Okukeelela omaidhipago okwo tango momikandauvaneko dhoongundu dhopapolitika

Kehe siku moNamibia otamu kundanekwa onkundana yeikutho-mwenyo. Noyendji – konyala oopelesenda 82% dhiihakanwa aalumentu, omauyelele gopethimbo ndika ga gandjwa kOpolisi yaNamibia tage shi holola. Onkalo ndjika tayi limbilike oya ndhindhilikwa woo koongundu dhopapolitika dhimwe ngaashi Landless People’s Movement (LPM), the Popular Democratic Movement (PDM) noIndependent Patriots for Change (IPC) – ndhoka dha yi moonkundathana naNamibian Sun okuholola omilandu nomifango dhokukeelela omaidhipago ndhoka tadhi ka ya miilonga tango ngele ongundu ya hogololwa yi ye koshipundi. Shi ikolela komupopiliko gwoLPM Lifalaza Simataa, omaidhipago oga vuka unene, unenene molwa omashongo gopankalathano twa taalela ongoshilongo. Okwa ti ongundu yoLPM oya holola momukandauvaneko gwawo esimano lyokukwatitha komeho aaniilonga moshikondo shuundjolowele wopamadhiladhilo opo yu uvithe ko oshigwana, okutunga iipangelo nomandiki guundjoloweele wopamadhiladhilo nokupopya kombinga yekalopo lyaanawino yopamadhiladhilo muuklinika. “Oshikwawo, ongongundu, otu shi uvite ko kutya aaniilonga moshikondo shuundjolowele oya kwatakanitha kumwe omaidhipago ogendji ngoka taga lundu kumwe nonkalo yokwaa na iilonga, oluhepo nomaihumbato omawanayi gaantu ongonkambadhala yokudhimbwa onkalo, nokwiitaala kutya omaudhigu ngaka naga kandulwe po opo ku mwenekwe omadhipago ngaka ogendji ga vuka,” okwa ti. Simataa okwa gwedha po kutya yo ongepangelo li li koshipundi, ongundu yoLPM otayi kala tala komaudhigu ngaashi okunwa omalovu sha pitilila noshowo ondjele yi li pombanda yaanaskola taya etha oskola. “Okutala koomvula ndatu dha piti, ondjele yokweetha oskola kwaanaskola yokoosekondele oya li pokati koopelesenda 18.5% sigo 21.4% , shoka sha thigi aanaskola ya konda poopelesenda 78% inaa mana oskola onkene kaye na oonzapo. Shoka otashi vulu okukala osheetithi shondjele gi li pombanda yomaidhipago. Ongundu yoLPM oyi itaala kutya omapekapeko kombinga yomashongo gopankakathano oga simana noonkondo. Otwa pumbwa okutseya iiyetithi yomaidhipago moNamibia opo tu ungaunge nawa nomukundu nguka,” okwa ti . EzazaShi ikolela komupopiliko gwongundu yoPDM Geoffrey Mwilima, aantu oyendji mboka haya ikutha omwenyo oyo mboka ya pongola notaya lili oonakusa yawo.“Aantu yamwe oothigwa dhaa na aakuluntu ayehe nodhi uvite ezaza shili. Omuntu ota vulu hongololwa a dhiladhile pamwe oshihwepo a landule(a se) aavali ye. Unenene mboka aagundjuka naanona. Aakokele, uuna ya thigwa po kaamwayina ayehe, nayo ohaya kala yu uvite ezaza nohaya tokola yi ikuthe omwenyo,” okwa ti. Osheetithi oshikwawo shomaidhipago tashi etitha ondjele yomaudhipago yi li pombanda moshilongo osho omaipulo ogendji konima yokundopa kiiputudhilo yopombanda nohaya kala yu uvite yaa na oshilonga. “Iilonga otayi pula uulongelwe yo inaya gwanitha po iipumbiwanima mbika. Aantu ohaya teka omukumo nokutokola yi ikuthe omwenyo. [Nena ope na] ethindilo kongudhi lyomashenge, naakwanezimo yamwe oya tinda okutaamba ko aakwanezimo yawo nohaya dhiladhila [uushenge ] owo ethingo, [ndjoka] tali vulu okufala omuntu i ikuthe onwenyo,” Mwilima a ti, okwa gwedha po wo kutya omaipumomumwe gaaholathani mongashingeyi nago otaga etitha iiponga yomaidhipago moshilongo. Ongundu yoPDM otayi ka tala kokulonga, opo momusindalongo mu kale elongo lyuundjolowele wopamadhiladhilo naashika otashi ningwa nelalakano okulonga aantu nkene ye na okuungaunga nomaudhigu gonkalamwenyo opo ya kale nontseyo ya nkene taya vulu okumwenya nawa nonande ya taalelwa komashongo gonkalamwenyo, okwa ti.Mwilima okwa holola wo kutya oopolohalama dhowina otadhi ka longa wo iilema nenge aavu yopamadhiladhilo nkene ye na okulumba moonkalo dhawo. “Otatu ka tala komwaalu gwaanawino yopamadhiladhilo nokukwashilipalela ogwa indjipalekwa. Aanawino yopamadhiladhilo taa yalulwa ohaku yi moshipala eyakulo lyaavu nopethimbo taya ka monikila olweedhe lwokuya ko kuyo, omuntu ngoka ta pumbwa ekwatho oha adhika i ikutha omwenyo nale. Aantu ya gwilikwa po komaudhigu gonkalamwenyo otaya vulu okuhungwa omwenyo nokuyelithilwa kutya uudhigu otawu ka hula nonkalo otayi ka galukila kuuwanawa.”Oshinima sha kitakana Omupopiliko gwongundu yoIPC Immanuel Nashinge okwa ti eidhipago kali shi ashike uudhigu wongundu yawo, ihe owoshilongo ashihe. Nonande eidhipago oshinima sha kitakana, okwiitaala kutya otali vulu okukondjithwa nokushonopekwa. Momukandauvaneko gwawo, IPC oya ti oya thaneka okweeta po uuklinika 500 hau ende. Shi ikolela komupopiliko gwongundu, aavu yamwe oye na omikithi dhomalonda ngaashi ombuto yoHIV-AIDS, nomolwa okwaauva ko epango lyonkalamwenyo ayihe, ohaya teka omukumo nokutokola yi ikuthe omwenyo. “Oshikwawo omaudhigu gokwaauvathana pokati kaaholathani. Pauveko lyetu ongongundu yoIPC, shoka shi li wo momukandauvaneko gwetu, [osha simana] okutala tango kuundjolowele wopamadhiladhilo miipangelo nomomahala giilonga. [Osha simana] okukwatela mo omayakulo guundjolowele wopamadhiladhilo muundjolowele wopetameko,” okwa ti, nokwa gwedha po woo kutya uuna omayakulo ngaka ga tulwa po, aantu otaya ka manguluka okuholola omaudhigu gawo. Nashinge a ti, ngele oya yi koshipundi, IPC otayi ka dheula nokutuma moshigwana aapangi eyovi yomomikunda miitopolwa ayihe 14 nokutota po omandiki gomazulonkalo gaalongithi yiingangamithi moshitopolwa kehe.Oongundu dhilweMomukandauvaneko gwawo, ongundu tayi pangele yoSwapo oya ti oya tunga uuklinika niipangelo, okuza 272 mo1990 okuya 530 mo2023.Omuleli gwongundu yoSwanu Evilastus Kaaronda okwa ti ongundu otayi ka tunga iipangelo iyali yi yululule omutenge gu li komapepe gOshipangelo shEpangelo shaKatutura mOvenduka. Ongundu yoThe National Empowerment Fighting Corruption (NEFC) oya ti otayi ka tunga uuklinika kiitopolwa yokuushayi, nokwoopalekulula iipangelo yepangelo ya kulupa. Omupreseidente gwongundu yoBody of Christ Party (BCP) Festus Thomas okwa uvaneke kutya ongundu otayi ka tala tango kuundjolowele wopamadhiladhilo nokekoko lyuunona, nokutula po oosystema dhomayambidhidho dha kwata miiti.

Okukeelela omaidhipago okwo tango momikandauvaneko dhoongundu dhopapolitika

Comments

Namibian Sun 2024-11-22

Please login to leave a comment

Okukeelela omaidhipago okwo tango momikandauvaneko dhoongundu dhopapolitika

Comments

Namibian Sun 2024-11-22

Please login to leave a comment

Login