Omusinda omutiligane nagu tembudhilwe koongamba - Pendukeni

Amushanga-ndjayi omukulu gwoSwapo Pendukeni Iivula-Ithana oti indile omusinda omutiligane gu tembudhilwe koongamba dhaNamibia, ta ti kutya omainda meni lyoshilongo inaga topola we Aanamibia.Moonkundathana noshikundaneki shoNamibian Sun mEtitatu, Iivula-Ithana okwa hokolola emono lyiihuna lyAanamibia poboloka yaShivelo nopomainda galwe gomoondjila, nokwa hala pu ye omalunduluko gomeendelelo."Oonkambadhala nadhi ningwe opo aantu ya yakulwe nawa pethimbo limwe sho taku keelelwa omikithi," okwa ti. "OngAanamibia, natu kondjele oshilongo shetu. Ngele epangelo olya tokola okukeelela omikithi, ehala ndyoka nali kale momake goshigwana ashihe hakoondimwe owala."Okwa gwedha po kutya einda ndika olya kala po nale koongamba dhaNamibia nAngola nelalakano okukondolola einyengo lyiinamwenyo."Ngele tse ongAanamibia, otwa tokola omusinda omutiligane gu tembudhilwe koongamba dhaNamibia nAngola, nena otu na okugamenena po ehala ndyoka noonkondo adhihe, oshoka olya guma omahupilo getu," okwa ti. ‘Okatongo’Iivula-Ithana okwa ti Aanamibia oyendji oya mono iihuna poboloka yaShivelo monakuziwa, okwa gwedha po kutya omusinda omutiligane pOshivelo petameko ogwa li gwe ya po molwa aakwiita."Kaakwiita oyendji tse yekondjelomanguluko, okukutha po omusinda omutiligane olyo lya li elalakano lyetu lyotango. Ashike, momukokomoko gwethimbo, aaleli oye ku uva ko oshilonga shago okukeelela omikithi nonkandangala yago momalandithilo giimuna," okwa ti.Okwa koleke kutya epangelo olya kambadhala monakuziwa okukwathela aanafaalama yomevi lyaayehe konooli nokuumbangalantu zilo ya landithe momalandithilo omanene, ngaashi kenenevi lyEuropa. Naashoka osho osha totitha po ookamba dhokweedhilila iimuna manga ya tega oku ka landithwa.Kakele, ina panda okusokononwa okundji kundji kwaanafaalama yokonooli, ta ti oko okatongo hoka."Itandi vulu okutya omusinda omutiligane nagu ze po momutenya gumwe, ashike oonkatu nadhi katukwe opo ku kwashilipalekwe omalunduluko kehe tage ya po oge li pautho lyekotampango lyaNamibia ongoshilongo shi ithikamena po. Poompito dhimwe, omusinda omutiligane otagu ku dhiladhilitha kutya natango otu li momavigumbo, iitopolwa yokonooli ya tetwa ko," okwa gwedha po.Okwa pula natango kutya omolwashike oshilongo tashi longitha omulandu gwonkulu yonale, nokwa gandja oshiholelwa tashi vulu okulandulwa shaBotswana, shoka ha longitha mokukeelela omikithi dhiimuna.Ewawa lyaagundjuka moSwapo(SPYL): Omusinda omutiligane nagu ze po kashona nakashona Amushanga-ndjai gwewawa lyaagundjuka moSwapo (SPYL) Ephraim Nekongo okwa zimina kutya omusinda omutiligane nagu ze po ashike ota ti kutya nagu ze po kwa dhiladhilwa nawa."Otatu ti owala omusinda omutiligane nagu ze po kashona nakashona. Ngele otwa patitha ehangano lyonyana lyoMeatco meulumo e tatu etha omalandithilo gopaigwana, aantu otaya ka kanitha iilonga. Aanafaalama itaya ka muna we iimuna yawo," Nekongo te tu londodha."Epangelo oli ilongekidha nale okuninga omalunduluko ngaka. Otwa pumbwa okuya moonkundathana dhomuule kombinga ya nkene tatu ka landitha onyama ya za konooli yoshilongo. Ngele opu na omashongo gi ikalekelwa, natu ga kundathaneni. Aantu inaya ninga omusinda omutiligane oshikumungu shopapolitika," okwa ti. PDM ta ti aayehe naya kwatelwe mo oshowo omadhiladhilo omape naga etwe poGabriella Stadhauer, amushanga gwiipambele yopaliko niikwaipindi mongundu yoPopular Democratic Movement (PDM), okwa ti omusinda omutiligane ogwo osimbole yokatongo hoka ita ka longo we muNamibia a hangana."Ongundu yoPDM oya dhimbulula kutya okukutha po omusinda omutiligane okwa pumbwa okulongwa mo nuukeka opo gu kale tagu keelele omikithi natango," okwa ti."Natu kwatele po ondjokonona yokukaleka Namibia mokaalita kaalandithi yonyama yongombe ombwanawa lela. Ndika eindilo okweeta po omadhiladhilo omape, okuninga omapungulolongitho moshikondo shuunamapya nuuniimuna nokulongela kumwe," okwa gwedha po.Pokati mpoka, olugodhi lwopaveta olwa pulakenwa mOmpangu yopOmbanda yaVenduka momwedhi muka. Omunandjungu Job Amupanda okwa ti oshipotha shika otashi kondjele uuntu womuntu nuuyuuki waayehe, hayiimuna owala niipindi.Omukuluntu moSwapo nomuprima minista omukulu Nahas Angula okwa ti ita ti ko sha, nomatompelo kutya ye omunafaalama mevi lyaayehe noshowo handiyaka yomusinda omutiligane. - nikanor@nmh-hub.com.na

Omusinda omutiligane nagu tembudhilwe koongamba - Pendukeni

Comments

Namibian Sun 2025-04-02

Please login to leave a comment

Omusinda omutiligane nagu tembudhilwe koongamba - Pendukeni

Comments

Namibian Sun 2025-04-02

Please login to leave a comment

Login