Ya Ndakolo a limbililwa kompumbwe yoondjila dhopamuthika

Ompumbwe dhoondjila unene miitopolwa yomomikunda oshimwe shomwaambyoka ya limbililika ngoloneya gwoshitopolwa shaShikoto, Penda Ya Ndakolo.

Ya Ndakolo okwa popi ngaaka mEtitatu lya piti, pethimbo a gandja oshipopiwa shopashitopolwa she.

Okwa popi kombinga yesimano lyomayambulepo unene etungo lyoondjila ndyoka tali hwahwameke ekoko lyopaliko nonkalonawa yaakwashigwana.

Okwa popi kutya elelo lyondoolopa yaNiipa olya tungu ondjila yoshinano shookilometa 5 kongushu yoN$747 554.

Elelo olya tulapo woo omalamba gomomapandaanda mondjila onene yaNandjokwe, meyambidhidho lyaNored opo ku gandjwe egameno kaakwashigwana okuza kiiponokela niiponga.

Elelo lyondoolopa yaMuthiya ngashiingeyi otali longo ondjila yomamanya yoshinano shokilometa 1.1 kongushu yoomiliyona 5.8.

Elelo lyaTsumeb nalyo olya longitha oshimaliwa shoomiliyona 1.5 mopoloyeka yokulonga ondjila yedhina president avenue. Opoloyeka ndjoka otayi longwa kongushu yoomiliyona 2.9.

Ya Ndakolo okwa longitha ompito ndjoka ta popi kutya nonando okwa kala eshongo enene okuza koCovid-19 okwa ningwa iinyangadhalwa ya nuniwa okuyambdhidha oongeshefa ooshona oshowo dhoka dhopokati mokuyambulapo onkalo yopaliko.

Oshimaliwa sha thika poomiliyona 4.7 osha gandjwa mokuyambulapo oongeshefa ooshona nadhoka dhopokati.

Onga onkalo yokuyambulapo oongeshefa unene aalandithi yomomapanda, elelo lyaNiipa otali tungu ehala lyokulandithila momatala gaNandjokwe kongushu yoN$200 000.

Ehala ndyoka otali ka pitika aalandithi yomomapandaanda yalandithile mehala lyagamenwa lyo olya yela.

Elelo lyaMuthiya olyiikalekela oshimaliwa sha thika poomiliyona 3 sha nuninwa okutunga oshitopolwa oshitiyali shomatala gaayehe gokulandithila.