Omakonaakono ngoka taga ningilwa Swapo ga tameke

Ø Omakonaakono ngoka otaga ningwa uule woomwedhi ndatu

CATHERINE SASMAN

Omakonaakono ngoka otaga tameke pambelewa mesiku lyotango lyomwedhi Sepetemba nuumvo sigo omasiku 10 gaDesemba.

Shoka osha tseyithwa kookomitiye tadhi ithanwa Committee of Parents oshowo Truth and Justice Committee dhoka tadhi longele kumwe momakonaakono ngoka.

MuSepetemba gwomvula ya piti, ookomitiye ndhoka odha popi kutya okwa pumbwa okuningwa omakonaakono molwaashoka ongundu yoSwapo oya tindi okuyamukula kombinga yaaNamibia mboka yakana pethimbo lyekondjelomanguluko. Omolwa etindo ndyoka, ookomitiye ndhoka odha popi kutya otashi ulike kutya ongundu oyi na shoka tayi holole.

Ongundu yoSwapo okwa hololwa ya tindi woo okupopya kutya openi pwa fumbikwa oontauki dhaNamibia ndhoka ya dhipagelwa mekondjelomanguluko.

Mboka otaya nyana nokukonga omayamukulo omolwa omadhipago ga kiinahenda ngoka ganingwa ngaashi taga tumbulwa kutya German imperialism, Bondelswarts mo- 1922, omadhipago ga ningilwa AaHerero nOobastela mo-1925, Old Location mo- 1959, Cassinga mo- 1978, oshowo omadhipago goontauki ga ningwa kuSwapo pethimbo lyekondjelomanguluko pokati ko-1966 sigo 1989.

Omapulo nomakonaakono ngoka oga kwatelamo omapulaapulo gongundu yaaKenya ndjoka ya tulwa miipandeko moomvula dho-1960, oshowo aakwiita yoPLAN naaleli yoSwapo Youth League mboka ya tulwa miipandeko moomvula dho-1970, oshowo Break the Wall of Silence organisation, Forum for the Future (FFF), NamRights, oshowo South African Khoisan Movement.

Omahangano gamwe ga pulwa opo ga kale petamekitho lyomakonaanoko ngoka ongashi epangelo lyaNamibia, omukalelipo gwaGermany, Angola, Zambia, Kenya oshowo oongeleka dhaNamibia, Olaf Palme Foundation, Konrad Adenauer Foundation, Friedrich Ebert Foundation oshowo Hanns Seidel Foundation.

Aapopi petamekitho lyomakonaakono ndyoka tali ningilwa moGateway Conference Centre moKhomasdal okutameka potundi 10:00 mo 1 September, otaya ka kala Erica Beukes (Omunashipundi gwoCommittee of Parents), Phil ya Nangoloh (Omukomeho gwoNamRights), Zanzile Khoisan (Omushangi nomutoolinkundana omukuluntu moCape Argus), aapopi yaali yalwe opo taya ka tseyithwa.

Omakonaakono otaga tamekithwa nokugandja omahokololo goombangi okuza koongundu ndhoka dha gumwa.

Omapulaapulo otaga tameke mesiku lyotango lyaFebruali omvula twa taalela nokomitiye ndjoka otayi ka talela po oondoolopa ngaashi Ovenduka, Tsumeb, Otjiwarongo, Oshakati , Ondangwa, Rundu, Katima Mulilo, Gobabis, Walvis Bay , Swakopmund, Mariental, Keetmanshoop , Karasburg, Lüderitz, oshowo Platfontein moSouth Africa.

Omapulaapulo ngoka ogeli oshizemo shokatokolitho ka ningwa muSepetemba gwomvula ya piti moka okomitiye yoCommittee of Parents oshowo ndjoka yoTruth and Justice Association ya pula opo ku ningwe omapulaapulo omolwa iimbuluma mbyoka ya ningwa kuSwapo.

Ookomitiye ndhoka odha popi kutya omaumbangi ngoka taya longitha ogiikwatelela kutya kape na shoka sha ningwa po pambelewa omolwa omadhipago ngoka na inaku popiwa kutya ooluhupe oyeli peni.

United Nations Committee Against Torture muDesemba gwo2016 oya yi mekwatathano nepangelo lyaNamibia tayi pula opo ku ningwe omakonaako omolwa iimbuuma mbyoka ya ningwa pethimbo lyekondjelomanguluko mwa kwatelwa oshikumungu shepangulo lyaakwashigwana mboka taku popiwa kutya oya kambadhala okukutha ko oshitopolwa shaCaprivi (Zambezi) kuNamibia.

Ongundu yoKhoisan Movement of South Africa nayo otayi longekidha omaumbangi gawo omolwa omadhipago gakiinahenda ngoka ga ningilwa gAayelele mboka ya dhipagwa moNamibia oshowo Angola.