Ndeutepo: Uutoni ita vulu oku kutha ndje miilonga

Mayola gwaMuthiya Johannes Ndeutepo, ngoka paife ha longele mOvenduka, okwa ti minista gwomapendulopo giilando nomikunda Erastus Uutoni ne mu kuthe miilonga yuukamunsela ngele okuwete okulongela kwe moshilando-pangelo kwa teya oveta.Ndeutepo okwa popi ndhoka ohela mokuyamukula komapulo goshikundaneki shoNamibian Sun konima sho a lombwelwa kutya Uutoni okwa koleke kutya okukala kwe kOvenduka, okwa taaguluka Okatendo 13 (1) (h) kOveta yOmalelo gIilando nOmikunda.Oveta otayi ti kamunsela melelo lyondoolopa na thige po iilonga mbika ngele iha zi we mondoolopa moka konima yokuhogololwa.Shi ikolela ku Uutoni Oveta oya yela noinayi pumbwa okufatululwa.Okuza 1 Juli 2024, Ndeutepo Omuvenduka sha landula sho a ningi Omukuluntupitithi gwehangano lyoNammic Holdings.Kakele kaashono Ndeutepo okwa ti haye awike kamunsela ngoka kee li mondoolopa moka a hogololelwa. Okwa gwedha po kutya Oveta oya pumbwa okutalululwa, okwa ti wo Uutoni na kambadhale e shi ninge nokutula miilonga Oveta nokwe shi ndjandjukununa ongo ‘itashi vulika paveta’.“Minista ota vulu okutya sha ngele okwa hala okufuula aatoolinkundana, ashike ngele oku na oonkondo nuuyelele shoka itashi vulika paveta, ne shi tule miilonga,” Ndeutepo a ti.Ndeutepo okwa ti ota kala omukalimo gwomOmuthiya nonande ha longele kOvenduka.“Opo wu tye inandi kala mOmuthiya omanga ndi na omatungo hoka, egumbo lyandje oko li li, nonda kala mOmuthiya onkalamwenyo yandje ayihe. Ngele ope na ondoolopa ndi hole, ota yi kala Omuthiya,” Ndeutepo a ti.“Ashike ngashingeyi oto lundulula Oveta nokutya kutya Oveta otayi ti za moka, kala oko ho longele shili. Inandi lunduluka mpoka nda kala, onda longele kOlange, kOngwediva ashike egumbo lyandje olya kala kOmuthiya,“Otu na ookamunsela haya hingi oombesa nolundji oopelesenda 90, otaya hingi. Otaya longele peni? Ope na ookamunsela aahingi yoondhila notashi vulika ye li pondje yoshilongo molwiilonga yawo.”Mo2023 Namibian Sun okwa kundanekele ehokololo lya faathana kombinga yomunashipundi gwokomitiye yelelo lyOndoolopa yaNgwediva, Dr FabianGeorge, ngoka ha longele kOkakarara, nosha tukuluthile omapulo kutya oha gwanitha po ngiini iilonga ye yomelelo lyondoolopa sho yi li kokule ookilometa 560 naampoka ha longele.Mekwatathano noshikumungu shaGeorge, omushangwa gwopaveta gwomuJanuali 2021 gwa nyolwa kuAhende ndjai Festus Mbandeka e gu nyolela Uutoni ogwa dhenge omuthindo komilandu dhOveta, okwa gwedha po okukutha miilonga kamunsela ngoka inaa kala mondoolopa moka a hogololelwa otashi ningwa ‘paumwene’ ashike ‘ hameholamo’.Mbandeka okwa nyolele: “Mompito moka kamunsela melelo lyondoolopa ke shi we omukalimo gwomondoolopa nenge e li mo owala pakathimbo mondoolopa moka a hogololelwa, kamunsela ngoka na thige po iilonga paKatendo 13(1)(h) kOveta yOmalelo gOndoolopa nOmikunda...”Okwa gwedha po kutya minista, ota vulu okupula ekwatho mokukutha miilonga ookamunsela ya kala palwe, “noina pumbwa okutegelela ongundu yopapolitika” yi ithane ko oshilyo shawo. Kakele nonuuyelele mbuka, George natango okamunsela mondoolopa yaNgwediva.Sho a pulwa ohela, kutya omolwashike e etha omalelo gondoolopa nomikunda taga taaguluka Oveta, Uutoni okwa ti osha yela nokwa ti ope na owala omalelo gondoolopa nomikunda inaga hala okuvulika kompango.“Shampa itoo longele mondoolopa wa hogololelwa, nena osha yela owa pumbwa okuya. Oshaashi owala aantu oye li mefudho. Otatu ka pulakena shoka taya ka ninga po, kandi wete taye ke mu hogolola a ninge mayola natango. Okwa pumbwa okuthiga po iilonga. Oveta oya yela, oshoka owala aantu kaa ye hole okuvulika kompango sho tayi ti. Shampa twa zi mefudho, otatu ka vula okugandja uuyelele.”Namibian Sun okwa tseyithilwa komwiinekelwa kutya okuza sho Ndeutepo a tembukile kOvenduka, osha guma nayi ondoolopa oshoka omitumba dhelelo olundji odhu undulilwa komeho molwashoka ke po a kale omunashipundi gwoshigongi.Pethimbo lyelangeko lye, Ndeutepo okwa tile ondoolopa oya kwashilipaleka kutya ope na iikwathitho yopashinanena mbyoka tayi kwatha ngele ina holoka ye mwene.Okwa ti wo kutya ita shuna mo momahogololo guumayola wondoolopa.Elelo lyondoolopa yaMuthiya inali ninga natango omahogololo neganitho lyaanambelewa naashika osha thanekelwa mesiku 17Januali.Molwashoka kape na Mangestrata, ookamunsela otaya ka ya kOshomeya hoka eganitho tali ka ningilwa.kenya@nmh-hub.com.na

Ndeutepo: Uutoni ita vulu oku kutha ndje miilonga

Comments

Namibian Sun 2025-04-04

Please login to leave a comment

Ndeutepo: Uutoni ita vulu oku kutha ndje miilonga

Comments

Namibian Sun 2025-04-04

Please login to leave a comment

Login