Swapo okwa hakela pokati koontontwaveta dhaJerry netokolo lyokweendwa konima

Swapo okwa hakela natango pokati kokusimaneka eithikamenepo lyoompangu nokumbilipalela iilyo, aayambidhidhi naalanduli yongundu, mboka ombinga onene oya dhamatela ketokolo ekulu li li ompinge netokolo lyOmpangu yopOmbanda lyoshiwike sha zi ko ndyoka lya tokola kutya okutala ko okweendwa konima ongoshimbuluma kashi li pakotampango nosho ethindilokongudhi.

Ongundu tayi pangele, ndyoka epangelo lyawo lya kuutumba koontontwaveta dhi li ompinge nuushenge dhe etelwe MOmutumba komusimanekwa Jerry Ekandjo, ooahende yongundu oya pewa etokolo ndika opo ye li kundathane nawa nokuli konakona opo ongundu yi vule okutya ko sha nawa koshigwana.

MEtitano, Ompangu yopOmbanda oya manitha oveta yokweendwa konima, ndjoka ya li tayi kondjithwa komunandjungu muuthemba womashenge Friedel Dausab, nokutya "otayi ehameke nokuthindila kongudhi" nokukala po koveta "itayi popilwa nomatompelo muuyuni wuudemokoli”.

Swapo, ngoka a li ta yambidhidha oontotwaveta dhopaumwene moparliamente dhaEkandjo dhi li ompinge nuushenge, ina tya ko sha pambelewa ketokolo.

Omupopiliko gwongundu Hilma Nicanor ohela okwa ti: “Etokolo lya tokolwa otwe li uva. Okukala moshilongo shuudemokoli, otu uvite ko notwa tseya kutya oompangu dhetu odhi ithikamena po. Ongongundu, ngele sha pumbiwa tu tye ko kutya eiuvo lyetu olini, otali ka tseyithwa. Inatu kuutumba natango”.

Ta popi okutetekela oshigongi shongundumutima yongundu ohela, Nicanor okwa gwedha po: “Otu na okutala komukanda nguka, ongongundu yopaudemokoli, otwa simaneka oompangu dhetu. Ngele ongundu oye ya ponkatu mpoka yi na okutseyitha sha, otatu ke shi ninga”.

Ekandjo, ngoka a tamekele oonkundathana dhoontotwaveta dhi li ompinge nuushenge nonkambadhala yokwiindika oondjokana pokati kaaholathani yuukashikekookantu wa faathana, okwa ti ye naye woo ota konakona etokolo muule.

Uupyakadhi

Dausab okwa tula mo eindilo tali kambadhala okutokola kutya iipotha yokweendwa konima nomapogolo gopaihulo inaga igililwa, pamwe nomilandu dhopaveta tadhi ungaunga niimbuluma mbika, kayi li pakotampango.

Omunawino miikwapolitika Rui Tyitende okwa ti Ongundu Swapo oya taalela uupyakadhi oshoka oontontwaveta dhaEkandjo dhi li ompinge nuushenge odhi li owala poshitaafula shOmupresidente Nangolo Mbumba.

“Ondi wete oya taalela uupyakadhi. Ngele omupresidente okwa shaina oontontwaveta ndhoka, kandi wete ngele- monkalo yawo yongashingeyi – oontotwaveta ndhoka otadhi pondola sha ngele odha talululwa. Otashi vulika inaa hala okuhinda omashenge noohiikwali (LGBTQI) notashi vulika ye shi ethele miikaha yiikundaneki yi nwethe mo omadhiladhilo gaakwashigwana. [Swapo] otashi vulika owala a ka ze mokalungu konima yomahogololo,” okwa ti.

Ahende guuthemba womuntu Norman Tjombe okwa ti otashi vulika kuyele okutya ko sha keuivo lyongundu, ashike okwiindile aanapolitika ayehe moongundu dhopapolitika dhi simaneke etokolo lyompangu nokuyambidhidha etulo miilonga lyetokolo.

Etokolo lyEtitano olya tende kohi kutya uuyuni wuudemokoli ohau kwashilipaleke uuthemba wopakotampango wuuntu womuntu nuuthike pamwe waakwashigwana ayehe, oshinyangadhalwa itashi vulu okutalika ko omuyonena "molwa owala okapambu, nenge ongundu onene, yaakwashigwana ye shi tala ko itaashi idhidhimikilwa".

- [email protected]