Mbangu okwa ti aakulupe taa pulwa iifendela kopenzela ‘kashi li pauyuuki nande’

Kamunsela gwoshikandjohogololo shaRundu yokOmikunda Paulus Mbangu oshiwike shika okwa kondema okupulwa kwaakulupe ya gandje iifendela kutya "kashi li pauyuuki nande," ta nyenyeta kutya kashi li mondjila kAanambia mboka ya kala nokugandja iifendela sho ya li taa longo ya gwedhelwe ko ishewe iifendela iikwawo sho ya penzelwa.

"Inatu hepeka aakuluntu yetu; oya longo sha gwana nokuhumitha komeho oshilongo shetu, nongashingeyi ethimbo lyokutyapula openzela yawo itaa pulwa iifendela yokongulu," okwa ti, okwi indile wo uuministeli wiimaliwa wu tale oshinima shika neulomo.

Okwa ti omanga ongamba yokwaa gandja iifendela yokongulu ya gwedhelwa nosho onkatu ombwanawa, “Kashi li pauyuuki kaantu mboka ya kala nokugandja iifendela yokongulu sho ya li haa longo ihe natango oya tsikila nokugandja iifendela konima yokuya moshipundi shevululuko. Ndika ehepeko lyaakulupe, notatu indile uuministeli wu opaleke epuko ndika.”

"Aakulupe yetu oyendji otaa mono iihuna, notwa hala uuministeli wu ninge po sha. Otwa tegamena, momutumba omukwawo nenge montontwaveta ya landula ko, iipambele yaakulupe naamboka ya za miilonga otayi ka talika,” okwi indile.

Mbangu okwa popi ndhika mOmaandaha pethimbo lyoompata mEgumbo Etiyali lyopashigwana, moka aatotiveta ya li taa kundathana omalunduluko mOveta yIifendela yomo1981 (Income Tax Act of 1981), ndyoka tayi lalakanene okugwedhela ongamba yokwaagandja iifendela kiiketha yoopenzela dhaaniilonga.

Omanga omalunduluko taga popilwa kiilyo yimwe, Mbangu okwa nyenyeta kutya "kashi li mondjila oshimaliwa shopenzela shi kale tashi nanwa iifendela olundji."

Okwa gwedha po: "Pamaiuvo gandje, uuministeli owe tu suwakitha.”



Iikumungu yIifendela yoongeshefa oonshona

Mbangu okwa dhenge omuthindo kutya ontontwaveta oya ndopa okutala koompumbwe dhaanangeshefa aashona noyopokati.

"Kashi li pauyuuki omuntu ha kulula (barbershop) nenge e na okangeshefa okashona a tegelelwe a udhithe ofooloma kombinga iiyemo ye. Uuministeli ando inau tegelela oongeshefa adhihe oonshona dhi gandje iifendela, ngaashi naanaa ya gwedhele ongamba yiiyemo okuya N$100 000. Andola, oongeshefa dhi na iiyemo yi li meni lyomiliona yimwe komumvo inadhi gandja iifendela," okwa ti.

Mbangu okwa gandja uusama komulandu gwongashingeyi gwiifendela, ta ti inagu yela noihagu longo sha faathana.

"Uuna wa pula aanambelewa muuministeli wiimaliwa, otashi vulika ya tye ohaa longitha omulandu gwIifendela yomumwe (hybrid tax system), ngoka gwa kwatela mo iifendela yomeni lyoshilongo (source-based) niifendela ya za palwe (residence-based taxation). Kakele, etulo miilonga lyomulandu nguka inali faathana," okwa ti.

Okwa holola wo omausama ge li momulandu nomauvathanotsokumwe gaNamibia kombinga yiifendela yopaali niilonga ngaashi South Afrika, United Kingdom naSweden.

"Omatsokumwe ngaka oga nuninwa okukutha po okunanwa iifendela lwaali, ashike etulo miilonga lyawo kali li nawa natango. Omanga aaniiyemo iishona taa gandja iifendela, aanangeshefa ihaa gandja iifendela otaye tu lile shaa li pauyuuki, shoka kaa shi li mondjila," okwa ti.



Etsomukumo ku gandjwe iifendela

Pokati mpoka, omutotimpango gwoLandless People's Movement Harald Kambrude, okwa gandja uusama komalunduluko ga thanekwa, ta ti omilandu dhiifendela nadhi kale muuwanawa waakwashigwana nokuya tsa omukumo ya gandje iifendela nokwiilongekidhila openzela.

"Naye ete po omadhiladhilo taga kwatha oshigwana notaga tsu omukumo aantu ya gandja iifendela, noya kale nomadhiladhilo gokupungula oshimaliwa nokwiilongekidhila okuya mopenzela. Aantu oya hala okulonga, ashike inaa hala okupenzelwa, oshoka iimaliwa ya pungula ohayi ninwa po kiifendela," Kambrunde a nyenyeta.

[email protected]