Omunelago ngoka ta ka hogololwa kuNetumbo a hololwa

Omuhogololwa-presitende Netumbo Nandi-Ndaitwah ina makuka sha natango kombinga yaamboka ta ka hogolola nokuulika ya ninge iilyo yoKabinete, Aakwaswapo taya ti, ashike omafaafayeko mongundu otaga ulike kutya otashi vulika a hogolole minista omukulu Alpheus !Naruseb oye a ninge omupevi-presidente gwongundu.



Nandi-Ndaitwah ngoka ta ka ganithwa a ninge omupresitende gwoshilongo momwedhi tagu ya, otaku tiwa anuwa oye awike a tseya oompangela dhe mwene, onkene aaleli yongundu oyendji oye li muudhi.



!Naruseb, ominista yomavi onkulu, okwa kumitha oyendji sho a hogololwa moshigongiilonga shoSwapo mumvogu, konima sho a kala a mwena po papolitika sha landula okwiikutha miilonga kwe mo2020. Okuthiga po kwe oparliamende okwa landula sho ina hogolololwa mokabinete kahugunina ka nakusa Presidente Hage Geingob. Okwa hugunine nopoosa yuuminista wuunamapya sigo omuMaalitsa 20202.



“Omupevi-presidente oku na okukuthwa miilyo iipe yOmutumba gwoPashigwana, inamu kwatelwa aaulikwa yahetatu mboka ihaya hogololola sha. Ngele otatu kongo okandidate tayi vulu okuninga omupevi-presidente, owu na okukonakona omusholondondo gwaanapolitika 51 mboka taya ka ya moparliamende,” omuwiliki mongundu a fatulula ohela.



Onzo oya gwedha po kutya: “Oshikulukulu, ngele tatu tala komulandu guuthikepamwe moSwapo gwo50/50, omupresidente omukiintu okwa pumbwa okuhogolola omupevi-presidente omulumentu. Aantu oyendji otaya ti kutya !Naruseb oye ta ka hogololwa komupevi-presidente, oshoka momusholondondo omu na aantu aashona yuukwatya mboka.”



!Naruseb ngoka ta ka gwanitha omimvo 71 muMaalitsa, okwa li ominista momauministeli ga yooloka okuza 2005 sigo 2020 – ominista yaaniilonga, yomavi, yiilonga noyuunamapya nuuniimuna. Okukala kwe gumwe gomaantu ye li petameko momusholondondo gwokuya koparliamende okwa ngushupaleka uukandidate we okuninga omupevi-presitende.



Dhengwa wu lungame



Aakwaswapo yamwe oyi itaala kutya Nandi-Ndaitwah okwi ilongo oshilongwa mumvogu sho a holola kuyele aaulikwa 10 mboka a hogolola ya ye moparliamende nomanga omahogololo inaga ningwa pethimbo lyoshigongiilonga shokuhogololoa aakalelipo yongundu mOmutumba gwoPashigwana.



Aanelago mboka Nandi-Ndaitwah a hogolola opo ya kalelele po Swapo moparliamende pamwe na!Naruseb, oyo Saara Kuugongelwa-Amadhila, Ephraim Nekongo, Indileni Daniel, Ruth Maseke, Elijah Ngurare, Linda Mbwale, Dino Ballotti, Fenny Tutjavi naErastus Haitengela.



Iizemo yoshigongiilonga shoSwapo inayi endela nawa aakuluntu yamwe mongundu, mwa kwatelwa nookuume aainekelwa yaNandi-Ndaitwah.



Omwiinekelwa gumwe oye, omupevi minista gwiilonga Veikko Nekundi, ngoka a li kokulekule momusholondondo nguka. Naashika osha thimike Nandi-Ndaitwah a pingene po Haitengela naNekundi.



“Omuhogololwa- presidente okwa dhimbulula kutya okuholola oompangela dhe kuyele ohashi vulika dhi ka yonuke. Ondi na omukumo mokutya naawiliki yopombanda kaye na owino washa kombinga yaamboka ye li momadhiladhilo gomuhogololwa-presidente. Kape na uuyelele wa pitithwa epuko nenge omafaafaeko gasha ando,” omukuluntu mongundu a hokolola.



“Kehe gumwe okwa tegelela a tale ngele edhina lye tali holoka momusholondondo gwahugunina,” onzo ya gwedha po.



Omalunduluko moKabinete



Sha landula sho Swapo a kanitha iipundi 12 momahogololo gomuNovemba 2024, oominista omugoyi odha ndopa okukala momusholondondo gwaanapolitika 51 mboka taya ka ya moparliamende. Oyo nee Peya Mushelenga (omakwatathano gopaigwana), Tom Alweendo (oomina niikwankondo), Itah Kandjii-Murangi (elongo lyopombanda), Frans Kapofi (egameno), Utoni Nujoma (aaniilonga), Christine //Hoebes (ombelewa yomupresidente), Erastus Uutoni ( ependulopo lyiilando nomikunda), Obeth Kandjoze (okakomisi komathaneko gopashigwana) nAnna Nghipondoka (elongo lyopevi).



Oominista dhimwe ndhika odha tegamena okuhogololwa kuNandi-Ndaitwah dhi kale mongundu yaaulikwa yahetatu mboka haa ulikwa, nokomukalo nguka otadhi vulu okukala natango iilyo yOmutumba gwoPashigwana.



Onakuyiwa yaminista guuyuuki Yvonne Dausab ngele ota ka kala moparliamende natango inayi yela nawa, oshoka ine shi enditha nawa moshigongiilonga shoSwapo.



Pokati mpoka, oominista odhindji odha holola kutya otadhi ka ya moshipundi shevululuko, nodho nee Kalumbi Shangula (uundjolowele), John Mutorwa (iilonga noshowo omupevi-prima), Doreen Sioka (uukashikekookantu), Albert Kawana (iikwameni), Agnes Tjongarero (omaudhano) naCalle Schlettwein (uunamapya nuuniimuna).



Okutala kutya oominista 16 dhomoKabinete kadhi mo momusholondo gwiilyo yOmutumba gwoPashigwana, mboka ye li momusholondondo taya yi ti oye na omukumo kutya otashi vulika ya ka kale iilyo yoKabinete.



“Aapevi minista yamwe oye wete kutya ndjika oyo ompito yawo yokuyelwayelwa, omanga iilyo iipe mOmutumba gwoPashigwana oya tegamena tayi ka ninga aapevi minista,” oshilyo shongundu sha hokolola.



Onakuyiwa yaKuugongelwa-Amadhila nayo wo oya li oshikundathanwa. Yamwe otaya fekele kutya otashi vulika ta ka ninge omupopiliko( omunashipundi) gwOmutumba gwoPashigwana a landula ko, oshoka Peter Katjavivi okwa tegelelwa a ye moshipundi shevululuko omwedhi tagu ya.