Nicanor a pewa iilonga iipe

Ombaapila ya za kOmupresidende Hage Geingob ndjoka ya holola euliko lyomupevi minista nale gwoshikondo shoonakulwa aakulu, Hilma Nicanor onga omugandjimayele, oya e ta oompata kombinga yeitulemo lyomupresidende okushunitha pevi elongitho lyiimaliwa yepangelo moondjambi.

Egandjo lyompito ndjoka yiilonga kuNicanor, olya yi pondje ekotampango lyoshilongo ndyoka tali pula Nicanor a kale ita longele epangelo ngele okwa hogololwa a ye momusholondondo gwaamboka taya kaya momutumba gwopashigwana momvula tayi ya, tashi landula omahogololo gopashigwana ngoka taga ningwa omwedhi nguka.

Euliko lye olya ningwa okuza mesiku lyotango lyaNovemba sigo 20 Maalitsa 2020. Euliko ndyoka lyaali paveta olyokukwashilipaleka kutya Nicanor oku na iilonga omanga inaya momutumba gwopashigwana momvula twa taalela.

Nicanor okwa ulikwa a ninge omugandjimayele gwowina komupevi presidende, Nangolo Mbumba kombinga yiikumungu yoonakulwa aakulu.

Onzo yimwe oya holola kutya Ncanor ota tsikile nokukala omupevi minista goonakulwa aakulu, kohi yeuliko lyomugandjimayele.

Okwa holoka omapopyo kutya euliko ndyoka otali holola uulingilingi tawu longwa mepangelo nokugandja iilonga kookume nookomrade, omanga aakwashigwana yamwe taya mono iihuna koluhepo omolwa ondjele yokwaahena iilonga ndjoka yi li pombanda moshilongo.

Omuleli gwongundu yoPDM, McHenry Venaani okwa nyana onkatu ndjoka ya katukwa kuGeingob okuulika Nicanor, omanga ta popi kutya oshilongo osha pumbwa okushunitha pevi ondjele yiifuta yoondjambi dhaaniilonga yepangelo. Ondjambi yaNicanor pauyelele mboka wuli mombaapila ndjoka, oyi li pooN$48 000, ondjambi ndjoka a li ha kwata sho e li omupevi minista.

Namibian Sun okuuvite kutya yamwe po mboka yali ya pulwa ya ze miilonga nayo otaya pewa oompito dhiilonga dhomonanguwi opo ku kwashilipalekwe kutya oye na oondjambi muule woomwedhi ntano dhika.

Konyala aakwaSwapo 17 oya zi miilonga okugwanitha po ontopolwa 47 yekotampango na oya tumbulwa komadhina kutya omunashipundi gwoNational Council, Margaret Mensah-Williams, omunashipundi gwoNational Youth Council, Mandela Kapere, kansela melelo lyaRundu, Verna Sinimbo, Omukomeho melelo lyondoolopa yaShakati, Werner Iita, kansela melelo lyaMaheke, Phillipus Katamelo oshowo kansela melelolyaMbaye, Hafeni Ndemula.

Omunongononi gwonkalo yopolotika, Ndumba Kamanyah okwa nyana etokolo ndyoka ta popi kutya otali ulike onkalo yegandjo lyiilonga owala kookomrade.

Omupopiliko gwombelewa yomupresidende, Alfredo Hengari okwa popile euliko ndyoka kutya olya ningwa palandulo lyompango.



OGONE TLHAGE