Omupolisi a kwata onkonga omunandholongo

Opolisi yokOshitopolwa shaKavango Uuninginino oya kwata po omuniilonga pamwe nayo, omupolisi gwomimvo 32 Omunamibia ha longele pOshitaasi shopolisi shaNcaute, sho taku hokololwa a kwata onkonga omunandholongo omukiintu. Omufekelwa okwa mangwa po ohela nokwa tegelelwa a holoke nena mOmpangu yaMangestrata moRundu.

Shi ikolela ku komanda gwopolisi moshitopolwa shaKavango Uuninginino, Komufala Julia Iuze Sakuwa-Neo, omulumentu nguka anuwa okwa kwata onkonga omukiintu lwiikando iyali ya yoolokathana – mEtitatu, mo22 Januali, lwopotundi ontine yokomatango, nomEtine, mo23 Januali, pohamano yongula onene– noshiningwanima shika osha ningilwa mondjedhililo yopolisi. Omufekelwa, manga a li miilonga, okwa kwata onkonga omunadholongo omunamimvo 22.

Oshihakanwa natango oshe edhililwa mondjedhililo yopolisi, manga omakonakono taga tsikile moshipotha shika mekwatathano nOveta yOkukondjitha ekwatonkonga, Oveta 8 yomo2000.

- NOMUTOOLINKUNDANA : OKUZA MOOMPUNGULILO