Epangelo lyapopile Nangolo

Oolugodhi olululu kombinga yaangoka ta ningi omukwaniilwa gwaNdonga olwa hulu mOmaandaha, sho epangelo lya popile Fillemon Shuumbwa Nangolo a ninge omukwaniilwa omuti 19, gwelelo lyaNdonga.

Nangolo okwa yi pehaala lyomukwaniilwa nale Immanuel Kauluma Elifas, ngoka a hulitha muMaalitsa nuumvo.

Nangolo (44) okwa kala nale a hogololwa kuElifas onga omulanduli gwe momvula yo 2002, ihe nonando ongaaka ofamili yAawa oya kala tayi kondjithathana mehogololo ndyoka lya ningwa, nongundu yimwe oya kala yahala Konis Kalenga, oye a ninge omukwaniilwa.

Ominista yOmalelo gOondoolopa nIitopolwa Peya Mushelenga okwa popi kutya eindilo lyaKalenga opo a ninge omukwaniilwa gwaNdonga inali pita omulandu ngoka hagu longithwa uuna taku talika komaindilo ngoka.

Momasiku 14 gaApilili okwa ningwa elangeko lyopamuthigululwakalo ndyoka lya ningilwa Nangolo onga omukwaniilwa omupe gwaNdonga, lya ningilwa pombala ye mOnambango omanga ongundu yimwe yofamili yaakwaniilwa ya langele Kalenga.

“Oshili kutya onda zimine eindilo lyaNangolo. Oto vulu owala okukala nomukwaniilwa gumwe na onda zimine owala omukwaniilwa gumwe. Ompango oya gandja kutya omuningi gweindilo okwa pumbwa okupita onkatu yontumba meuliko lye, nasho omaindilo ngoka ga thiki kungame, lyaNangolo olyo lya zimo,” Mushelenga a popi.

Omalongekidho ogeli metifa opo ku ningwe elangeko koshipundi pambelelwa lyaNangolo ndyoka tali ningilwa mOnambango momasiku 29 gaJuni.

Pethimbo onkundana ndjika ya nyanyangithwa, inaku vula okumonika gumwe gwomaakokele mofamili yaakwaniilwa, Selma Gwanandjokwe Sheyavali, opo a tye sha sho e li gumwe gwomwaamboka taya popile Kalenga.

Aaleli yelelo lyaNdonga mboka ya tambulwapo papangelo, na oyendji otaya popile Nangolo, inaya vula woo okumonika molwaashoka oya li moshigongi.

ILENI NANDJATO