaya ipe uusamaOmupevi- presitende gwongundu okwa ti itaya ipe uusama sho ya tokola kutya aakomeho yongundu yatatu itaya kala iilyo yOmutumba gwoPashigwana oshoka “otwi inekela lela ookandidate dhetu".“Otwi inekela lela ookandidate dhetu notu shi shi kutya otaya vulu okwaadha omalalakano gawo. Otandi ku lombwele ndaa na uumbanda inatu limbililwa nande ookandidate dhetu,” Forbes a lombwele oshifo shoNamibian mEtiyali.Forbes okwe endulula natango eitaalo lyongundu kutya “omahogololo inaga enda pauyuuki.“Oku na ondjila onde natango, ashike atuheni otu shi shi kutya omahogololo kaga li nawa,” okwa ti.OndjundoOmunawino miikwapolitika Rui Tyitende okwa ti sigo opo mpoka aatotimpango yongundu yoIPC taya talika kutya osigo openi taya pitikwa ya kale yi ithikamena po mOmutumba gwoPashigwana notashi ka ulika ondjundo yawo.“Dr Itula oku na oonkondo dha pitilila olundji okwa hala okupangela yakwawo noye li kokule. Oto dhimbulukwa melelo lyOshilando shaVenduka omathimbo hamale ga piti po, sho i indike ookamunsela dhaa kuthe ombinga miigongi yelelo lyoshilando,” Tyitende a ti.“Omaihumbato goludhi ndoka ihaga longele kumwe nawa nuudemokoli wetu. Otwa pumbwa aatotimpango mboka haya vulu okudhiladhila kuyoyene,” okwa ti.

Oshikumungu shIilyo yoIPC mOmutumba gwoPashigwana

Comments

Namibian Sun 2024-12-27

Please login to leave a comment

Oshikumungu shIilyo yoIPC mOmutumba gwoPashigwana

Comments

Namibian Sun 2024-12-27

Please login to leave a comment

Login