Ueitele ta konakonwa molwa okumangululwa kwe kuSchlettwein kaa fute iifendela

Omaihumbato nokugama ombinga kwomupanguli Shafimana Ueitele pethimbo lyoshipotha shokukondjitha omusinda omutiligane otaku konakonwa sho kwa monika uumbangi tawu holola kutya omuyamukuli gwotango moshipotha shika– minista yuunamapya nuuniimuna Omusimanekwa Calle Schlettwein –okwa mangulula Ueitele kaa fute iifendela yofaalama ye mu Auguste 2024, ethimbo ndyoka oshipotha sha tulwa mo nale.Omupresidente gwongundu yoAffirmative Repositioning (AR) Job Amupanda, ngoka ta kondjitha kutya omusinda omutiligane kagu li paveta, okwa gandja enyenyeto lye kokOkomisi yAaniilonga mOshikondo shUuyuuki (JSC), omolwa omaihumbato gaUeitele mokupangula kwe. Shika osha landula sho Ueitele a tindi okukala kee shi omupanguli moshipotha shika nonande aakalelipo yopaveta yAmupanda ye mu indile e shi ninge.Oodokumende dhuuministeli wuunamapya otadhi ulike kutya Ueitele okwa mangululwa kaa fute iifendela yoofaalama dhe mbali. – oFarm 938 (Oshitopolwa shotango shofaalama Woseley), shuunene woohekta 1 732, noFarm 933, yuunene woohekta 4 867 – momasiku 6 Auguste 2024, naashika osha ningwa omasiku omashona manga iihokolola yomusinda omutiligane inayi tameka.“Shika itashi idhidhimikilwa. Manga a li e shi shi kutya oye ta ka pangula moshipotha shika nomanga ku na owala omasiku omashona opo oshipotha shomusinda omutiligane gwomo1896 shi tameke, Omusimanekwa Calle Schlettwein, ngoka e li omuyamukuli moshipotha shika, okwa mangulula omupanguli Shafimana Ueitele opo kaa fute iifendela yasha molwa oofaalama dhe,” Amupanda a nyola kepandja lye lyokomalungula nokwa kopeka ko uumbangi wodokumende ndjoka.Amupanda okwa ti wo kutya Ueitele oku shi aantu oyendji mboka oyo ooshikwetepo moshipotha shika, ngaashi Ehangano lyonyama lyoMeat Board of Namibia nEhangano lyaanafaalama lyoNamibia Agricultural Union, onkene okwa limbililwa kutya omupanguli ota vulu tuu shili okukala inaa gama ombinga.“Ngele oshikondo shetu shuuyuuki osho hashi longo ngeyi, nena onda tila, katu neni oshikondo shuuyuuki nande. Mupya munene, ashiheshihe, ngashingeyi otashi ikwata,” okwa gwedha po.Eindilo lyokwaa kala omupanguli moshipotha shika lya tindwa.Mombilive ye ndjoka a nyolele Okomisi yAaniilonga mOshikondo shUuyuuki yoJSC, Amupanda okwa holola nkene Ueitele aniwa a tindi okutala pauyuuki eindilo ngele otashi vulika a kale kee shi omupanguli gwoshipotha shoka.“Ongula yesiku 21 Januali 2025, konima yoonkundathana pokati komupanguli naakalelipo yandje yopaveta, onda lombwelwa omahokololo taga limbilike ngoka ga popiwa komupanguli. Ondi indile aakalelipo yandje yopaveta ya tule mo eindilo ngele otashi vulika opo, Ueitele kaa pangule moshipotha shika. Kakele, sho aakalelipo yandje yopaveta ya pula epitikilo ya tye ko sha, omupanguli okwa tindi nokwa pula ndje ndi gane nokugandja uumbangi wandje mbalambala,” Amupanda a hokolola.“Aakalelipo yandje yopaveta oya fatululile ndje kutya eindilo ndika lyokwiindila omupanguli omupe ohali pumbwa, opo aakalelipo ayehe yopaveta yokoombinga adhihe mbali, ya gandje omikanda dhawo dhopaveta moka ya gana kutya osho taya pula ngaaka. Omupanguli okwe ekelehi ethaneko ndika nokwe ya pula owala ya ye komeho niihokolola.”Shi ikolela ku Amupanda, Ueitele okwa tokola kutya aakalelipo ye ayehe yopaveta naya thikame ya gandje uumbangi wawo nokwa ti wo okwa hala eindilo lyokukonga aakalelipo yopaveta aape li ningwe po potundi 14:15 esiku ndyoka, nonande osha li hanga omulongo nambali gwomutenya ethimbo ndyoka e shi pula.Uuyelele wokumangululwa huka wokwaafuta iifendelaOdokumende yuuministeli wuunamapya ndjoka ya monika komutoolinkundana gwoNamibian Sun oyu ulika kutya Ueitele gumwe gwomaanafaalama mboka ya mangululwa opo yaa fute iifendela yevi lyawo. Emangululo ndika olya pewa oFarm 938, ndjoka ya li yi na okufuta iifendela yoodola N$1 850 noshowo oFarm 933, ya li tayi futu iifendela yoodola N$5 198.40. Oofaalama ndhika adhihe mbali odhi li kombanda yomusinda omutiligane, onkene ohadhi vulu okupindika momalandithilo omanene, uuwanawa mboka aanafaalama yokOnooli yaa ye wu shi.Schlettwein, palongitho lyOntopolwa 76B yOveta yOmatulululo molwa Uunafaalama wopaipindi (Oveta onti-6 yo1995), oya mangulula Ueitele naafaalama ooyakwawo opo yaa fute iifendela yoofaalama dhawo momimvo dhoshimaliwa ndhi 2016/2017, 2018/2019, 2020/2021 no2021/2022.Omaihumbato gwomupanguli taga finywafinywaOmaihumbato gaUeitele pethimbo lyepulakeno lyoshipotha shika oga nyanwa koyendji, nayamwe otaya ti okwi iningi omutondi gwomukalelipo gwopaveta gwAmupanda, Advocate Mbushandje Ntinda. Oshikando shimwe, Ueitele anuwa okwa pula Ntinda kutya Oveta okwe yi ilongele peni, naashika oshe e ta ya ninge inda mo ndi ye mo. Lwanima Ueitele okwa ka gandja ombili omolwa omapopyo ge ngaka.Amupanda natango ota ti ota kondjele uuyuuki: “Otwa gandja pambelewa ekemo lyetu molwa omaihumbato gomupanguli Shafimana Ueitele pethimbo lyoshipotha shomusinda omutiligane. Okwa tuku omukalelipo gwopaveta nonande e ke mu pa ombili. Shika kashi na sha owala negandjo lyombili – ongiini kombinga yokunyatekwa kwedhina lye nale?”“Ehalelo lyetu oondika kutya omupanguli na pangule pauyuuki. Etokolo nali kale tali vulu okutaambiwa ko kaakuthimbinga ayehe ya gumwa koshipotha shika, noye shi shi kutya epangulo olya li paushili shili.”Komapulo kutya oshipotha otashi vulika tashi ka talululwa monakuyiwa, Amupanda okwa ti: “Iipotha yomOmpangu yopOmbandambanda ohayi pulakenwa owala mOmpangu yopOmbandambanda, naakalelipo yandje yopaveta otaya ka ungaunga nayo. Kakele, kombinga yomaihumbato gomupanguli shono oshinima sha yooloka miipambele yOkomisi yAaniilonga mOshikondo shUuyuuki yoJSC. Natu tegeleleni tu pulakene sho okomisi tayi tokola.”Ueitele okwa tegelelwa a ka gandje etokolo lye moshipotha shomusinda omutiligane momasiku 27 Maarsa.Omapulo ngoka gu ukithwa kOkomisi yAaniilonga mOshikondo shUuyuuki yoJSC ge na sha nomaihumbato gaUeitele inaga yamukulwa pethimbo oshifo tashi nyanyangidhwa. Schlettwein naye wo inaya yamukula omapulo a tuminwa kongodhi ye, opo a tye ko koshinima shika.

Ueitele ta konakonwa molwa okumangululwa kwe kuSchlettwein kaa fute iifendela

Comments

Namibian Sun 2025-03-04

Please login to leave a comment

Ueitele ta konakonwa molwa okumangululwa kwe kuSchlettwein kaa fute iifendela

Comments

Namibian Sun 2025-03-04

Please login to leave a comment

Login