APP a kolekulula okukondjela kwe uuthemba womashenge noohikwaali

Ongundu yopapolitika yoAll People's Party (APP) oyi itula mo mokugamena uuthemba womuntu nuuthikepamwe wAanamibia ayehe, mwa kwatelwa mboka omashenge noohikwaali, omupevi presitende Linus Muchila osho a ti. Ta popi pethimbo lyeuliko lyomukandauvaneko gwoAPP moRundu mehuliloshiwike twa zi. Muchila okwe shi yeleke kutya ongundu oya thikama yu ukilila mokupopila uuthemba wopakotampango wOmunamibia kehe, inaku talwa konakuziwa ye, kuukwatya we nokomakwatathano gopaihulo. “Ongundu yoAPP ohayi popile uuthemba wopekota wAanamibia ayehe, inaaku talwa kutya ongoye lye nowa za peni, nenge komakwatathano goye gopaihulo. Shino oshinakugwanithwa shopakotampango, nakehe gumwe ngoka e li ompinge nasho oye omutondi gwekotampango lyaNamibia. Otatu shongo kehe gumwe, mwa kwatelwa Swapo. Swapo, owa li oshilyo shomutumba ngoka gwa tota po ekotampango lyoshilongo, hasho? Omolwashike to holama oshili?" okwa pula. Muchila okwa tumbula Ontopolwa 3 yekotampango lyaNamibia, ndjoka ta ti itayi vulu okulundululwa. "Osha yela nawa—lesha Ontopolwa 3. Otali holola sha yela kutya ontopolwa ndjika itayi vulu okulundululwa. Kandi uvite ko mpoka yalwe haya kutha omaitaalo gawo, ashike osha yela: itayi vulu okulundululwa. Owa hala uuthemba woye wu simanekwe, ihe ino hala okusimaneka uuthemba wayakweni. Ongweye lye?" okwa pula. Muchila okwa dhenge omuthindo kutya APP okwiitula mo mokugamenena po ekotampango, ndyoka lya kwatela mo uuthemba waantu ayehe. "Shoka osho tatu ti. Osha yela. Nandi shi yeleke: ngele shika osha tsikile, oAPP otayi ka kondjitha ongundu kehe yopapolitika ndyoka itayi ka simaneka uuthemba waantu. Kehe ongundu yopapolitika ya nyolithwa kOkakomisi kOmahogololo moNamibia oyi na okwiiyutha kekotampango lyoshilongo.” Okwa shongo wo natango ongundu dhopapolitika dhi ulike momakotampango gawo mpoka dhi li ompinge nuuthemba womuntu wopekota. "Otwa hala okumona omakotampango gawo ngoka inaga talululwa nokutala mpoka pwa nyolwa kutya ihaya popile uuthemba wopekota wAanamibia ayehe. Ashike, shampa taya popi, oya hala ye mu fundje. Omo shi li mekotampango lyoSWAPO, omo shi li mekotampango lyoPDM, nomo shi li mekotampango lyongundu yopapolitika kehe moNamibia," okwa ti. Okwa endulula mo metokolo lyongundu okusimaneka aluhe uuthemba womuntu, okutala kondandalunde kuuthemba womashenge noohikwaali. "Ongoshitopolwa shiinakugwanithwa yawo, oAPP oyi itula mo mokukondjitha iimbuluma yuutondwe nethindilo kongudhi lyaantu inaaku talwa koludhi, kuukashikekookantu, komakwatathano gopaihulo, keitaalo, nokuulema. Ongundu yopapolitika otayi lalakanene okutota ooveta dha pamba iimbuluma yuutondwe nokukwashilipaleka kutya ooveta ndhika otadhi tulwa miilonga lela. Shika osha kwatelwa mo omadheulo golela gaapolisi nogaaniilonga yomoshikondo shuuyuuki opo ya ungaunge niipotha yoludhi ndoka," okwa ti. Okwa gwedha po kutya oAPP otayi ka kambadhala okutula po okutula po omahala ga gamenwa noga mangulukila ayehe naampoka omashenge noohikwaali ye li megameno, noya simanekwa. "Shika otashi ka kwathela mo okweeta po omilandi tadhi kwatele mo aantu ayehe yomaukwatya ga yooloka mooskola, miilonga, nopomahala gaayehe. Oshikwawo, ongundu oya thaneka okutameka oonkundathana kombinga yuukwatya nomakwatathano gopaihulo opo ku hwamekwe euvoko enene netaambathano( eidhidhimikilathano) moshigwana."

APP a kolekulula okukondjela kwe uuthemba womashenge noohikwaali

Comments

Namibian Sun 2025-04-04

Please login to leave a comment

APP a kolekulula okukondjela kwe uuthemba womashenge noohikwaali

Comments

Namibian Sun 2025-04-04

Please login to leave a comment

Login