Omunambelewa muMuni gwaShomeya noshikumungu shokufutwa N$1.3 miifuta ye yopaveta

Omunambelewa koshikondo shiiniwe mumuni gwaShomeya Karolina Damaseb ota pula a futwe kumuni konyala oshimaliwa shomiliona N$1.3, shoka ta ti okwe shi futu oohahende molwa oshipotha shokulunga nokwiitapula, shuumbudhi nuukengeleledhi ayihe mbyoka ina monika ondjo muyo.

Eindilo lye olya ndjandjukununwa mo nawa mombilive e yi nyolela omukuluntupitithi ta kwathele muMuni gwaShomeya, Frans Enkali mesiku 16 Januali.

“Otandi mu tseyithile pambelewa eindilo lyandje lyokufutwa oshimaliwa shoka nda longitha pethimbo lyokuhokololithwa, noinandi monika ondjo 4 Desemba 2024,” Damaseb a nyola.

“Momukokomoko gwoomvula ndatu netata, onda hokololithwa molwa omalundilo guumbudhi, gokutaamba oombumbo, gokulunga nokwiitapula, guukengeleledhi, oshowo okulonga nuuhasha. Mokukwashilipaleka onda kalelwa po nawa paveta nuuthemba wandje owa gamenwa, onda kalelwa po kehangano lyomutseyiveta SS Makando Chambers. Osha li sha pumbiwa omolwa uunene nekitakano lyoshipotha niilanduli tayi vulu okukwatakanithwa nedhina lyandje niilonga yandje".

Okwa gwedha po: “Iifuta yandje yopaveta moshikakothimbo shoomvula ndatu netata, ayihe kumwe N$1 270 994, noya mbangoloteka ndje nayi...”.

Sho a kwatakaniwa naye opo a tye ko sha moshiwike shika, Mayola gwondoolopa yaShomeya Mathew Hangula, okwa koleke kutya oshikumungu shika osha pwa, okwa tseyithile Namibian Sun kutya elelo natango olya tegelela olopota okuza kokakomitiye hoka kali ta ka hokololitha Damaseb onkene ita vulu okutya ko sha manga.

"Itandi vulu okugandja uuyelele washa, oshoka oshikumungu osha pu muDesemba manga twa li mefudho. Oshizemo shomakonakono otashi ka tseyithilwa elelo, notatu ka ya moonkundathana,” Hangula a ti.



Eyeleko lyedhina



Sho a pulwa a tye ko sha, Damaseb okwa tindi okutya kp sha kombinga yeindilo lye a futwe kumuni ashike okwa ti okwa nyanyudhwa koshizemo shomakonakono.

Okwa ti okuuvite edhina lye lya yelekwa, oshoka ina kala e na ondjo.

“Onda kala ndi shi kutya kandi na ondjo. Onkene ndjoka oya li onkambadhala yelelo okuyeleka oshinima sho lya tsikile niihokolola, kanda li tandi ikutha miilonga nokutegelela oshipotha shi pwe noshi yelekwe,” okwa ti.

Damaseb okwa ti oomvula ndatu dha piti kadha li oompu kuye, oshoka yamwe yomakwaanezimo, aaniilonga pamwe naye noshigwana osha li shi itaala omalundilo ngoka.

Okwa ti wo ina vula okukonga iilonga palwe omolwa omalundilo ngoka.

“Edhina lyandje olya nyatekwa. Otandi dhimbulukwa nawa nkene aaniilonga pamwe nangame naakwetu ya kala nokutala ndje. Onkene osho opala owala sho edhina lyandje tali yelekwa,” okwa ti.



Iiningwanima ya tetekele etidho miilonga pakathimbo



Damaseb, ngoka a li omukuluntupitithi ta kwathele pethimbo a ningilwa omakonakono, okwa kuthwa miilonga pakathimbo muJuli 2021 konima sho a ningile omakonakono aaniilonga pamwe naye yaali.

Aaniilonga mbaka yaali oyo omunambelewa omukuluntu gwiiniwe, John Amutenya nomunambelewa koshikondo shomatungo Gerson Kautondokwa.

Damaseb okwa konakona iilonga yAmutenya naKautondokwa molwa omathaneko golopota yomutalululi-ndjai momambo gondoolopa gomo2018.

Damaseb ina tula miilonga omathaneko mbalambala sho a yakula olopota yomatalululo manga a li omukuluntupitithi gwondoolopa ta kwathele; ashike mo2020 okwa yi kelelo nokwa tseyithilwa a holole omayono gawo.

Kombinga onkwawo, Amutenya naKautondokwa oya lundile Damaseb, shoka she mu kuthitha miilonga pakathimbo noshe eta woo olugodhi nduka lwoomvula ndatu lwokuyeleka edhina lye.

Mo2023, Amutenya okwa tidhwa miilonga sho a monika ondjo molwa uumbangi wa zi momakonakono a ningilwa.

Kautondokwa ina monika ondjo nota longo iilonga ye.

[email protected]