‘Swapo okwa mono owala oomiliyona 6 dhiimaliwa yoFishcor’

OGONE TLHAGE

OVENDUKA

· Swapo N$6m

· Farm Goodhope N$975 000

· James Hatuikulipi N$500 000

· Erongo Clearing & Forwarding (ehangano lyaTamson Hatuikulipi) N$4m

· Tamson Hatuikulipi N$11.7m

· MH Property Project (ehangano lyaJames Hatuikulipi) N$8m

· Ndjako Investment CC (ehangano lya Otniel Shuudifonya) N$2m

· Phonhill Business Trust (ehangano lyaJames Hatuikulipi) N$14m

· Otwafika Logistics (ehangano lyaPius Mwatelulo) N$11m

· Maren de Klerk N$2.3m

Aafali yiihokolola kompangu mEtitano lya piti oya holola kutya Swapo okwa mono oomiliyona 6 dhomiimaliwa ya thika poomiliyona 55, mbyoka ya futwa okuza mehangano lyoFishcor ya nuninwa omahwahwameko gopapolitika, ya pitithwa kohi yomalalakano gepangelo, omanga mbyoka ya hupako ya hulile moondjato dhaalumentu taya tamanekwa moshipotha shoka.

Iimaliwa oya futwa okuza mehangano lyaFishcor okuya mehangano lyoDHC Incorporated, lyahahende, Maren de Klerk ngoka a yi ontuku.

Omunambelewa omukuluntuwiliki gwehangano lyoFishcor, Mike Nghipunya okwa popi mompangu kutya iimaliwa yanuninwa omahwahwameko gopapolitika gongundu Swapo gomomvula yo 2017 no 2018 oya futwa moakaunda dhehangano lyoDHC oshowo ehangano lyoSisa Namandje Incorporated.

Swapo okwa tindi a yakula iimaliwa mbyoka nonando iifuta yomo 2017 okwiinekelwa ya nuninwa omahwahwameko gopapolotika goHarambee, nomapulo ga kala komilungu dhakehe gumwe oshiwike sha piti oongoka kutya iimaliwa mbyoka oya futwa lye konima sho ya tulwa mooakaunda dhomahangano ngoka gaali giikwaveta.

Nghipunya, sho a ningilwa omapulaapulo kuLutibezi okwa yamukula kutya haye a li noshinakugwanithwa kutya iimaliwa mbyoka otayi ka pewa oolye konima sho ya tulwa mooakaunda dhomahangano ngoka gaali giikwaveta.

Nghipunya okwa tegelelwa a tsikile nokugandja uumbangi we, mboka tawu kuulikwa kepandja lyomalungula lyoshikundaneki shoNamibian Sun.

Sho a holola olopota yomakonaakongo ga ningilwa omwaalu gwoomiiyona 50 dhoka dha futwa mehangano lyoDHC Incorporated, Lutibezi okwa tseyithile Nghipunya kutya oshimalwa owala shoomiliyona hamano shapewa Swapo, kohi yomalalakano gepangelo.

Oshimaliwa shooN$975 000 osha futwa oFarm Goodhope moka minista nale Bernhardt Esau e na iipambuliko, N$500 000 oya pewa ehangano lyoInvestec Namibia lyaJames Hatuikulipi, oomiliyona 4 odha pewa Tamson Hatuikulipi okupitila mErongo Clearing and Forwarding, oomiliyona 11.7 natango odha pewa Tamson, oomiliyona 8 odha pewa James okupitila moMH Property Project, oomiliyona 2 odha pewa Otniel Shuudifonya okupitila moNdjako Investment CC, oomiliyona 14 odha pewa James okupitila moPhonhill Business Trust, oomiliyona 11 odha pewa, Pius Mwatelulo okupitila mOtuafika Logistics, oomiliyona 2.3 odha pewa hahende Maren De Klerk, ngoka a kana omanga oomiliyona hamano dha pewa ongundu yoSwapo.

Lutibezi okwa pula Nghipunya ngele okwa nongela ngaa kutya iimaliwa mbyoka inayi futwa Swapo onga oshitopolwa shomalalakano gepangelo ihe oya futwa aatamanekwa.

“Owa mona kutya iimaliwa oya futwa peni konima sho ya pewa DHC? Okuza muumbangi mboka to gandja iimaliwa mbyoka oya nuninwa omalalakano gepangelo ihe kuumbangi mboka tu napo Swapo okwa mono owala oomiliyona hamano, ngoye mwene ino landula wu mone ngele iimaliwa mbyoka oya futwa shili komalalakano gepangelo.”

Nghipunya okwa yamukula kutya kashi shi oshinakugwanithwa she, oku mona kutya iimaliwa oya futwa peni, konima sho ya futwa momahangano ngoka gwiikwaveta.

Nghipunya okwa popi kutya okwa li a mono elombwelo okuza komunashipundi gwoFishcor, James Hatuikulipi opo a fute iimaliwa okuza kuFishcor okuya kuSwapo.

Nghipunya ota kala modholongo a tegelela oshizemo sheindilo lye lyomboloha. Ota kalelwapo kuThabang Phatela, pa lombwelo lyaMilton Engelbrecht.