Aapolisi muupyakadhi

Opolisi otayi konaakona oshipotha shuuhasha omolwa omudhimba gwokanona ngoka gwali gwa thigwa mesiloshisho lyayina yokanona, Catherine Iyambo, kaanambelewa yopolisi mOmukunda Omakange, mOshitopolwa shaKunene. Aanambelewa yopolisi mboka oya li ye na andola okufala omudhimba ngoka kokila yopolisi. Omupopiliko gwOpolisi, Omupeha-Komisina Edwin Kanguatjivi mEtitano okwati, oonkatu otadhi ka katukilwa aanambelewa yopolisi mboka taya tamanekelwa oshipotha shuuhasha nokwaahasimaneka omudhimba gwokanona kokakadhona koomvula 4 konima sho ya ndhindhilike kutya okila yopolisi moRuacana oya pata. Okanona hoka oka hulitha mOsoondaha ya piti pokaKlinika ka Otjimuhaka mOshikandjohogololo shEpupa. Kanguatjivi okwati nonando ke na natango uuyelele wa gwana kombinga yoshiningwanima shoka. Aanambelewa mboka oyali ye na okufala omudhimba ngoka kokila nonando oyili kokule. Ookila ohadhi kala dha pata Kanguatjivi okwa holola woo omaivo ge kombinga yaaniilonga mookila dhomidhimba mboka haya idhile ookila momahuliloshiwike. “Otandi ka ya moonkundathana naanambelewa aakuluntu yopolisi molwaashoka onkalo ndjika oyo paulumompumbwe. Aanambelewa yopolisi oye shi shi kutya oye na oshinakugwanithwa shokufala omidhimba kookila na haku dhif ala komagumbo. Ngele okila oyali ya pata nena oyali ye na okufala omudhimba ngoka kokila nenge koKlinika yopopepi nenge yi li kokule. Aaniilonga yomookila inaya pumbwa okupata ookila molwaashoka aantu ihaya ningi omatokolo kutya otaya hulitha uunake,” Kanguatjivi ta ti. Oshiwike sha piti onzonkundana Nampa oya lopota kutya okamonakadhona kaIyambo oka tameke taka kungu momasiku ga4 gaDesemba na okali ka falwa koklinika. Okanona okali ka shunwa koklinika mOlyomakaya konima sho inaka kala nawa na oka hulitha esiku lya landula. Euvonayi lyaakwanezimo Iyambo okwa lombwele Nampa kutya aanambelewa mboka oye mu lombwele kutya ka ye na shoka taya vulu okuninga nonando omudhimba gwokanona ogwali nale tagu ningi nayi. Yinakulu yokanona, Mundjuru Iyambo, okwa holola okuuva nayi kwe omolwa oshiningwanima shoka ta ti, ka yali taya vulu okufumbika okanona omanga ka ye na onzapo yeso. “Okwali kwa toka noonkondo opo tu mu fumbike, naaleli yetu yopamuthigululwakalo otwali twapumbwa okuya tseyithila tango uuna twali twa tokola okufumbika. Nashikwawo ka pwali oshiketha, opwali uupyakadhi uunene,” Mundjuru. Aakwanezimo oyali ya dhengele ongodhi, Omupeha-Komisina James Nderura, ngoka a gandja elombwelo kaanambelewa yopolisi okuza mOshitopolwa shaKunene opo ya ka tale ko omudhimba ngoka ongulohi ndjoka noku gu fala kokila yopolisi hoka gwa kala sigo omEtitatu moka aakwanezimo ye ke gu tala ko opo ya vule okuninga efumbiko. -Uuyelele wa gwedhwa po owa zi konzonkundana Nampa.