Amupanda nayakwawo yatatu natango inaya shunwa miilonga

Aanyasha mboka oyo Elijah Ngurare, George Kambala, Job Amupanda na Dimbulukeni Nauyoma mboka ya tidhwa mongundu omvula ya piti,ihe nuumvo oya sindana po oshipotha shompangu, ndjoka ya gandja etokolo opo ya shunwe mongundu molwaashoka etidho lyawo ka lya li paveta.

Ngurare okwa li amushanga gwewawa, omanga Amupanda a kala omupopiliko gwoSPYL oshowo amushanga gwomauyelele okutameka o-2012.

Nauyoma okwa kala amushanga gwoshikandjohogololo shaTobias Hainyeko, omanga Kambala a kala amushanga gwoshikandjohogololo shaSamora Machel.

Nonando ompangu oya gandja elombwelo opo li shune mongundu oonakutidhwa mboka, inayi gandja elombwelo opo ya shunwe pomahala gawo giilonga mpoka.

Omupopiliko gwOngundu yoSwapo, Helmut Angula okwa popi kutya ke na uuyelele ngele ongundu oya ninga etokolo kombinga yeshuno miilonga lyaanyasha mboka pomahala gawo ngoka ya kala nae omanga inaya tidhwa.

Lyopokati mpoka amushanga gwomauyelele moKavango East, Peter Kashumali okwa popi momukanda gwiikundaneki ngoka a pititha kutya konima nkene mboka ya ne ya kuthwa miilonga ewawa ndyoka olya kala nuupyakadhi wokugwanithwa po iilonga yawo ngaashi nale.

Oshilyo shelelo lyoSPYL mOshitopolwa shErongo, Reinhold Shitwikineni okwa popi kutya okwa uvu omukanda gwiikundaneki ngoka gwa pitithwa moKavango East na ota tsu kumwe nago, na okwa pula elelo lyoSwapo li shune miilonga aanyasha mboka.

Namibian Sun okwa kambadhala okuya moonkundathana naanyasha mboka ya tidhwa opo ya gandje omaiyuvo gawo, konima nkene oshipotha shompangu sha hulu.

Sho oshifokundaneki sha popi naNgurare, okwa popi kutya ye okwiitula miilonga ye onga omunambelewa gwoQuality Assurance Coordinator moshiputudhilo shoUniversity of Namibia.

Amupanda, Nauyoma naKambala mboka ya tseyika onga aakomeho yoAffirmative Reposition (AR) oya popi kutya oyi itula mo mokukwashilipalekwa kutya okwa nkondopekwa aanyasha poondondo dha yooloka okupitila miinyangadhalwa ya yooloka.

Kakele kiinyangadhalwa yoAR, Amupanda okuli woo deputy dean gwOshiondo shEliko moUniversity of Namibia.

Nauyoma ngoka a ti kutya AR oyo omboloto ye yakehe esiku okwa popi kutya okwiitula mo mokukondjela emanguluko lyuyuuki waanyasha moshilongo.

Nauyoma okuli woo amushanga-ndjai gwoNamibia National Students Organisation (Nanso).

Kambala ngoka e li omwiilongi moshiputudhilo sho Stellenbosch University okwa popi kutya okwiipyakidhilaa manga neilongo lye ihe okwiitulamo mokukondjela onkalamwenyo ombwaanawa yaanyasha yaNamibia.