Mbangu a nyenyeta molwa ookamunsela inaya kwatelwa mo moonkundathana dhontengenekothaneko

Omutotimpango mEgumbo Etiyali lyoPashigwana Paulus Mbangu okwa nyenyetele Egumbo Etiyali lyoPashigwana sho lya ndopa okulongitha oonkondo dhalyo adhihe, unene mokuhokololitha minista yIimaliwa Ipumbu Shiimi molwa ontengenekothaneko yopashigwana.



Mbangu okwa nyenyetele Egumbo Etiyali lyoPashigwana sho inali pula minista a fatulule ontengenekothaneko ye nokwiindile ookamunsela ya kwatelwe mo moonkundathana dhontengenekothaneko.



Pethimbo ta popi momutumba pomathimbo ngaka, Mbangu okwa nyenyeta kutya etopolo lyongashingeyi lyiimaliwa hayi gandjwa komalelo gopaitopolwa inayi gwana ( iishona) okutsakanitha oompumbwe dhiikandjohogololo.



Okwa ti omwaka nguka otagu etwa sho oonkundathana dholela ihadhi ningwa nookamunsela pethimbo lyokuvuta po ontengenekothaneko.



“Ekotamppango olye shi yeleka: minista yIimaliwa na fatulule ontengenekothaneko kaatotimpango, mOmutumba gwoPashugwana nomEgumbo Etiyali lyoPashigwana. Ashike, minista oha fatulula owala ontengenekothaneko mOmutumba gwoPashigwana, nokwiidhimbika Egumbo Etiyali lyoPashigwan. Shika itashi idhidhimikilwa,” okwa ti.



“Omutumba nguka otagu vulu okwiithana shaangoka – owo uuthemba wetu wopakotampango. Ngele minista yiimaliwa okwa ndopa okuya moonkundathana natse, otu na oonkondo dhokupula aanambelewa ya longe nawa. Mupya munene, itatu longitha oonkondo ndhika nawa ,” okwa gwedha po.



Okwi indile Egumbo Etiyali lyoPashigwana li itule mo mokukwashikipaleka kutya oominista ohadhi fatulula oontengenekothaneko dhawo kaatotimpango ayehe , ngaashi shu uthwa kekotampango.



“Ethimbo olya thikan a tu longithe oonkondo dhetu. Egumbo ndika nali ethe po okukala omukuthimbinga itaa dhana onkandangala nokukala egumbo li na oonkondo tali kondjele uuwanawa waantu twa kalela po."





Omwaka omunene



Mbangu okwa hokolola neyemato kutya ookamunsela , mboka oyo ya kwata komeho mokukandula po omikundu dhoshigwana , oyo inaya kwatelwa mo moonkundathana dhontengenokothaneko. Shika, okwa ti, ohashi ya thigi ye na enwethe mo eshona kombinga yokutopolwa koshimaliwa, shoka hashi eta omwaka omunene miimaliwa yoompumbwe dha simana moshigwana ngaashi okutunga, eandjaganeko lyomeya nomayakulo gopankalathano.



“Iimaliwa mbyoka hayi pewa omalelo gopaitopolwa inayi gwana nande. Oominista olundji ohadhi tumu aantu kookamunsela opo ya mone ekwatho, ashike katu na oonzo dhokukandukitha po omaupyakadhi ngaka,” okwa ti.



Mbangu okwa holola euvonayi lye sho pwaa na okakomitiye kokuvuta po oontengenekothameko, hoka taka kwatha aanapolitika naambelewa opo ya ye moonkundathana manga ontengenekothaneko tayi longekidhwa.



“Etoto po lyokakomitiye kokuvuta po oontengekothaneko oka pumbiwa noonkondo. Otwa pumbwa okukundathaniwa natse opo tu kwashilipaleke iimaliwa oya topolwa nawa, noshigwana, mwa kwatelwa iilema, nayi hokolole omaudhigu gawo ,” okwa ti.





Okuhogololwa koshigwana



Mbangu okwa popi wo kombinga yuuwinayi womisholondo dhiilyo yoongundu dhopapolitika, shoka, a ti, inashi kundathanwa nawa.



“Aatotimpango ohaya yanda okukundathana kombinga yompumbwe yokukutha po omulandu gwomisholondo dhiilyo yoongundu dhopapolitika moNamibia. Aatotimpango oyendji kaye hole okukundathana kombinga yoshikumungu shika, ashike opo tu kwashilipaleke aahogololi kutya iilonga otayi longwa nawa, natu hulithe po omulandu gwomisholondo dhiilyo yoongundu dhopapolitika. Omulandu gwokuhogololwa kiilyo moongundu nagu pingenwe po kokuhogololwa koshigwana shoshene, sho ookamunsela ayehe taya ka toto oompango moparliamente. Shika otashi shi ningi oshipu okutala mboka taya longo nawa,” okwa fatulula.



Okwa ti oshidhigu ngashingeyi opo aahogololi ya hokololithe omuntu ngoka a ya moparliamente okupitila kokatekete kongundu, oshoka aatotimpango mboka ohaya longo owala muuwanawa woongundu dhawo.



"Ohaya landula owala omalombwelo gongundu yawo pwaa na eongaongo. Uuna ongundu ya ti, 'nuka', ohaya pula owala, 'sigo openi?' Peha lyokupula, 'omolwashike tandi nuka?' Egamo ndika kongundu ohali imbi okuhokololithwa kwomuntu ye mwene. Ngele otwa hala shili okuungaunga noshikumungu shika, natu pingene po omulandu gwokuhogololwa kiilyo yongundu nokuhogololwa koshigwana shoshene,” okwa ti.



[email protected]

#NamibiaDecides2024