Ekuto miilonga lyaatseyinawa aavalelwa mo lyakalekwa

Uuministeli owali tawu kongo AaNamibia mboka ye na owino megandjo lyomadheulo ngaashi muunamapya, okutunga, okuhonga iipilangi, okufikila, okuhondja, okompiuta nokulonga moombelewa okutumbulapo owala yimwe po.Mboka andola otaya ka kutwa miilonga onga aadheuli uule woomwedhi ntano.Oshifokundaneki shoNamibia osha li sha tseyithilwa omwedhi gwa piti sho sha talele po endiki ndyoka lyomadheulo kutya omadheulo oga kalekwa omolwa ompumbwe yiiyemo.Aadheulwa mendiki moka oya popi kutya oya mono owala omadheulo ngoka ya pewa kiilyo yetanga lyegameno, molwaashoka kape na iimaliwa yokukuta miilonga aadheuli.Pethimbo ndyoka amushanga muuministeli waanyasha, Emma Kantema-Gaomas okwa tindi omapopyo ngoka moshinyolwa shiikundnaeki shoka a tula moshifokundaneki , moka a popi kutya endiki ohali gandja omadheulo giitopolwa yopaali.Okwa popi kutya omadheulo gotango oongoka ga gandjwa kiilyo yetanga lyegameno, ano omadheulo gopashigwana oshowo omadheulo omatiyali ngoka guunongo.Okwa popi kutya omadheulo ngoka gopashigwana oga manithwa kiilyo yEtango lyEgameno, omanga uuministeli wiipyakidhila okukuta miilonga aadheuli Aanamibia, opo ya tameke nokugandja omadheulo guunongo.“Omadheulo guunongo oga pumbwa ekuto miilonga lyaadheuli mboka ya pumbwa okukala taya futwa omolwa iilonga yawo. Etseyitho lyopashigwana olya tulwa miikundaneki nomulandu gwokukuta miilonga aadheuli mboka otagu ka ningwa mbala. Aadheuli yoshitopolwa oshitiyali dhomadheulo ngoka otaya ka ya mbala kendiki nokugandja omadheulo ngoka kaadheulwa,” Kantema-Gaomas a li a popi.Okwa tsikile kutya ekuto miilonga lyaadheuli otali ka kala lyopakathimbo molwaashoka aadheuli mboka otaya ka longwa owala uule woomwedhi ntano, ndhoka taku ningwa omadheulo ngoka, naanyasha mboka ye na uulongelwe oyo taya ka talika yo yaka vule okugandja omadheulo.Nonando ongaaka, oshiwike sha piti, uuministeli owa kaleke etseyitho ndyoka lya li tali popiwa kuKantema-Gaomas.Onzo yi shi okwiinekelwa ola lombwele oNamibian Sun kutya, endiki lyaBerg Aukas olya kala kali na aadheuli, uuministeli wa ndopa okwaadha etsokumwe naaiyambi ya za koNigeria opo ya dheule aanyasha yaNamibia miikondo ya yooloka. Okwa lopotwa kutya endiki ndyoka olya hulitha po okutaamba aadheulwa aape mo 2015 sigo omo 2016 sho Omupresidende Hage Geingob a pitika egandjo lyoomiliyona 11, 3 okuza kokakomisi koSocial Security Commission opo ku ka dheulwe aanona yaakondjelimanguluko.Epititho lyiimaliwa mbyoka okuza koSSC olya e ta omaiyuvo ga yoloka moshigwana, sho iimaliwa mbyoka yali yi na okulongithwa mokugandja omadheulo kaanyasha mboka kaye na iilonga, oshowo okugandja omayambidhidho gokwiilongitha kaanyasha yomiiputudhilo yopombanda.Epangelo olya li lya popi pethimbo ndyoka kutya iimaliwa otayi ka longithwa mokudheula aanona yavalelwa mekondjelomanguluko yathika pe 1 000, mendiki lyaBerg Aukas oshowo mendiki lyaDu Plessisplaas moshitopolwa shaMaheke, nokukala taku gandjwa omayambidhidho goshimaliwa sha thika pooN$375 komwedhi, kaanyasha mboka.Kombinga yetsokumwe lyaadheuli aakwashigwana yaNigeria ndyoka inali lelepekwa, Kantema-Gaomas okwa li a popi kutya nonando oshilongo osha pandula omolwa eyambidhidho okuza kuNigeria, okwa pumbwa okutalika konkalo yokwaahena iilonga ndjoka yi li pombanda mokati kAaNamibia, unene kaanyasha mboka ye na oonzapo momailongo ngoka gomadheulo gopaungomba.Monena aanyasha mboka ya valelwa mekondjelomanguluko, yeli po 793 oya manitha omadheulo gawo gopaungomba momandiki ga yoloka ngaashi ndyoka lyaBerg Aukas, Simon Mutumba Police Training College oshowo Namibia Institute for Mining Technology (NIMT).Natango aanyahsa yeli po 299 otaya ningilwa omadheulo mendiki lyaBerg Aukas.Sho a ningilwa omapulo kombinga yetseyidho ndyoka lya kalekwa ngashiingeyi, Kantema-Gaomas okwa yamukula kutya ekaleko ndyoka oshinima shomeni sha etithwa kiikumungu ya yooloka yi na sha neziminino okuza kokomisi yaaniilonga yepangelo yoPublic Service Commission.ILENI NANDJATO

Ekuto miilonga lyaatseyinawa aavalelwa mo lyakalekwa

Comments

Namibian Sun 2025-04-03

Please login to leave a comment

Ekuto miilonga lyaatseyinawa aavalelwa mo lyakalekwa

Comments

Namibian Sun 2025-04-03

Please login to leave a comment

Login