Hulithii po okuninga iipambele yaagundjuka yopapolitika, Tjongarero a lombwelwa

Oshimpaga shimwe shEhangano lyaagundjuka (NYC) osha lombwele minista gwaagundjuka Agnes Tjongarero kutya yo itaya ka taamba ko ewilikongundu lyopakathimbo ndyoka u ulike, oshoka inali kwatela mo ayehe papolitika.



Etokolo lyaminista okuulika ewilikongundu lyopakathimbo olya tulukutha omahokololo, unenene okuza kiimpaga tayi kondjithathana mokati kaagundjuka, aagundjuka ya lulilwa otaya ti ewilikongundu epe olya tholomwa po owala kiilyo yewawa lyaagundjuka moSwapo (SPYL), omanga aagundjuka ya za koongundu dhopapolitika dhilwe inaya kwatelwa mo.



Iilyo yewilikongundu lyopakathimbo oyo: Curtis Andrew, Beverly Silas, Hendrik Theofilus, Vistoria Itta naNghoshi Panduleni.



Julia Nekwaya, Omuwiliki gwaagundjuka nOmukuluntu koshikondo shOmakwatathano mongundu yoPDM okwa holola okukala ompinge kwe neuliko ndika lyewilikongundu epe, okwa ti minista oku li olwaama mbinga nokwa ndopa okukwashilipaleka kutya ewilikongundu lyehangano lyaagundjuka olya kwatela mo aagundjuka ayehe ya za koongundu dhopapolitika dhi ili nodhi ili.



“Minista okwa kutha miilonga ewilikongundu ihe ina kaleka Omutumba gwAayehe, onkene otwa pula komeho nOmutumba gwetu tu hogolole aaleli mboka taye ke tu kalela po atuhe nomemanguluko wo, sha ningwa ongula yonena. Minista okwa gama ombinga meuliko lye lyewilikongundu lyopakathimbo, moka mu na owala iilyo yewawa lyaagundjuka yoSwapo naashika inashi kwatela mo ayehe. Itatu ke shi taamba ko.



“Minista ita vulu okudhana niipambele yaagundjuka ngaashi a hala. Aagundjuka oye li muudhigu moshilongo shika unene pethimbo ndika, otwa pumbwa aakalelipo ya za koombinga noombinga opo ya kwathe ehangano lyaagundjuka li kale po,” Nekwaya a lombwele Namibian Sun ohela.



Oshitopolwa



Nekwaya okwa pe ombedhi minista sho e shi ninga sha fa ehangano lyaagundjuka olyo oshitopolwa shewawa lyaagundjuka yoswapo, shoka tashi tu kutha einekelo mEhangano lyaagundjuka.



Shi ikolela komukanda gwa pitithwa, monkambadhala yokuyanda okukala pwaa na aawiliki nokukwashilipaleka iilonga otayi tsikile mEhangano lyaagundjuka, uuministeli waagundjuka owu ulike ewilikongundu lyopakathimnbo li ungaunge niipambele yehangano. Etokolo ndika olya landula ekutho miilonga lyewilikongundu ekulu sha ningwa mekwatathano nOntopolwa 17 yOveta yEhangano lyAagundjuka yomo2009.



Ontumwafo yekuto lyiilonga ndjoka ya topolelwa iilyo iipe yewilikongundu, noya monika koshikundaneki shika, otayi holola kutya ewilikongundu lyopakathimbo otali ka kwatha mokulongekidha Omutumba gwAayehe notaya ka longa mokakomitiye komahogololo momutumba ngoka twa taalela.



“Molwa onkalo ndjika nomekwatathano nOntopolwa 5 yOveta yEhangano lyAagundjuka yomo2009, ewilikongundu lyopakathimbo oli na oshinakugwanithwa shokulongekidha Omutumba gwAayehe. Oshikwawo, ewilikongundu lyopakathimbo otali ka longa ongokakomitiye komahogololo pethimbo lyOmutumba gwAayehe,” oshikalimo shombilive tashi ti.



Oshikwawo, opo ku kwashipalekwe uuyuuki, ka pe na oshilyo shewilikongundu ndika lyopakathimbo tashi ka kutha ombinga momahogololo nopoosa tadhi kondjelwa pethimbo lyOmutumba gwAayehe. “Oshikako shiilonga yewilikongundu ndika lyopakathimbo oshuule woomwedhi hamano nenge sigo ya mana iilonga yawo, sigo 12 Juni 2025. Minista ota vulu okugwedha ko koshikako shika noomwedhi mbali (2) oshikando kehe, ngele sha pumbiwa, tashi ningwa mekwatathano nOntopolwa 10 yoPEGA,” Ombilive tayi ti.