Covid-19 druk toerismebedryf se keel toe

Zoë Veldsman Byna ’n jaar nadat die nuwe virus in Wuhan, China, uitgebreek en wêreldwyd versprei het, is die werklikhede van die langtermyn gevolge steeds besig om in te sink. Nie net het die coronavirus die wêreld se manier van funksioneer en lewensomstandighede drasties verander nie, maar dit het die ekonomie tot stilstand geruk en groot onsekerheid vir die toekoms geskep.Een bedryf wat drasties hieronder ly, is die toerismesektor. Namibië maak staat op toerisme vir ongeveer 10.2% van die land se bruto binnelandse produk. Te midde van die reisbeperkings met buitelandse lande asook streng voorsorgmaatreëls wat binnelands geld, was daar vir byna die hele jaar feitlik geen toeriste in Namibië nie. Nie net het hierdie verliese talle mense werkloos gelaat nie, maar het dit ook verskeie gevolge op die natuur en ekonomie gehad.Julie word beskou as die eerste maand van Namibië se piekseisoen vir toerisme. Sestig persent van Namibië se kamerbesettingskapasiteit was byvoorbeeld laasjaar dié tyd beset, in vergelyking met slegs 7.34% in Julie vanjaar, volgens die hoof uitvoerende beampte van die HAN (Gasvryheidsvereniging van Namibië), me. Gitta Paetzold.Die eienaar van Ondundu Etosha Lodge, mnr. Johann Veldsman, deel ook die effek van Covid-19 op sy besigheid gehad het.“Eerstens het ons ’n 100% kansellasiekoers beleef en die besigheid het totaal tot stilstand gekom. Te danke aan ’n noodfonds wat in die besigheid se beginjare gestig is, het ons darem genoeg geld tot ons beskikking gehad om 12 maande lank op die noodbegroting te werk sonder dat ons enige werknemer hoef af te dank. “Intussen het ons ’n groot bemarkingsveldtog vir die plaaslike mark van stapel gestuur. Alles is aangepas om aan die nuwe regulasies te voldoen.”Die effek van Covid-19 word nie net direk op akkommodasie en by toeristebestemmings opgemerk nie. Taksidermiste wat op die oorsese mark staatgemaak het, is byvoorbeeld ook sonder werk gelaat.“Talle kere as ons in die veld is, het ons bewyse van stropery en skelm jag gekry en dit aangemeld. Sonder gereelde beweging in die veld vrees ek dat stropery onbeheersd gaan voortduur,” sê mnr. David Brown, ’n beroepsjagter en gereelde besoeker aan Namibië.Namibië het altesame 86 gemeenskaplike bewaringsareas wat deur verskeie inheemse volke beheer en bestuur word. Dié bewaringsareas dra ’n belangrike deel tot die land se toerisme by en dien as inkomste vir die inwoners. Sonder inkomende toeriste word hierdie gemeenskappe sonder hul hoofbron van inkomste gelaat. In gevolgtrekking kan gesê word dat alle mense en besighede betrokke in die toerismebedryf swaar onder Covid-19 ly en derhalwe hoop op beter jare van besigheid in die toekoms.

Covid-19 druk toerismebedryf se keel toe

Comments

Namibian Sun 2025-04-03

Please login to leave a comment

Covid-19 druk toerismebedryf se keel toe

Comments

Namibian Sun 2025-04-03

Please login to leave a comment

Login