Onkalo mOkavango yuuzigo tayi yemateke

Okulya uuzigo otaku tsikile nokutyakaleka kOshitopolwa shaKavango Uuzilo, naakalimo ngashingeyi oya lulilwa nayi molwashoka aanambelewa itaya gandja omauyelele kombinga yiizemo yomakonakono gomaso goonakusa 24 mboka ya si miiningwanima ya yooloka yokulya uuzigo muule woomvula mbali dha piti.Yalwe oyendji oya ale ya se miiningwanima oyo tuu mbyoka. Kakele kuunene wiiponga mbika, aanambelewa inaya gandja natango oolopota dhopambelewa, shoka she eta omahokololo kutya omauyelele otaga holekwa aakwashigwana naanambelewa wo.Oonkambadhala dhaNamibian Sun okumona omauyelele okuza kUuministeli wUuthikepamwe, Ekandulo po lyOluhepo nOnkalo nawa yUunona noshowo kUuministeli wUundjolowele nOmayakulo goPankalathano inaku tompola sha, oshoka omauministeli agehe inaga tya ko sha kombinga yosheetithi shomaso ngaka.Oshiningwanima oshitalalatalala shokulya uuzigo osha ningwa oshiwike sha zi ko komukunda Kashira, hoka uunona uuhamano wu li pokati koomvula hamano nomugoyi, wa taambelwa moombete konima yokulya uuhilili.Omupevi Komufala Bonifatius Kanyetu, omukuluntu gwoshikondo shomakonakono giimbuluma moshitopolwa, okwa koleke oshiningwanima. Shi ikolela ku Kanyetu, uunona wa za momagumbo gatano ga yooloka, owa li tawu dhana miihwa popepi nomagumbo gawo sho wa li uuhilili. Lwanima sho wa galukile komagumbo, wumwe owa tameke tau kungu nokukanitha oonkondo.“Okapambu kokahilili oka kuthwa uunona noka pewa aapangi noondohotola ka kwathe mepango lyuunona,” Kanyetu a ti. Uunona owa falwa koshipangelo shaNyangana, hoka taku hokololwa wa li monkalo ombwanawa nokwa tegelelwa wu lalekwe mo moombete.Moonkundathana noEagle FM, Wayera Djami, yinakulu yuunona utatu womuuhamano okwa ti ina mona nale uutekulu we “ wa leela notau hala okusa”.“Mbalambala onda dhengele oambulansa nonda kambadhala oku wu pa omeya , omongwa, omagadhi gokulya nomahini, opo ga kwathe mokugalula iikunguluki wa kanitha,” okwa ti. “Uunona owu na okatalekonawa nohau dhana nashaa shoka. Okuza nena, otandi ke wu tonatela opo ndi kwashilipaleke itau li shaa shoka sha nika oshiponga,” okwa gwedha po.MuFebuluali mumvogu, uunona utatu womomukunda Livayi moKavango Uuninginino, owa si konima sho taku fekelwa wa li uuzigo konima yokulya oshimbombo nomutete, nomahini wo. Kakele kuunene woshiningwanima, kUuministeli wUundjolowele inaku za olopota yasha yopambelewa, nomapulo inaga yamukulwa.Natango, mu Juni, okanona komimvo ndatu kedhina Helena Maliro oka sile mOshipangelo shaNyangana, omanga aantu yalwe yatano oya taambelwa moombete yokonima yokulya ocassava, etindi lya tseyika nawa hali lyana ngele inali telekwa nawa. Kamunsela Michael Kapota okwa koleke oshiningwanima, ta hokolola kutya mboka ya li moombete oya lalekwa mo.Omukuluntuwiliki gUundjolowele mOshitopolwa shaKavango Uuzilo, Idah Mendai, okwa lombwele Namibian Sun pethimbo ndyoka kutya olopota kombinga yeso lyaMaliro oya tumwa kombelewa yamushanga omukuluntu mUuministeli wUundjolowele, Ben Nangombe. Kakele, molopota moka kamu na osheetithi sheso kondandalunde noshigwana inashi tseyithilwa.Omaso taga limbilike gaakwanezimo 15 moKavango Uuzilo mumvogu natango inaga monika kutya oge etwa koshike. Pethimbo lyoonkundathana dhontengenokothaneko yopashigwana mumvogu, amushangandjayi gwongundu yoNational Unity Democratic Organisation (NUDO), Josef Kauandenge okwa kondema Uuministeli wUuthikepamwe sho itau gandja iizemo yomakonakono gopaunamiti ga za koolabolatoli. “Ethimbo olya thikana olopota yi tseyithilwe oshigwana opo oonakusa ya vule okuvululukwa nombili,” Kauandenge a ti. Okwa pula woo kutya uuministeli owa ninga oonkambadhala dhini ku keelelwe iiponga mbika monakuyiwa nokukwashipaleka oshitopolwa osha gamenwa.Kauandenge okwi indile Minista Doreen Sioka a pitithe olopota ndjoka, ta ti uuyelele owa pumbiwa mokufudhitha nokutalaleka aakwanezimo nomokukeelela omaso. - nikanor@erongo.com.na

Onkalo mOkavango yuuzigo tayi yemateke

Comments

Namibian Sun 2025-04-03

Please login to leave a comment

Onkalo mOkavango yuuzigo tayi yemateke

Comments

Namibian Sun 2025-04-03

Please login to leave a comment

Login