Omukiintu a hupithwa mombashu tayi pi

Frans Petrus (28), omukwashigwana mondoolopa yaSwakopo okwa tula omwenyo gwe moshiponga opo a vule okuhupitha omukiintu ngoka a ngambukile mombashu tayi pi.

Oshiningwanima shoka osha ningwa ongulohi yEtitatu lya piti, moMondesa.

Kwiikwatelelwa komunambelewa gwiikumungu yoshigwana mopolisi moshitopolwa shErongo, Omukonaakoni Ileni Shapumba, okwa popi kutya omukiintu ngoka a li a kotha okwa penduka sho uuvu aantu taya igidha omulilo.

Okwa yi pondje opo a ka tale na okwa mono kutya ombashu ndjoka yili konima yombashu ye oya tema omulilo.

Okwa tokola nduno okushuna meni opo a vule okuhupitha iinima ye ihe okwa fudhilemo olwithi gwomulilo olundji na okwa ngambuka.

“Sho Petrus ngoka naye hazi pomudhingoloko ngoka a thiki pehala ndyoka, okwa uvu aantu taya popi kutya omukiintu okwa shuna meni lyombashu ihe ina zamo onkene okwa tokola okuteya ombashu ndjoka okupitila mekende na okwa hupitha omukiintu ngoka.”

Okwa tetwa kekende kashona kokwaako kwe kwokolulyo.

Omulumentu gumwe, Alfeus Hambangu, ngoka naye a thiki pehala lyoshiponga na okwa kambadhala okukwathela okwa fudhilemo olwithi olundji.

Ayehe yatatu oya falwa meendelelo koshipangelo shepangelo moSwakopo, na oya pangwa nokulalekwa moshipangelo.

Shapumba okwa pandula Petrus omolwa uupenda we, sho a tula omwenyo gwe moshiponga nokuhupitha omukiintu ngoka.

Oshiyetithi shomulilo ngoka kashi shiwike nopolisi otayi ningi omakonaakono.