Omulilo omutilithi onkene tagu tsikile

Ofamili yaMukwiilongo moshitopolwa shaMusati onkene tayi tsikile nokumona iihuna omolwa omulilo tagu limbililike ngoka tagu tsikile nokuhanagulapo omaliko gofamili ndjoka.

Omasiku ga piti natango egumbo lyofamili ndjoka olya hwikwapo komulilo ngoka gwa hanagulapo iinima ayihe mbyoka yali ya pewa omagano aanegumbo mboka kaanamutimahenda oshowo kelelo lyoshitopolwa shawo, shalandula omulilo ngoka gwa hwikepo egumbo lyawo momasiku 18 gaNovemba.

Ofamili ndjoka oyi li momalimbilio omolwa omulilo ngoka gwa faalela woo muJuli omwenyo gwomukokele gwomimvo 88.

Kansela gwoshikandjohogololo shaTamanzi. Johannes Iiyambo okwa koleke oshiningwanima shoka koshifokundaneki shoNamibian Sun, ta popi kutya iinima ayihe mbyoka yali ya pewa omagano ofamili ndjoka ngaash iikulya, iinguma, iizalomwa oya hanagulwapo komulilo. Iiyambo okwa popi kutya monena ofamili ndjoka oyi li owala kohi yomuti pondje yegumbo lyawo omolwa uutile. Kansela okwa popi kutya shoka taya vulu okuninga ngashiingeyi okulongekidha opo ofamili ndjoka yi ningilwe omagalikano mEtitatu twa taalela. Albertina Iita Mukwiilongo, omonakadhona gwaChristofina Shetunyenga okwa popi kutya omulilo ngoka gwa holoka omasiku ngaka ogu li omuti 12 tagu holoka konima nkene gwa holoka lwotango momasiku gahamano gaJuli nuumvo. Okwa popi kutya momasiku 24 gaNovemba okwa li ku na iikogo na oya li ye shi omvula na oya tokola okutula iinima ayihe mbyoka ya pewa omagano mondunda yimwe, konima owala yethimbo oya mono olwithi talu zi mondunda ndjoka, niinima ayihe oya hanagulwapo.

ILENI NANDJATO