Oshipangelo shaMbaye tashi futithwa

Moshipotha shimwe shuuhasha, omukiintu gwomondoolopa yaMbaye ota futitha uuministeli wuundjolowele oshimaliwa sha thika poomiliyona 2.3 omolwa eso lyomona ngoka a tika ombinzi sigo omeso, moshipangelo shepangelo mondoolopa ndjoka.

Omukiintu omunamimvo 20 okwa lopotwa a hulitha sho a tika unene ombinzi konima sho a pulumutha okanona inaka thika okupulumuthwa. Moombaapila dhompangu ndhoka dha gandjwa mOmpangu yoPombanda mOvenduka, Milka Lopez ota gandja uusama kaaniilonga moshipangelo shoka kutya oyo ya etitha eso lyomona, Margaritha Sophia Paula Nghinamwaami, ngoka a hulitha omasiku gane konima sho a pulumutha okanona muFebruali gwomvula yo 2017. Lopez, ngoka ta futitha uuministeli oshimaliwa shoomiliyonan 2.3 okwa popi kutya eso yomona olya etithwa kuuhasha waapangi oshowo oondohotola, moshipangelo shoka, mboka ya ndopa okupanga Nghinamwaami konima yepulumutho lye. Meindilo lye Lopez, okwa popi kutya omona okwa hulitha onga oshizemo sho eehama pethimbo a pulumutha ihe ina pangwa oshilalo shoka a ningi, pethimbo lyokupulumutha. Okwa popi kutya eso lyokamona olya li tali vulu okuyandwa ngele oondohotola naapangi oya li ya kutha ko oshinakugwanithwa shokupanga omukiintu ngoka konima sho a pulumutha. Moombaapila dhuumbangi moshipotha shoka, gumwe ngoka kwa tegelelwa a ka gandje uumbangi Omundohotola, Dr Nadine Agnew, ngoka a holola kutya otaka gandja uumbangi kutya konima sho a ningile omakonaakono olopota yuunamiti moshipotha shoka, okwa mono kutya epulumutho lyokanona kanakusa oshowo konima sho a pulumutha inali ningwa nawa naashoka osha etitha eso lyomukiintu ngoka. Agnew okwa popi kutya uuyelele otawu ulike kutya omundohotola ngoka a li miilonga ina ningila omukiintu ngoka omakonaakono nonando omukiintu okwa pulumutha okanona inaka thika okupulumuthwa. Okwa tsikile kutya Nghinamwaami okwa kwata kuupyakadhi wo post-partum haemorrhage omolwa oshilalo shoka a ningi pethimbo a pulumutha omutenya ihe okwa ka ningilwa owala omakonaakonio komundohotoa lwopotundi onti 21:30 nokufalwa koshitandelo potundi onti 22:00, nopethimbo ndyoka okwa adhika nale a loloka nokwa kwatwa cardiac failure, ombinzi ya londa oshowo a kanitha ombinzi oyindji. “Nakusa okwa kala uule woowili odhindji ina pangwa,”Agnew a popi. Uuministeli owa gandja etseyitho kutya otawu ka pataneka oshipotha shoka. Neyambidhidho okuza kuhahende gweSharen Zenda gwoLegal Assistance Centre (LAC), Lopez, mehokololo lye okwa popi kutya konima sho a thiki poshipangelo omutenya gwomasiku 12 gaFebruali nomona okwa adhika koshitheta nonkalo oyuuka kuuwinayi. Okwa popi kutya omona okwa kanitha ombinzi oyindji pethimbo a pulumutha ihe okwa ka konaakonwa owala komundohotola konguloshi nethimbo ndyoka okwa lata nale. Okwa popi kutya omanga omundohotola a koleke kutya okanona oka valwa inaka thika, okwa ndopa okukonaakona nakupuumutha. Konima yoowili odhindji sho omukiintu ngoka a pulumutha na okwa tsikile okutika ombinzi opo kwiithanwa omundohotoa, na okwa falwa koshitandelo opo a pewe ombinzi. Nghinamwaami ina penduka we. Okwa hololwa kutya okwa hulitha momasiku 19 gaFebruali konima sho a lundululilwa koshipangelo shaWindhoek Central Hospital. Omumwayinakadhona gwaNghinamwaami okwa holola kutya otaka gandja uumbangi kutya omanga mumwayina a li moshitheta, okwa ka konga aapangi opo ye mu kwathele na okwe ya a dha poshitaafula yeli moongodhi dhawo omanga yamwe taya lesha iifo. Okwa tsikile kutya omaihumbato gokwaahenako nasha oga hololwa woo komundohotola ngoka ina pula kombinga yonkalo yomupangwa konima sho okanona ke kapitililepo. Omugandji gumwe guumbangi omundohotola gwonkalo yopamadhiladhilo Shaun Whittaker, ngoka ta ga gandja uumbangi kutya konima sho kala tayi mekwatathano naLopez, okwa mono kutya okwa kwatwa kedhindokano lyombinzi omolwa eso lyomona. Uuministeli wuundjolowele owa tula po omusholondondo gwoonakugandja uumbangi mboka taya ka gandja uumbangi kutya omapopyo kutya eso lyomukiintu ngoka olya etitha kuuhasha, kage shi goshili. Omundohotola Obey Nhiwatiwa, ngoka a li miilonga moshipangelo shaMbaye esiku ndyoka Nghinamwaami a taambela moshipangelo okwa holola kutya otaka gandja uumbangi kutya, konima sho omukiintu ngoka a pulumutha okanona hoka inaka thika okuvalwa, okwa lombwelwa kaapangi kutya okuli nawa na okwa yi opo a ka gandje ekwatho kaapangwa yalwe oshowo iilonga yilwe onga omundohotola e li miilonga. Kongulohi lwopotundi 21:45 okwa dhengelwa ongodhi opo a ye meendelelo a ka gandje eyakulo lyopaulumomhumbwe. Okwa popi kutya Nghinamwaami okwa a li a tulwa ombinzi ihe lwanima okwa ganja elombwelo kutya na tumwe koshipangelo shaVenduka molwaashoka onkalo ye ndjoka ya li ya nayipala noonkondo.

JANA-MARI SMITH