Netwerk se wen-onnies bekend gemaak

Jeanette Diergaardt – Twee onderwysers van onderskeidelik Grootfontein en Walvisbaai het Netwerk se nasionale kompetisie gewen.Juffrou Sarieke Rentel van Grootfontein en mnr. Colin de la Harpe van De Duine Sekondêre Skool in Walvisbaai het die Dankie Meneer/Juffrou-kompetisie gewen wat deur Netwerk aangebied is.In hul strewe om Afrikaans lewendig en gesond te hou, eer Netwerk onderwysers wat leerlinge inspireer om hul drome na te jaag en hul volle potensiaal te bereik.Me. Elizma Theron, die bestuurder van Netwerk, sê die impak van onderwysers op kinders se lewens word onderskat.“As kind het jy dalk nooit kans gekry om dankie te sê nie, of jy besef dalk eers later in jou lewe watter effek iemand op jou lewenspad gehad het,” sê Theron. Volgens haar wil hul organisasie graag seker maak die liefde vir Afrikaans word in kinders aangewakker.Elvira Hattingh van Grootfontein het vir Rentel benoem, omdat sy Hattingh se kennis van FAK-liedjies lewendig hou en 'n liefde daarvoor gekweek het. Volgens Hattingh het Rentel gereeld op haar klavier losgetrek met ou bekende Afrikaanse liedjies soos “Bobbejaan klim die berg” en “Suikerbossie. “As dit nie vir haar was nie, weet ek nie waar ek al dié liedjies sou kon leer nie,” sê Hattingh. “Sy het my liefde vir Afrikaans aangewakker en dit het direk bygedra dat ek vandag 'n joernalis is.”Rentel het ook 'n passie vir die trekklavier gehad, maar het ongelukkig haar arm in 'n motorongeluk beseer.De la Harpe is deur Allistaire van der Merwe benoem, wat hom geïnspireer het om ook 'n wetenskaponderwyser te word. Volgens Van der Merwe het De la Harpe sy liefde vir wetenskap so aangewakker dat hy aan wetenskapskoue kon deelneem en verskeie lande kon besoek. Van der Merwe bewonder tot vandag toe De la Harpe en sy gunstelingonderwyser is tans sy kollega. Volgens Van der Merwe toets De la Harpe gereeld sy kennis. “Die liefde vir die vak wat mnr. De la Harpe by my gekoester het, het soveel deure vir my oopgemaak,” het Van der Merwe gesê.• Netwerk is 'n organisasie met die doel om die belange van Afrikaners in Namibië te bevorder. Die organisasie het 'n argief en biblioteek beskikbaar wat hulde bring aan Afrikaans en as 'n bymekaarkomplek vir Afrikaanssprekendes dien.Netwerk se strewe is om Afrikaanssprekers in die land te bedien en bydraes tot die ontwikkeling en groei van Afrikaans te lewer.Verder beoog hulle om Afrikaanssprekendes te bemagtig en hul welvaart te bevorder. Volgens Theron sal die kompetisie 'n jaarlikse instelling word. Vanjaar beplan die organisasie om sy kompetisie teen November af te sluit sodat die wenner voor die jaareinde aangekondig kan word.FOTO’sAllistaire van der Merwe (links) het mnr. Colin de la Harpe benoem.Elvira Hattingh saam met juffrou Sariekie Rentel. Foto’s verskaf

Netwerk se wen-onnies bekend gemaak

Comments

Namibian Sun 2025-04-04

Please login to leave a comment

Netwerk se wen-onnies bekend gemaak

Comments

Namibian Sun 2025-04-04

Please login to leave a comment

Login