Martin Lukato: Olweendo lwependa

Desemba olyo ethimbo lyomatyapulo kaantu oyendji, ashike kependa lyomopolitika Martin Lukato, omwedhi nguno ogwo gwemanguluko lye papolitika.



OmuDesemba 1960 sho a valelwa momukunda Anda moshikandjohogololo shaLinyanti moshitopolwa shaZambezi.



Osha li muDesemba 2002, sho a thigi po iilonga yuupolisi.



Desemba 2024 lya ningi ehulilo lyokutegelela kwe kwomimvo 20 okuya moparliamente konima sho ongundu ye yoNational Democratic Party (NDP) ya mono oshipundi shawo shotango mOmutumba gwoPashigwana.



Okuza muMaalitsa 2025, Lukato ota ka ninga oshilyo shOmutumba gwoPashigwana.



Olweendo lwaLukato olwa kala lwomashongo neidhidhimiko. Ongundu yoNDP, ndjoka a toto po mo2003, okuyi hole noonkondo. Ngiika e yi hole ngomukulukadhi gwe Edith, ngoka a hokana konima yomimvo 35.





Haudhano



Moonkundathana nomutoolinkundana nguka mo2014, Lukato okwa fatulula okukala kwe omupresitende gwongundu ethimbo ele, ndjoka pethimbo ndyoka a wilike oomvula 11. Ehokololo lye pethimbo ndyoka olya li tali etitha ohenda.



“Okupopya oshili yoyene, iinyangadhalwa yongundu ohandi yi longitha iimaliwa tayi zi mondjato yandje mwene. Iilyo yongundu ihayi gwedha po sha. Onda kaleka po ongundu ndjika uule woomvula 11 niimaliwa yandje mwene. Ongundu ando oya sa po nale ngele kanda li po,” okwa lombwelele Namibian Sun pethimbo ndyoka.



“Onda hupa muunamapya. Ohandi limi kehe omvula. Ohandi palutha aanegumbo lyandje niilikolomwa, niihupithila ohayi kwatha ndi kaleke po ongundu,” He yaavalwa 12 a ti.



Pahapu dhe, Lukato oha lefe omaloli okuza koKatima Mulilo opo a ye kiigongi yopapolitika kOvenduka nelalakano opo a kwate nawa iimaliwa yi ka longithwe miinyangadhalwa yongundu. Naashoka oshinano shookilometa 1 226 shekudhilo neloloko – nokunikilwa kezimba ewinayi, ngele eloli olya humbata iimuna.



Ku Lukato, opolitika kaya shi uudhano kuye. Kakele kiiniiwe, olweendo lwaLukato olwa kala lwokushekwa. Noshiingilisa she shi li po tuu, okuholola omadhiladhilo ge inaku kala okupu.



Gwedha ko oshili kutya okwa li ekakunya pethimbo lyiita, uukakunya mboka e wu wayimine mepipi lyomimvo 19 mo1979, osho ngawo omulumentu a kondjitha okutaamba ko kuyamwe.



Okwiikanyuna ‘uundaadhi’ inaku kala okupu. Okwa wayimine etanga lyopolisi yaNamibia mbalambala pemanguluko, nokwa longo mo oomvula 12 manga inaa thiga po iilonga ye.





Omusimanekwa



Oombonge dhongundu ye odho ondunda yomwiidhi tayi adhika momithitu dha thita momukunda Queensland moLinyanti, noye mwene gwomukunda.



Ndika eyooloko enene koombonge dhongundu tayi pangele yoSwapo mOvenduka, ndhoka dha tungwa koshimaliwa sha konda pobiliona yimwe yaNamibia. Ando okwa li omathimbo gopaMbiimbeli, Lukato ando oDavid... ta kondjitha Goliat – omutongolume Omufilisti ngoka omuleelee, pambo lyaSamuel.



Ashike Lukato okwa simanekwa kegumbo. Kakele kokukala mwene gwomukunda gwaQueensland, oye elenga lyosub-kuta, ndjoka hayi lele oshikandjo shaMakanga moshitopolwa shaZambezi. Onkene, ke shi omupe mokulela notashi vulika ta ka eta mo sha sha yooloka mOmutumba gwoPashigwana.



Elunduluko ewanawa lyongundu pomathimbo ngaka otali kwatele mo wo iimaliwa ya gwana yongundu, ndjoka tayi ka pewa omiliona N$1.1 kehe komumvo molwa iinyangadhalwa yawo yopaparliamente, nokuye mwene wo, ondjambi yokomwedhi yoN$51 000.



“Ngashingeyi ngame omunafaalama, ndi na epya, ohandi tekula iikwamawawa nokutholoma oondhopi,” okwa popi ohela kombinga yokuhupa kwe.



Okwa gwedha po: “Olweendo lwandje olwa li olule nolwa kindja. Oomvula oonde 20, ashike otandi pandula Kalunga molwa omayambeko ge notandi pandula Aanamibia sho ya hogolola ongundu yoNDP. Oya simaneka ndje. Otwa halele iipundi 20, ashike otwa pandula natango.”



Eigidho-indilo lyopahunganeko lyongundu yoNDP, Seli Nako, lya tsu. Otali ti ‘ethimbo lya thiki’ – eeno shili, lya shile Lukato. Mboka inaya itula mo mendhindhiliko lyoNDP lyiikaha iyali ya yeluka, ongo yi igandja, oye shi ningi mokwaashiwo.