Omuhikingalo Shitana momusholondondo gwiilyo yoAR

Omuhikingalo Omunamibia nomunandjungu nongashingeyi omunapolitika, Lieutenant Shitana, nedhina lyuushashwa Fredrick Shitana, okwa ulikwa pambelewa komuwiliki gwongundu yoAR Job Amupanda, opo a kale momusholondondo gwiilyo yOmutumba gwopashigwana kokatekete koAffirmative Repositioning.

Shitana oku li ponomola ontihetatu momusholondondo nguka. Okwa yi moonkundathana noNamibian Sun opo a holole oondjodhi dhe dhopapolitika, esimano lyonkandandangala ta ka dhana mOmutumba gwopashigwana noshowo omalunduluko a tegamena oku ka ninga ngele a hogololwa.

Shitana, ngoka a kala omunandjungu, okwa ti okuya kwe mopolitika okwo owala ekatuko(onkatu) lyopaushitwe. “Onda kala aluhe nokuyambidhidha iinyangadhalwa noongundu, ngaashi #FeesMustFall noongundu dhilwe dha totwa po kaagundjuka okukondjitha uulingilingi nokwaa longa pauyuuki kwepangelo,” okwa ti, ta gwedha po wo kutya okuyambidhidha kwe oongundu dhaagundjuka okwa pala ondjila ye okuya mopolitika.

Sho a pulwa kutya omolwashike a hogolola ongundu yoAR mokati koongundu dhilwe dhopapolitika, Shitana okwa ti: “AR oyo ayike ongundu yopapolitika tayi wilikwa kaagundjuka noitayi popilwa uufuthi, eiyambapaleko nenge uundikushi molwa uukwamuhoko. Oyo ongundu yi na onakuyiwa yoshigwana komutima,” okwa ti.

'Oompata dhaa na oshilonga'

Shitana okwa dhenge omuthindo kesimano lyOmutumba gwopashigwana ongompito yokukundathana iikumungu ya simana yAanamibia.

“Aanapolitika oyendji ohayi yi mOmutumba gwopashigwana yaa na elalakano lyokuhumitha komeho oshilongo; ohaa kala noompata dhaa na oshilonga peha lyokutalula omilandu ndhoka dha guma omahupilo gaantu,” okwa ti. Okwa ti elalakano lye okutokola elyenge ndika lyokwaalonga neitulomo nokweeta omalunduluko golela moshigwana.

Ngele a hogololwa, Shitana okwa dhiladhila okutala kokulonga nawa nonoshili, nokwa uvaneke ta ka gandja eyokomeho lyiilongo ye konima yomwedhi ne kehe naashika ote shi ningi nelalakano opo oshilongo shi hume komeho. “Nonande ando ondi ye mOmutumba gwopashigwana ihe itandi futwa sha, otandi shi ningi nenyanyu oshoka Omutumba gwopashigwana ogwo ompito hayi eta omalunduluko,” okwa ti.

Kakele komalalakano ge gopapolitika, Shitana okwa tamekele eithano lye lyuuhikingalo mo2006 nokwa pititha ooalbuma 10 sigo okonena, ooalbuma ontimulongo nayimwe okwi ipyakidhila nayo ngashingeyi.

Okwa hokolola a li ha longo ongomugameni gwomaluko nelalakano lyokumona oshimaliwa opo a pitithe uungalo we, okwa holola omaudhigu e enda mugo opo e ye ponkatu e li moshimpungu shomusika. “Okukala nda tseyika ongomuhikangalo, otandi ka kambadhala okweeta puuyelele omaudhigu aahikingalo naaniitalenti yalwe ya taalela notandi ke shi eta oongoonkundathana dha pumbwa okukundathanwa mOmutumba gwopashigwana,” okwa ti.