Mulunga a galukile kiilonga

Nonando opwa kala oolopta kutya omukomeho gwehango lyoNational Petroleum Corporation of Namibia, Immanuel Mulunga okwa li a kuthwa manga miilonga nenge a pewa efudho lyowina ngaashi omunashipundi gwoshiputudhilo shoka, Patrick Kauta a li a popi , otashi ulike kutya omulumentu ngoka ta popilwa iipotha yuulingilingi natango oye ta kwatele komeho oshiputudhilo shoka. Mulunda okwa tameke iilonga mOmaandaha na okwa ulike onkalo yi li nawa pethimbo a ningwa naye oonkundathana koshifokundaneki shoNamibian Sun.

Okwa popi kutya ye inatulwa mefudho lyowina nenge a kuthwe miilonga pakathimbo.

“Shoka tandi vulu okutya ooshoka kutya ngame inandi kuthwa miilonga. Onda galuka owala okuza kefudho lyandje lyokomumvo naashoka osho owala tandi vulu okupopya pethimbo ndika,” Mulunga a popi.

Sho a popi kombinga yoshikumungu shoka Ominista yIiputudhilo yEpangelo, Leon Jooste okwa popi kutya kasha li sha pumbiwa okutula Mulunga pevi sho Kauta a ningi eindilo opo Mulunga a tulwe mefudho lwowina. Jooste okwa popi kutya oompangela dhekutho miilonga pakathimbo lyaMulunga ndhoka lyali tadhi pangelwa kelelo lyaNamcor otadhi gandja ethano ewinayi kehangano













Oompangela okumona omayamukulo okuza kuKauta odha ndopa sho ina yamukula. Kauta natango ina gandja uuyelele kombinga yoshizemo shomakonaakono ngoka ga ningilwa. Omakonaakono ogali ge na okukala ga manithwa mehuliloshiwike lya piti.

MuDesemba Kauta okwa li a popi kutya Mulunga ota ningilwa omakonaakono pamwe nomunambelewa gwoinformation technology executive, Bonifatius Konjore, nomakonaakono ngoka otaga kala ga manithwa momasiku 20 gaJanuari.

Kauta okwa tseyithile oshikundnaeki shoNew Era kutya, oshitopolwa shotango shomakonaakono ngoka osho owala sha manithwa.

Mboka oya tulwa aniwa mefudho lyowina opo ku vule okuningwa omakonaakono ge na sha nokondalaka yongushu yoomiliyona 2.2. Oshiputudhilo osha ulike ehangano lyoDeloitte olyo li ninge omakonaakono ngoka.

OGONE TLHAGE