UDF ita yambidhidha Geingob- Murorua

Amushanga-Ndjai gwOngudu yoUDF Dudu Murorua okwa ti shoka sha popiwa kOmupresident gwoUDF Justus //Garoeb opo iilyo yoUDF yi yambidhidhe Geingob pethimbo lyomahogololo gUupresidende mo-2014 ka shi shi etokolo lyongudu. Murorua okwa ti okwa yakula oongodhi odhindji okuza kiilyo yongudu oshiwike tuli mbyoka yahala okuuva shoka tashi inyenge mongudu yawo sha landula omapopyo gwomupresident //Garoeb . Oshikundaneki shoNamibia Sun osha lopota oshiwike sha piti kutya //Garoeb ngoka eli Omuleli gwaakwashigwana yomuhoko gwaDamara okwa pula aayambidhidhi naalanduli ye ya hogolole Geingob momahogololo taga ningwa momvula twa taalela. //Garoeb okwa lopotwa a popi kutya ongudu ye oya ningi etokolo okuya mbidhidha Geingob molwaashoka shoka Omupeha Presidende gwoSwapo oku li omupopi gwElaka lyoshiDamara. //Garoeb ngoka a kala Omuleli gwaaDamara oku tameka omvula yo-1982 oshowo Omupresidende gwoUDF oku tameka mo-1989 okwa ti aayambidhidhi yoUDF na ya yambidhidhe Geingob molwaashoka omuhoko omunene moshilongo gwAawambo ogwa lela oshilongo uule nethimbo. Murorua okwati omapopyo ga//Garoeb ogo paumwene na ka ge shi etokolo lyOngudu yoUDF. Ta tsikile ko ta ti okwa simaneka //Garoeb ngoka a tseyitha kutya otaka za koshipundi shuuleli woUDF konima yokongresa yongudu ndjoka kwa tegelelwa yi ningwe momwedhi Novemba nuumvo. "Oshikumungu shika osha pumbiwa okwiikundwa ponkatu adhihe dhelelo lyongudu niilyo ayihe yongudu oya pumbwa okuuvitwako kutya omolwashike yi na okuya mbidhidha Geingob pethimbo lyOmahogololo gUupresidende kwa tegelelwa gwa ningwe," Murorua a yelitha. Murorua okwa pula iilyo yongudu yawo yi ngungumane sigo ongudu ya yelitha kombinga gomapopyo ngoka. Pethimbo lyokongresa yOngudu yoUDF ndjoka kwa tegelelwa yi ningwe oshilyo shopaliamende Samuel Tjongarero naKansela nale gwOshikandjohogololo shaDaures , Apius Auchab otaya ka kondjela oshipundi shuupresidende wongudu. OPUWO NAMPA