Kwa tulwa miilonga ompangu ya nuninwa egameno lyoonakuninga iihakanwa

Uungomba owa kwathele mokutulitha miilonga lyompangulilo ya nuninwa aantu mboka taya ningi iihakanwa yomiyonena dhopaukashike kookantu.

Opoloyeka ndjoka oya manithwa meyambidhidho lyoGreen Enterprise Solutions pompangulilo yamangetrata moKatutura.

Pamukanda gwa gandjwa kehangano ndyoka okwa tulwa iikwaniipangitho opo oonakuninga iihakanwa yomiyonena dhoka ya vule okukala taya gandja omaumbangi gawo momudhingoloko gwa gamenwa.

Ominista yuuyuki, Yvonne Dausab oshowo Chief Justice Peter Shivute oya patulula pambelewa ompangulilo ndjoka.

Opoloyeka ndjoka oya tulwa miilonga onga oshitopolwa she yo moshipala omiyonena dhopaukashike kookantu, egameno lyoonakuninga iihakanwa opo ya vule okugandja omaumbangi gawo mompangu yaahena uumbanda.

Dausab okwa popi kutya nonando aakiintu unene oyo ya kala muupyakadhi mboka, aanona nayo otaya longitha woo ompangulilo ndjoka mokugandja uumbangi omolwa omamonitho giihuna taya ningiwa.

Shivute okwa popi kutya onkalo yomiyonena dhopaukashike kookantu oya londa pombanda noonkondo moshilongo na oya ninga omukundu gwopashigwana noomwenyo unene dhaakiintu naanona otadhi kana omolwa omiyonena dhoka.

Okwa popi kutya ompangulilo ndjoka otayi ka kala oshilongitho koonakuninga iihakanwa opo ya vule okugandja omaumbangi gawo.

Kehad Snydewel, omunambelewa omukomeho gwoGreen, okwa pandulaa uuministeli sho wa tokola okulongitha uungomba megandjo lyegameno koonakuninga iihakanwa yomiyonena dhopaukashike kookantu, opo ya vule okugandja uumbangi megameno.