Oshilando onkene tashi kundathana opo kulukilwe Winnie epandanda

Eindilo lya li lya ningwa opo limwe lyomomapandanda gaVenduka li lukilwe omukondjelimanguuko gwaSouth Afrika.

Winnie Madikizela-Mandela natango olya talikako onga eindilo ewanawa konima yoomvula 12 nkene eindilo ndyoka lya li lya ningwa kuamushanga nale gwoSwapo Party Youth League, Elijah Ngurare.

SPYL pethimbo ndyoka okwa li a shangele omukanda elelo lyaVenduka, opo mo 2006 ku lukilwe epandaanda Madikizela-Mandela. Ependafule ndyoka lyaSouth Afrika olya hulitha momasiku gaali gaApilili, na okwa fumbikwa mehuliloshiwike lya piti.

Mayola gwaVenduka, Muesee Kazapua okwa zimine naamboka taya pula opo Winnie Madikizela-Mandela a lukilwe epandaanda lyaandjetu, ta popi kutya eindilo ndyoka oli na okupita manga mokomitiye yowina ndjoka hayi ungaunga neluko lyomapandanda goshilandopangelo.

“Otashi vulu okuningwa ihe eindilo oli na manga okuukithwa kokomitiye ndjoka. Ehangano kehe nenge omuntu oku na uuthemba opo a pule epandanda li lukilwe omuntu gwontumba. Otandi zimine neindilo po ku lukilwe epandanda

Madikizela-Mandela omolwa eyambidhidho lye kekondjelomanguluko,” Kazapua a popi.

Ngurare mo 2006 okwa gandja eindilo ndyoka kelelo lyaVenduka, nomo 2014 natango oSPYL okwa dhimbulukila elelo kombinga yeindilo ndyoka, oshowo okulukulula epandanda lyaBismarck li lukilwe omukondjelimanguluko Simeon Kambo Shixungileni.

Shixungileni okwa li komanda omutiyali gwaakwiita yoPLAN, mboka ya kutha ombinga olugodhi lwotango lwekondjelomanguluko pOngulumbashe momasiku 26 gaAguste, 1966. Omaindilo agehe ngoka oga li ga ukithwa kOmunambelewa omukuluntu gwelelo lyaVenduka pethimbo ndyoka, Niilo Taapopi.

“Sho twa li twa ningi endilo opo Madikizela-Mandela, a lukilwe epandanda oya li ya popi kutya eindilo lyetu otali ukithwa kokomitiye ndjoka hayi ungaunga neluko lyomapandanda. Oya li ya popi kutya natango otaye shi kundathana. Osha kutha ethimbo ele na otwa landula ko opo tu pule. Omvula ya piti otwa pula elelo epe na oya popi kutya naatango otashi kundathanwa. Omupya omunene okutya ina mona epandanda ndyoka a lukilwa, nenge tu mu hiye,” Ngurare a popi.

Ngurare okwa popi kutya

Madikizela-Mandela okwa ndalapatele ombepo yuumwayinathana muAfrika. Amushanga gwoSwapo Party Women's Council, Eunice Iipinge okwa popi kutya oompangela odha li metifa opo ku lukilwe Madikizela-Mandela epandanda moNamibia, sha landula elombwelo lyagandjwa kOmupesidende Hage Geingob mo 2015.

Madikizela-Mandela okwa pewa omapapa ngaashi Most Brilliant Order of the Sun oshowo First Class ndyoka a pewa kuGeingob mo 2015, omolwa eyambidhidho lye kekondjelomanguluko lyaNamibia mo 2015.

Madikizela-Mandela ina vula okukala poshituthi shoka sha li sha ningwa omvula ndjoka, naGeingob okwa longitha ompito ye fumbiko lye okuhiya oyana opo ye ye moNamibia nokutaamba ko omapapa ngoka.



OGONE TLHAGE