Ya ningi aakalelipo yelongo momudhingoloko gwawo

Ngoloneya gwaMusati , Erginus Endjala, okwa uvaneke kutya ota kala ta ningile omakonaakono eyo komeho lyaakiintu yomomudhingoloko gwaAmarika mbok ya tokola okushuna koskola mondondo onti-5 konima sho ya li ya thigi po ooskola uule woomvula omulongo.

Endjala okwa popi kutya okwa kumwa sho a lesha kombinga yaakiintu mboka yamwe ye na nookuli uunona, ihe oya tokola okushuna moskola mondondo dhopetameko moAmarika.

“Aavali taya yi koskola, oyimwe yomoonkundana tadhi uvitha nayi nda lesha miikundaneki. Ope na ompito kutya aavali mboka otaya ka ya mootundi pamwe naanona yawo.

Oskola ndjoka oya tungwa oomvula dha piti, ihe kandi shi kutya omolwashike inayi yambulwa po oomvula adhihe ndhoka,” ngoloneya a popi oshiwike sha piti, pethimbo a gandja omagano kooskola ngoka ga pewa ooskola 25 komunangeshefa Maria Nakale. Oskola ndjoka oya totwa po moomvula dho1960 kongeleka yaELCIN, Oskola yaAmerika momukunda oAmrika oshowo oskola ya Dr Ndeutala Angolo Primary School mOnghaanghaa odho owala ooskola tadhi adhika momudhingoloko na odhina owala ondondo yotango sigo ontine.

Sha landula etalelepo lyomupevi minista mOmbelewa yomupevi presidende , ngoka e na oshinakugwanithwa shokusila oshisho aantu yomihoko dhoka dha kala inadhi talika nale monakuziwa, Royal /Ui/o/oo, ngoka a talele po oskola ndjoka muJuli gwomvula ya piti, osha tokolwa opo oskola ndjoka yi kale nondondo sigo onti-8 nuumvo.

Namibian Sun okwa pititha onkundana kombinga yaakiintu mboka ya tokola okushuna moskola.

Omunamimvo 24 Saara Lukas ngoka e li othigwa na okuna okanona, okuli mondondo onti-6 nuumvo konima sho a piti ondondo onti-5, omvula ya piti.

Lukas okwa tokola okushina koskola kuyemwene, konima sho a li adhigi po oskola oomvula omu-10 dha piti, netokolo lye okushuna koskola olya hwahwamekwa ketalelepo lya ningwa kOmuprima Saara Kuugongelwa-Amadhila momudhingoloko gwaAmarika mo- 2015.

Yakwawo yalwe mboka ya shuna pamwe naye koskola, Ottillie Johannes, 20, ngoka a popi kutya okwa li adhigi po oskola mo-2006 na okwa shuna koskola omolwa omayele ngoka a pewa kaavali ye. Yamwe po mboka ya shuna koskola oLyidia Ipinge, 19, Josephina Gabriel 17 na Ottillie Jonas, 17, oshowo Leena Kashenye, 16.

Endjala okwa popi kutya ye, pamwe nombelewa yomupevi presidende taya konaakona aakiintu mboka.

“Aakiintu mboka oya nin ga aakelelipo yelongo momudhingoloko gwawo na otandi ke ya kwathela.

Molwaashoka oyeli oshitopolwa shaakwashigwana mboka ya kala inaya talika nale monakuziwa,ope na ooprograma dhoka dha nuninwa aantu mboka.

Mboka ye shi pondola okwaadha ondondo onti-10 otatu ka kwashilipaleka kutya oya ya koouniversiti omanga mboka inaye shi pondola tatu ya tumu kiiputudhilo yopaungomba,”

Sha landula sho oshifokundaneki shoNamibian Sun sha pititha onkundana yaakadhona yahamano mboka ya shuna koskola konima yoomvula 10, onkalo yoskola ndjoka oya kuthwa ko onga oshinima shopaulumomhumbwe netungo lyomagumbo gaalongi olya tamekithwa nale, omanga etungo lyoongulu dhoskola nomuhandjo nalyo li li pokutamekithwa.

Ombelewa yOmupresidende oya tokola okukala tayi gandja eyambidhidho lyoshimaliwa shooN$500 kehe omwedhi kuSaara Lukas nayakwawo yalwe yatano, mboka ya shuna koskola.



ILENI NANDJATO