Ombelewa yomikanda dhiiyenditho ya patuluka mOndangwa

Nelalakano okuthikitha omayakulo koshigwana, opolisi yaShana oya patulula ombelewa ompe yokugandja omikanda dhiiyenditho mOndangwa mEtitatu. Komanda gwopolisi mOshana Komufala Naftal Lungameni Sakaria okwa ti epatuluko lyombelewa ompe mOndangwa inali gwedhela komatungo owala, ashike olyo uumbangi weitulomo lyawo mokugandja omayakulo dhingi koshigwana ngoka taga monika nuupu. “Nombelewa ndjika ompe, otatu lalakanene okuyulula omutenge gwa li komapepe goshigwana sho aakwashigwana ya li haya ende iinano iile okuya kOshakati ya ka konge omikanda dhiiyenditho yawo. Ombelewa ndjika otayi ka eta omayakulo ga simana popepi noshigwana, shoka tashi kwathele mokutetula ethimbo noshimaliwa shoka aakalimo yomOndangwa nopomidhingoloko dhopopepi haya longitha mokuya kOshakati,” Sakaria a ti. Okwa ti kutya ombelewa ndjika itayi ka endeleleka owala omayakulo nokukwashilipaleka omikanda dhiiyenditho tadhi gandjwa dhi na uuyelele womondjila - kamu na omapuko, ashike otayi ke tu kwathela natango mokukondjitha iimbuluma, otayi ka kwashilipaleka egameno moondjila dhetu noshowo otayi ka kwatha aahingi naafaalelwa yi iyuthe koompango dhomoondjila nokooveta dhilwe. Sakaria okwa ti opolisi otayi ka longitha uutekinolohi, opo oshigwana ashihe shi vule okumona omayakulo ngaka nuupu, naashika otashi kwathele opolisi yi adhe omalalakano gawo gokugamena nokupopila oshigwana nomaliko gasho, okukaleka po nokusimaneka oveta nelandulathano. Okwi indile aapolisi, mboka taya ka longela mombelewa ndjika, opo ya kwashilipaleke kutya otaya kwatha oshigwana nawa itaya tongola notaya longo wo neitulomo mokugandja omikanda dhiiyenditho meendelelo ngaashi tashi vulika. Sakaria okwi indile wo oshigwana shi longele kumwe nopolisi. “Otandi indile oshigwana shi talele po nokulongitha ombelewa ndjika, oshoka one ya tulilwa po yi mu kwathe. Otatu tsu omukumo oshigwana opo shi tsikile nokulongela kumwe nopolisi yaNamibia, opo atuheni tu kaleni momudhingoloko gwa gwamena nogu li nawa,” okwa ti.Sakaria okwa gandja olupandu kostola yoJan Japan Motors ndjoka ya gandja omagano giilongitho kombelewa ompe, iilongitho mbyoka yongushu yoN$18 799. Okwa ti elongelokumwe ndika otali holola ombepo yuukumwe ndjoka ya simana mokunkondopeka ekwatathano pokati kopolisi nomahangano. Meniindjela gwostola yoJan Japan Motors mOndangwa, Mmassa Christian Batende okwa ti omukanda gwoshiyenditho gwa za kopolisi ogwa simana mostola yawo yokulanditha iihauto oshowo koohandimwe oyendji.Ombelewa ndjika ompe yokugandja omikanda dhiihauto otayi ka kwathela aakalimo yomOshivelo mboka inaya hala okuya kOshomeya, otayi kwathele woo aakalimo yomOndangwa yokOshikango. - tuyeimo@nmh-hub.com.na

Ombelewa yomikanda dhiiyenditho ya patuluka mOndangwa

Comments

Namibian Sun 2025-04-25

Please login to leave a comment

Ombelewa yomikanda dhiiyenditho ya patuluka mOndangwa

Comments

Namibian Sun 2025-04-25

Please login to leave a comment

Login