Ondholongo yotango moKunene yina ofaalama

Minista yiikwameni, egameno nepopilo, Albert Kawana okwa egulula pambelewa ondholongo yaKaoko-Otavi mOshitopolwa shaKunene mEtine.Kawana okwa ti evi lyuunene woohekta 384 nomatungo ga tungwa otaga ka kala ondholongo yotango tango moshitopolwa shaKunene. Ondholongo ndjika otayi kwatha opo aanandholongo ya hedhe popepi naakwanezimo yawo, notayi ka kala wo yi na ofaalama (oshikunino) ndjoka tayi ka kwatha oondholongo, opo dhi ninge omandiki haga eta po sha moshigwana. Kawana okwa holola kutya ezulonkalo lyaanandholongo kali shi epu uuna aanandholongo ya edhililwa moondholongo dhokokule kokule naakwanezimo yawo.Okwa ti otashi vulika wo shi gume uundjolowele wawo wopamadhiladhilo, okwa gwedha po. "Omapekapeko ogu ulike kutya onkalo yuundjolowele wopamadhiladhilo ihayi lunduluka sha uuna aanandholongo ye li mekwatathano naakwanezimo yawo," okwa ti. Shi ikolela kuminista, omapekapeko ogendji otaga ti kutya aanandholongo mboka ye li mekwatathano ewanawa naakwanezimo yawo pethimbo ya edhililwa moondholongo ohaya ka kala nawa shampa ya mangululwa.Okwa ti wo osha pumba opo ya pogole ishewe, okwa dhenge omuthindo. Elelo lyOpamuthigululwakalo lyOtjongoha, Elelo lyOpamuthigululwakalo moshitopolwa shOtjondete nElelo lyOpamuthigululwakalo lyaVita Royal oyo ya gandja evi ndika oshali mo2022.Kawana okwa ti opoloyeka ndjika otayi tungwa pailuku, niilonga yotango oya tamekele muFebuluali nuumvo. Ondhalate yuule wookilometa 8.6 oya tulwa ko nale niihwa ya li ya mehala ndika oya tetwa mo nale. Oshikwawo, ehala lyoohekta 30.5 olya tetwa omiti nelalakano okutula mo ominino dhokutekela nokulonga moshikunino, tashi ka ningwa momumvo gwoshimaliwa gwo2025-26, okwa ti. Ebloka lyoadmin li na ombelewa ne nosaala yimwe yiigongi olya tungwa nale, oshowo omagumbo gahamano taga ka edhilila aanambelewa yomondholongo 44, nebloka limwe lyokulala aanandholongo 30, okwa gwedha po. “Etungo lyondholongo ndjika olyo oshiholelwa sheitule mo lyepangelo okulundulula oondholongo dhi ninge omandiki haga eta po sha moshigwana shoka tashi kwatha tu tsakanithe omalalakano getu gokulonga oondya dha gwana moshilongo. Shika otashi ningwa wo pakulonga aanandholongo oowino dha pumbiwa mezulonkalo lyawo noku ka galukila moshigwana."Kawana okwa pandula aakwashigwana 30 mboka ya kwatha mokunana ondhalate okuza mesiku lyotango lyAuguste, nokwa ti otashi vulika ya ka kutwe taya kalele ongaaniilonga moshikondo shoondholongo.Oshikwawo, okaklinika taka adhika mondholongo oke egulukila oshigwana, nelalakano okweeta omayakulo guundjolowele ga thike koshigwana, okwa gwedhwa po. Aanafaalama yopomodhingoloko nayo wo otaya ka kwathelwa kondholongo ndjika ompe yoKaoko-Otavi, Kawana a gwedha po. – augetto@nmh-hub.com.na

Ondholongo yotango moKunene yina ofaalama

Comments

Namibian Sun 2025-04-03

Please login to leave a comment

Ondholongo yotango moKunene yina ofaalama

Comments

Namibian Sun 2025-04-03

Please login to leave a comment

Login