Omupambele a yemata shaashi okatekulu oka likila kombwa poskola

Hekulu yomulongwa gwomondondo onti-2 poskola Epundi Combined School momukunda Odayafingwa mOshitopolwa shaHangwena okwa geyela noonkondo elelo lyoskola sho inali ungaunga nawa noshiningwanima shokatekulu ke koomvula hetatu ho ka likila poskola kombwa yomuniilonga poskola.

Erastus Kleopas, ngoka ta popile ko oshihakanwa, ota hokolola kutya okwa longitha oshimaliwa she okuya nokugaluka koshipangelo hoka okatekulu ka ka wendwe owenda yokukeelela omukithi gwendambi.

Kleopas okwa ti okwa tila kutya epango lyokukeelela omukithi gwendambi, lyokuwendwa lutano, otali ka ya moshipala elongo niizemo yokatekulu.

Oshiningwanima osha ningwa anuwa mo17 Kotoba, noshi ikolela komakonakono ga ningwa koshifo shaNamibian Sun, anuwa omulongwa okwa lyata ombwa, ndjoka ye mu lumata metundji.

Okuza poshiningwanima , okamatyona, pahapu dhahekulu, oka kala nokuya kOshipangelo shEpangelo shaShakati ka ka wendwe owenda yokukeelela omukithi gwendambi – oowenda ndhoka ohadhi kala ntano. Ombwa, yedhina ‘Chief,’ oyomuniilonga poskola mpoka.

Mwene gwombwa okwa ti moshiwike muka okwa zimina okufuta oshimaliwa sha longithwa okuya koshipangelo ihe okwi ikala kutya ombwa inayi lumata okanona, ta ti oka yagwa owala kashona.



Ina ka lumatwa

Omukuluntuskola , Magnus Angula, okwa ti kutya omahokololo kutya ombwa oya nika oshiponga kaalongwa kage shi goshili, nokwa ti shika osho oshikando shotango shoshiningwanima sholudhi ndoka mokukala kwe omukuluntuskola uule woomvula dha konda po 12 .

Okwa gwedha po kutya Chief ke shi ombwa ohahu. Oshikwawo, omukuluntuskola okwa ti kutya nonande kali po poshiningwanima, anuwa ombwa inayi lumata okanona, ihe oye ka kwala owala.

“Onda lombwelwa kutya omulongwa okwa lyata ombwa nombwa oye mu yaga. Ombinzi inayi tika. Kakele, nelalakano okukeekelela, ekwatho lyotango olya gandjwa, nolwanima omutekuli gwokanona namwene gwombwa oyu uvathana pakana, kutya mwene gwombwa otaka gandja olefa yokufala okanona koshipangelo.”

Otaku hokololwa kutya muule woomvula ne ombwa ndjika oya kala hayi landula mwene kiilonga, notaku hokololwa kutya natango oya tsikila okuya naye kiilonga konima yoshiningwanima.

Angula okwa gwedha po kutya oombwa odhindji, kutya odhaalongwa nenge dhaakwashigwana yopomudhingoloko, ohadhi ya moskola omolwa ondhalate ndjoka ya weya.



Omukundu kofamili



“Okanona ngashingeyi ohaka ka wendwa olundji opo kaa ka kwatwe komukithi gwendambi,” Kleopas a hokolola, nokwa gwedhwa po kutya okuya koshipangelo huka otaku pula mondjato yaakwanezimo nogwo omukundu kuyo.

Kleopas okwa hokolola wo kutya okanona ota ka pitililwa po oshoka ohaka yi ka ka wendwe koshipangelo.

“Oku ka wendwa ohaku mu faulitha oskola, shoka tashi ka gumu iizemo ye pehulilo lyoshikako. Oshikwawo, otwa tila uunona kau li megameno poskola oshoka moskola omu na oshiponga shi li nuunona wetu."

Aakwashigwana yopomudhingoloko oya ti mwene gwombwa okwa kala he ya nombwa ye okuza 2010, konima sho e ya poskola yawo ongomwoopaleki okuza koskola yilwe.

"Oye omuniilonga ta kalele poskola. Otu uvite kutya oskola inayi tala koveta yiitekulwanamwenyo noyiinamwenyo tayi yalulwa momahala gaayehe,” Kleopas a hokolola.

Kleopas okwa gwedha po kutya nonande poskola kapu na ondhalate yolela , osho oshinakugwanith shooyene yiitekulwanamwenyo ye yi dheule yaa ye ya landule kiilonga nenge momahala gaayehe.



Oshinamwenyo oshi na ombili



Sho aatoolinkundana yaNamibian Sun ye ya poskola mEtitatu, Chief okwa monika ta endagula noskola nokudhana naaskola pethimbo lyokapoose ( okamulongo).

Oskola ndjika, oyi na aalongwa 418 , nomu na wo iinamwenyo yilwe , mwa kwatelwa iikombo noombwa oonkwawo

, omolwa ondhalate yoskola ya weya. Omulongwa ngoka aniwa a lika kombwa, okwa li a faula, oshoka okwa li a shuna ko koshipangelo a ka wendwe natango.

Omukuluntuskola okwa ti kutya ondhalate yoskola ya weya shimwe tashi etitha iinamwenyo yi gwayele moskola.



Ekwatathano lya kola



Angula okwa ti kutya okwa popya namwene gwombwa ihe ita vulu okukoleka oonkatu dha katukwa kondandalunde konima yoshiningwanima shokulika kombwa.

Okwa fatulula kutya omuniilonga gwoposkola nombwa ye oye na ekwatathano lya kola, nosho oshidhigu opo ombwa yi thigale kegumbo manga ye e ya kiilonga.

“Onda popya naye, nokwa lombwele ndje kutya nande oku kambadhale e yi edhilile megumbo, ombwa ohayi mono aluhe nkene tayi mu landulile koskola,” okwa ti.

“Oskola oya ninga oshitopolwa shomayangelo gawo, nolundji ohayi kondjo ngele oombwa onkwawo dhe ya po poskola,” Angula a gwedha po.

Mwene gwombwa okwa lombwele wo Namibian Sun kutya omulongwa okwa yagwa owala noina lumatwa ngaashi tashi hokololwa.

Iitekulwanamwenyo inayi pitikwa poskola

Sho a pulwa a tye ko sha, Omukuluntuwiliki gwelongo mOhangwena Isak Hamatwi okwa ti iitekulwanamwenyo inayi pitikwa okukala pooskola.

Hamatwi okwa ti ooskola nadhi kwashilipaleke aluhe kutya aalongwa naalongi oye li megameno.

“Shika nashi kale oshilongwa kelelo lyoskola; onkene otandi indile ooskola dhi kwashilipaleke kutya iitekulwanamwenyo inayi pitikwa pooskola. Iitekulwanamwenyo kayi shi yopooskola. Inayi kala pooskola.”