Uudhigu womeya gohanya wa nayipala mOndangwa

Omukuluntupitithi gwondoolopa yaNdangwa Ismael Namugongo ota ti onkalo yomeya gohanya oya nayipala ngashingeyi, oshoka oya tula moshiponga oomwenyo dhaakalimo yomondoolopa noyomomikunda dhopopepi nOndangwa.



Ondama yohanya oya popoka mOndangwa moshiwike sha zi ko, naakalimo yomolukanda lwoExtension Five oya gumwa nayi konkalo ndjika. Sigo opo mpaka, omagumbo gaheyali oga kundukidhwa komeya gohanya, shoka sha thimnike ooyene yago ya tembuke mo.



Okuthika mOmaandaha goshiwike shika, omeya gohanya oga kungulukile momikunda dhopopepi, noga li taga hala okwaadha momukunda Onambango, moka mu na ombala yOmukwaniilwa gwaNdonga, Fillemon Shuumbwa Nangolo.



Sho Namibian Sun a talele po omikunda ndhika mEtitatu, omeya gohanya oga talama kokapate kokaholondo kopokati kaNdangwa nUukwiyu Uushona, nondjila ndjika oya pata manga.

Aanamukunda mboka ya tsakanene nomutoolinkundana gwoNamibian Sun oya holola euvonayi lyawo molwa ezimba elulu lyomeya gohanya, ndjoka hali geye kongulohi uuna taku lokwa nomeya taga kunguluka noonkondo. Aanamagumbo mboka ya gumwa koshikumungu shika inaya adhika mo momagumbo gawo, nomagumbo gawo oga li ga pata.

Ohatsa yOndholongo nEnzulonkalo lyomOluno oyu udha omeya gohanya.

Moonkundathana noshikundaneki shoNamibian Sun mEtitatu, Namugongo okwa ti oshinima shika oshikulukulu shopoomvula dho2016/17, ashike shonuumvo, “hwangu.”

Okwa ti kutya ondoolopa yaNdangwa yimwe yomoondoolopa oonkulunkulu, nuundama womondoolopa owa longelwe pethimbo lyiita tau yakula omagumbo omashonashona mOluno nomOndangwa Proper.

"Mo2016, otwa dhimbulula kutya mbuka uupyakadhi unene, ashike molwiiniwe yondoolopa itayi gwanene oyo awike, opo tu vule okutungulula uundama mbuka, okuwu longulula nenge okuwu tula pamuthika gwopashinanena ,” Namugongo a fatulula.

Okwa ti kutya ondoolopa oya ningi omapekapeko ga nkene tayi ka longa nekunguluko lyomeya ngaka ogendji, oshoka aakalimo yomondoolopa oya indjipala. Okwa gwedha po kutya uuministeli womapendulopo giilando nomikunda owa ya mo olunyala moshinima shika notau kwatha ondoloopa yaNdangwa mokulongulula oondama ndhika.

Ekwatho lyopakathimbo

Namugongo okwa ti mongashingeyi, ondoolopa otayi thitikinine mo omeya ongekandulopo lyomukundu pakathimbo.

“Opo tu thitikinine mo omeya, otwa pumbwa okukoleka omakuma ga dhingoloka oondama ndhika, naashoka osho twi ipyakidhila nasho. Onkalo oya hwepopala ngashingeyi. Konima yokuthitikinina mo omeya mondama, otatu ka tameka nokutunga ondama yohanya ompe yopashinanena,” okwa ti.

Okwa gwedha po kutya shampa omeya ga dhindwa nawa, nonande ando omeya oga ka panuke mo mondama komongula, itaga kala tula aantu moshiponga, oshoka otaga kala ga dhindwa sigo oponkatu mpoka taga vulu okulongithwa mokutholomitha oondhopi, okutekelitha uungwena nomwiidhi gwiimuna, nosho tuu.

“Ehala ndjoka lya palathana noondama ndhika enenenene nawa. Otatu ka tembudha aanamagumbo yamwe opo tu tule po iikunino iinene,” okwa gwedha po.

Oshimaliwa oshindjindji sha pumbiwa

Namugongo okwa ti kutya mEtine omu na oshigongi shaanawino nooindjiniya dhomondoolopa mboka taye ke tu omayele kombinga yekandulopo lyomukundu tali kalelele nokutunga ondama yohanya ompe, ndjoka itayi dhindi omeya gokunuwa kaantu ihe ogokulongithwa miinyangadhalwa yuunamapya nuuniimuna.

Okwa ti kutya opoloyeka yoludhi ndoka otayi ka pula oshimaliwa shokuza poomiliona N$150 sigo opoomiliona N$200.

Sigo okonena, oya pewa oshimaliwa shoomiliona N$15 sha za kuuministeli womapendulopo giilando nomikunda nondoolopa oya tokola oku ka tunga ondama yohanya ompe muule woomvula ndatu dhi li komeho.

Namugongo okwa londodha aakalimo yaa kwate oohi moondama ndhika oshoka oohi ndhika oombwinayi kuundjolowele wawo. Okwa gwedha po kutya aagameni yomaliko otaya tonatele oondama ndhika, opo aantu yaa kwate oohi.

[email protected]