Ehuliloshiwike lyiiponga yokutsaathana noombele

Aalumentu yaali oya mana oondjenda dhawo miiponga ya yooloka sho ya tsuwa noombele mehuliloshiwike, omanga omulumentu omukwawo ota mono epango konima yokuponokelwa nokudhengwa kaakwashigwanima sha landula oshiningwanima shokutsa omukadhona gwe nombele kOshitopolwa shaKavango Uuzilo. Omupopiliko gwopolisi yaNamibia, Omupevi Komufala Kauna Shikwambi, okwa koleke iiningwanima mbika iyali, ta ti iiningwanima ayihe mbika oye etwa koontamanana ndhoka dha lundu sigo omokugumathana komalutu. MOlyomakaya lwopotundi 17:20, molukanda lwaRiverside moBethanie mOshitopolwa sha?Karas, Johannes Swartbooi (42) okwa tsuwa nombele montulo sigo omeso sha landula sho ya li taya nyenyeta nomulumentu gwoomvula 26. Omufekelwa okwa mangwa po nombele oya kuthwa po kopolisi. Moshiningwanima oshikwawo, mOsoondaha, pokati koyimwe nombali yuusiku mondunda yomanwino yedhina YB-INN Bar moTseiblaagte koKeetmanshoop, Alfred Gariseb (40) okwa hulitha ombaadhilila sho a tsuwa nomukonda lwiikando oyindji. Omufekelwa omulumentu omunamimvo 32, anuwa okwa ponokele nakusa Gariseb sha landula oondjuma molwa omatumwalaka a adha mongodhi yomukadhona gwe. Omufekelwa okwa mangwa po nomukonda ogwa kuthwa po kopolisi.



Oshigwana shi ikuthile oveta noku mu dhenga

Pokati mpoka, koKavango Uuzilo, omulumentu okwa taambelwa moombete mOlyomakaya konima sho a dhengwa kaakwashigwana. Oshiponokela shika anuwa oshe etwa sho oshigwana shi ikuthile oveta sha landula oshiningwanima shokutsa nombele ohondakadhona ye lwiikando oyindji komukunda Thikanduko lwopotundi ontine yokoongulasha. Shi ikolela ku Shikwambi, omukiintu omunamimvo 41 okwa ehama noonkondo, oshoka okwa tsuwa mombunda, mepepe, mothingo nokomutse. Okwa falwa meendelelo koshipangelo shaAndara nokwa ka lundululilwa koshipangelo shepangelo shaRundu e li monkalo ombwinayi. Omufekelwa okwa mangwa po nota mono epango moshipangelo shaAndara konima yokuponekelwa nokudhengwa kaakwashigwana.