Oshikumungu shaMeatco she etele Shiimi

Minista onkulu yiimaliwa noyomahangano gepangelo omusimanekwa Ipumbu Shiimi anuwa okwa zi puuminista omolwa omapopyo ngoka ge mu talikitha ko onga ta tula monomola yotango uuwanwa wAatiligane mehangano lyoMeatco okuyelekanitha nuuwanawa wAaluudhe.

Oonzo dhi li popepi naakwanepangelo nonAakwaswapo otadhi ti oonkambadhala dhokunyateka edhina lyaShiimi odhe etwa koshikumungu shokutinda kwe okugwedhela okontalaka yOmukuluntupitithi nale gwoMeatco Mwilima Mushokabanji, ndjoka ya hulu muJanuali. Shiimi anuwa okwa li ompinge netokolo tali thiminike noitali ukile ko mokuungaunga negwedhelo lyokontalaka ndjika, nokwa tindi okukwatelwa mo moshinima shoka.

Oshikumungu shika osha tameke sho Shiimi a pula eziminino kOkabinete mumvogu opo ku langekwe omunashipundi omupe gwewilikongundu lyoMeatco, ndjoka lya ta li kuutumbithwa ku Sakaria Nghikembua. Nonande shoka a tumine kOkabinete osha li owala tashi popi kombinga lyelangeko lyiilyo yewilikongundu, Okabinete anuwa oka zimine ewilikongundu ndika epe shampa owala nokontalaka yaMushokabanji tayi gwedhelwa.

Shiimi ina zimina etokolo ndjoka, nokwa nyenyeta kutya omautho gepangelo oga utha opo omukanda gwa yooloka gu nyolwe tagu popi kombinga yegwedhelo lyontalaka yOmukuluntupitithi. Shi ikolela koonzo, okwa ti kutya ewilikongundu epe nali langekwe tango nopo ihe omatokolo ga pamba egwedhelo lyonkotalaka yOmukuluntupitithi taga landula ko.

“Ina uvathana nande nOkabinete opo ka pule komeho noshikumungu shegwedhelo lyokontalaka yOmukuluntupitithi manga inaka pewa omagwedhelopo ga za kewilikongundu lyoMeatco,” onzo ya ti.

Lwanima , omunambelewa omukuluntupitithi muuministeli wuunamapya Ndiyakupi Nghituwamata otaku hokololwa a nyolele Meatco ombilive ta koleke ekoleko lyewilikongundu epe nokwa pula iilyo yewilikongundu yi gwedhele okontalaka yaMushokabanji. Kakele, ewilikongundu olya ka tokola lyaa gwedhele okontalaka, nomatompelo kutya ehangano itali shi enditha nawa painiwe.

Opolitika yi li konima yoshikumungu shika

Joseph Andreas, omunangeshefa gwomOshaanda noshilyo shewilikongundu lyoMeatco, otaku hokololwa a li omupopili omunene gwegwedhelo lyokontalaka yaMushokabanji. Omunene moSwapo nakuume nomupopepi gwamushanga ndjai gwongundu yoSwapo Sophia Shaningwa, Andreas anuwa oye li konima yoonkambadhala dhokunyateka edhina lyaShiimi lwanima manga omahogololo ga simana mongundu inaga ningwa, mwa kwatelwa nocongressa yoSwapo.

Andreas okwe ekelehi omapopyo ngaka, ta holola kutya Shiimi okwe mu langekele lwaali mewilikongundu lyoMeatco, ta ti kape na uutondwe nande pokati kawo.

“Ngele owu na okanona ihaka vulika, oto ka galulile mo megumbo lyoye? Shiimi okwa langekele ndje lwaali, nomumvogu, otwa longo pamwe naye nomukandauvaneko gwongundu yoSwapo. Nuuyelele mboka ndi na po, inapu kala uutondwe pokati ketu,” Andreas a ti.

Lwopethimbo olyo tuu ndjoka, etumwalaka lya andjakana lyokoWhatsApp olya ti Shiimi ota tongolele owina ‘Aacaprivi’. Etumwalaka olya ti kutya okukala ompinge kwe negwedhelo lyokontalaka yaMushokabanji oshitopolwa shompangela yokwaa pa aanafalama yokoZambezi ompito yokulanditha onyama yawo sho ya kutha miilonga Omukuluntupitithi omvalele yomoshitopolwa shawo.

Nonade pwa li oohapu ndhoka, Shiimi gumwe gwomaakuthimbinga mboka ye shi enditha nawa momutumba gwoSwapo gwokuhogolola iilyo yOmutumba gwoPashigwana.

Omananathano mOkabinete niilanduli yopapolitika

Oshigongi shOkabinete shoka sha ka landula ko, anuwa Shiimi okwa pulwa koominista oonkwawo kutya omolwashike a tindi okutula miilonga etokolo lyokugwedhela okontalaka yaMushokabanji. Okwa nyenyeta kutya Okabinete oka puka metokolo lyako, ashike okwa nyenyetelwa sho a ndopa okuholola omaiuvo ge kuyele.

“Okwa lundilwa kutya ina nothela ko Okabinete kombinga yoshikumungu shika,” onzo ya holola.

Okukala kwaShaningwa moshigongi anuwa okwa suwakitha nokushonopeka Shiimi koshipala shAakwaswapo manga okulangekwa kwasimana kwaakwanepangelo inaku ningwa.

Molwa okatongo haka okendji, Shiimi anuwa okwa nyolele omupresidente omukulu Nangolo Mbumba, ta holola okwaa uva ombili kwe molwa okuyakulwa kwe konima yokutinda okutula miilonga elombwelo ndjoka e wete lyaa li paveta. Anuwa okwa ti oshihwepo i ikuthe miilonga pehala a nyateke uukwatya we wokulonga noshili pakulandula elombwelo lyaa li nawa.

Aaleli yoSwapo anuwa oya lombwela kutya Shiimi oku lile po “okulongela muuwanawa wAatiligane” koMeatco, ehokololo ndjoka aantu yamwe ye li itaala.

Mu Januali, ongundumutima yoSwapo oya pula pambelwa yi nyugulilwe kashona kuShiimi kombinga yomalunduluko miilonga yoMeatco. Okwa hiya wo a holoke koshigongi shokakomitiye ashike ina holoka, shoka she mu shekitha ishewe kutya ke na omakwatathano naantu nolundji oha ningi omatokolo pauhandimwe.

“Shika osha geyeke aantu oyendji,” onzo yi li popepi naakwanepangelo ya ti.

Ongula yOlyomakaya, manga Presidente Netumbo Nandi-Ndaitwah ina tseyitha Okabinete ke, oonkundana odhu uvika kutya Shiimi ita hogolululwa. Naashika osha kolekwa sho edhina lye inali holoka momusholondondo gwoominista oompe, a pingenwa po ku Ericah Shafudah ongominista ompe yiimaliwa.

Shiimi inaya yamukula komapulo a tuminwa opo a tye ko sha.