Shifeta a popi kombinga yompango ompe

Kohi yompango ndjoka ompe ,omadhigathano agehe taga ka ningwa moshilongo otaga ka gandja iishoshela koshiketha tashi ithanwa State Lotteries Trust Fund.Omageelo giifuta yomwaalu gwiimaliwa gwa thika poomiliyona 4 nenge okukala modholongo uule woomvula 20 otaga ka gandjwa kwiikwatelelwa kompango ompe.Natango ehangano epe otali ka tulwa miilonga na otali ka kala noshinakugwanithwa shokukondolola uudhano womashina goondjekipota, sho oshikondo shoka tashi kiikalekelwa okuza kuuministeli waatalelipo. Shoka osha hololwa pethimbo lyoshigongiilonga sha ningwa noshigwana mOvenduka, kombinga yompango yoLotteries Act of 2017 oshowo Gaming and Entertainment Control Act 2018. Pethimbo lyoshigongiilonga shoka Ominista yOmatalelelipo, Pohamba Shifeta okwa popi kutya ethimbo olya thikana opo ku ningwe 'shOmusaaaseli nashi ye kOmusaaseri'.Okwa popi kutya nonando oshikondo shomashina nomadhigathano kashi li miilonga pambelewa moshilongo, omadhigathano ogendji oga tulwa miilonga shaaheli pamulandu gwoompango.“Omathigathano ngoka oga kala taga kutha iimaliwa moshigwana unene okuza kaathigona,” Shifeta a popi.Okwa popi kutya epangelo oli wete kutya iiyemo ya monika momathigathano ngoka oya pumbwa tango okugandja eyambidhidho moshigwana kiinima ngaashi omaudhano, uunongo nomidhigululwakalo, uunongononi oshowo eyambulepo lyaanyasha.“Ompango ompe itayi ka pitika aanona opo ya kuthe ombinga shi na sha nuutekete wiinyangadhalwa yooskola nenge omahanga ga pya. Otashi ka kala epogolo lyompango ngele ooskola tadhi tumu aaona opo ya kalandithe uutekete. Monena aanona ohaya yi noombaapila opo ya vule okuhehela iimaliwa, shoka inashi pitikwa we.”Shifeta okwa popi kutya olutu ndoka talu ithanwa Lotteries Board otalu ka kondolola omathigathano oshowo edhano lyomashina noosinuka nenge okugandja omikandapitiko kwamboka taye shi ningi oshowo okutotapo State Lottery Trust Fund, opo ya gandje omapitiko kedhano lyomashina oshowo omadhigathano.Omukomeho gwoshikondo shomatalelipo, Teofilus Nghitila okwa popi kutya oshikondo shongeshefa yomashina oshowo omathigathano otashi ka mona omilandu omipe.Okwa popi kutya ongeshefa ndjoka ayihe otayi ka kala tayi kondololwa nokugandja woo iiyemo kepangelo.Okwa popi kutya taku ka gandjwa omageelo kwaamboka taya ka monika taya yi pondje omilandu dhompango ndjoka noondjindikila ndhoka tadhi ka tulwa po.“Elalakano kali shi okutula oshigwana modholongo ihe oku shi kutha mo mondholongo okupitila mekondjitho lyokuganitha po nokulandula oompango.”Sho a gandja omaiyuvo kombinga yoState Lotteries Act, Omukomeho gwomatalelepo nomashina muuministeli mboka, Sem Shikongo, okwa yelitha kutya omathimbo gokunana oshigwana nomwaalu omunene gwiimaliwa okupitila momadhigathano otaga thiki pehulilo, sho omwaalu gwopombanda gwomathigathano ngoka inagu pitikwa okuya pombanda yomiliyona yimwe komvula.Oshiholelwa ongaashi ethigathano epe lyaMTC lyo 888 SMS competition, moka aakuthimbinga ye na ompito yokusindana oshimaliwa sha thika poomiliyona 1.3, omwaalu ngoka gu li pombanda yomwaalu omupe ngoka tagu ka tulwa po. “Okrismesa oya hula,” Shikongo a popi. Paveta ndjoka ompe, omuntu kehe taka kutha ombinga mongeshefa yomashina nenge yomadhigathano ina pewa epitiko, nena ta ka pewa egeelo lyokufuta oshimaliwa shoomiliyona 4 nenge a tulwe modholongo uule woomvula 20.Omuntu ngoka taka kengelela mokuninga omalunduluko muutekete nenge omukanda gumwe gu na sha nongeshefa ndjoka otaka pewa egeelo lyokufuta oshimaliwa sha thika pooN$500 000 nenge oomvula ntano mondholongo.Ompango natango otayi utha egandjo lyegeelo lyoomvula 4 modholongo nenge okufuta oshimaliwa sha thika pooN$400 000, nenge omageelo agehe, kwaangoka taka monika ta landitha uutekete wekuthombinga methigathano lyontumba kokanona.Ngoka ta ka kutha ombinga momadhigathano ngoka nelalakano lyokwiimonena uuwanawa otaka pewa egeelo lyooN$200 000 nenge oomvula omulongo mondholongo nenge omageelo agehe.Pahapu dhaShikongo ompango ndjoka yoLotteries itayi ka totapo owala olutu lwelelo nekondololo lyomashina oshowo omadhigathano ga tumbulwa ihe otayi ka gandja oonkondo keuliko lyaakonaakoni mboka taya ka kwashilipaleka kutya ompangu otayi landulwa tuu nokugwanithwa po moshigwana.Kohi yompango ompe ndjoka tayi tulwa miilonga egongelo lyiimaliwa okutipila moobazaala, omalanditho nenge oondaanisa oyiikalekelwa.Natango egongelo lyiimaliwa ya nuninwa oshigwana nenge omaudhano, otaku pumbiwa epitiko li li pamushangwa okuza kolutu ndoka talu ka kondolola iinyangadhalwa mbyoka.Natango otaku ka pulwa ekonaakono lyoondokumende dhiiyemo dhomathigathano.ELLANIE SMIT

Shifeta a popi kombinga yompango ompe

Comments

Namibian Sun 2024-11-15

Please login to leave a comment

Shifeta a popi kombinga yompango ompe

Comments

Namibian Sun 2024-11-15

Please login to leave a comment

Login