Ongeyo ya lundu molwa ‘omapuko’ momahogololo

Oongundu dhopapolitika odhi li mewi limwe molwa nkene Okakomisi kOmahogololo moNamibia ka ungaunga nomahogololo gopaupresitende nogiilyo yOmutumba gwoPashigwana oshiwike sha zi ko. Aanapolitika yamwe otaya ti Okakomisi Komahogololo oka ndopa okushilipaleka oshigwana kombinga yonkalo nuukwashili gwomahogololo.

Sigo opethimbo lyomutenya momasiku gokuhogolola, oosenda dhimwe dhokuhogololela moshilongo ashihe odha li tadhi pitike aahogololi ya hogolole, sha landula elombwelo lya zi kOkakomisi kOmahogololo kutya oosenda dhokuhogololitha nadhi kale dha patuluka nokonima yethimbo lya tulwa lyo21:00 – sigo taya ka tseyithilwa.

Aanapolitika ya lulilwa oya holola okwaauva ombili, nayamwe oye na uumbanda kutya omahogololo oga yakwa notaya ti Okakomisi oka ndopa thiluthilu.

Monkambadhala yokukutha po omalimbilo, Okakomisi ohela oki ithana aakalelipo yoongundu dhopapolitika opo ya ye moonkundathana nayo pooombelewa dhokakomisi, nelalakano okutseyithila oshigwana oprosesa yankene iizemo tayi ka kolekwa nokutseyithwa.

Sho aakalelipo yoongundu ye ya koshigongi, oshigongi osha kalekwa manga noinaa pu gandjwa omatompelo kutya omolwashike sha ningilwa.



Omaipulo

Shika osha geyithwa aakalelipo yoongundu, mboka ya ka ninga oshigongi shawo yoyene moshinyanga oshinene shiigongi poombonge dhokakomisi potundi 15:00.

Moshigongi moka, aakalelipo yoongundu oya kundathane nkene taye shi ende. Konima oya ka wayiminwa kaakuluntu yawo, ngaashi McHenry Venaani (PDM), George Kambala (AR), Bernadus Swartbooi (LPM) naMike Kavekotora (RDP), noyendji yendji.

Amushandjai. gwongundu yoIndependent Patriots For Change (IPC) Christine Aochamus, pethimbo ta popi niikundaneki kombinga yomatokolo ga ningwa moshigongi, okwa ti natango oye li muudhi kombinga ya nkene taya tsikile ko, oshoka Okakomisi ina ke ya lombwela sha. Aawiliki yoongundu, Aochamus okwa ti, otaya ka tseyithila oshigwana kombinga ya nkene taya katuka taya yi komeho nena.

Aawiliki oya holola eyemato lyawo molwa omukalo moka Okakomisi ka ungaunga nomahogololo mEtitatu.

Venaani, uusiku wEtitatu , okwa hiya oshigongi niikundaneki moka a ponokele okakomisi.

Okwa ti Okakomisi otaka imbi aahogololi ya hogolole nokuya kutha uuthemba wawo wokuhogolola.

“Okakomisi ota ka longitha ootakatika dhokukutha aahogololi ehalo lyokuhogolola. Okundopa kwawo okwiiyutha koveta okwa tula oshilongo muudhigu uunene,” Venaani a ti.

“Nomawi sho taga ka yalulwa otaga ka yalulwa pakutongola, oshoka otwa mona kutya aantu oyendji inaya vula okuhogolola omolwa omashongo gi ili nogi ili," okwa gwedha po.



Omatukano

Oshigongi shohela osha yonwa komaipumomumwe nomangwandjulathano pokati komupopiliko gwoIPC, Imms Nashinge nAmushanga ndjai gwongundu yoSwapo.

Nashinge okwa li a yemata oshoka okwa li u uvite kutya “ngweye [Okakomisi], otamu mu yakula nawa nota( Shaningwa) ende ongo oye mwene gwoombelewa ndhika”.

Nashinge okwa ti Shaningwa okwa falwa popepi nombelewa yomunashipundi gwokakomisi Dr Elsie Nghikembua, omanga aakalilepo yoongundu yalwe oya li ya tegelela mehala lyomathikilo mokakomisi.

Shaningwa okwa tuku Nashinge sho ayehe yaali ya li moonyandi.

Omanyenyeto inaga hulila owala mombelewa. Konima sho Shaningwa nosheendo she ya zi mo moombelewa dhOkakomisi, amushanga gwe nale, Cadas Haindongo, ngoka ngashingeyi e li omupeha amushanga omukuluntu gwongundu, okwi ipumu mumwe naNashinge.

Haindongo okwa geye omolwashoka anuwa Nashinge okwe mu ula “omugameni gwa Shaningwa”.

#NamibiaTaTokola2024