Konyala oopelesenda 70% dhokabinete otadhi yi ‘komagumbo’

Iizemo yoshigongi shoSwapo shomehuliloshiwike sha li tashi hogolola iilyo yongundu mOmutumba gwoPashigwana, mbyoka ya tseyithwa mOmaandaha kwa toka, oyu ulike Okabinete otashi vulika ka ka kanithe oopelesenda 68% dhiilyo yako ngele Swapo okwa sindana natango momahogololo gomuNovemba.



Kakele, omwaalu nguka otagu vulu okushonopala, mompito moka Swapo a sindana, nayamwe yomomiinista dhongashingeyi oya hogololwa ongaahogololwa yahetatu yomupresidente yaa na uuthemba wokuhogolola mboka haa ulikwa pakotampango ya kale iilyo yOmutumba gwOpashigwana.



Omukalo omukwawo gokushonopeka omwaalu gwaamboka taya yi komagumbo ongele Swapo a sindana iititatu iyali nomawi ogendji ge vule piipundi 63 yongashingeyi mbyoka ongundu yi na moparliamende.



Oominista dhimwe mepangelo lyongashingeyi odha holola nale kutya otadhi ka thuwa po noinadhi ya momahogololo. Odho nee Calle Schlettwein (uunamapya), Albert Kawana (iikwameni), Doreen Sioka (uukashikekookantu), John Mutorwa (iilonga) nAgnes Tjongarero (omaudhano).



Iinyegandunge



Ashike ope na wo mboka inaye shi enditha nawa, naamboka iinyengandunge yi na okuningwa opo ya mone ompito yomoparliamende natango. Oyo nee Christine /Hoebes (ombelewa yomupresitende), Anna Nghipondoka (elongo), Yvonne Dausab (uuyuuki), Utoni Nujoma (Iilonga) naErastus Uutoni (Ependulopo lyiilando nomikunda), noshowo omukuluntuwiliki gOkakomisi kOmathaneko goPashigwana Obeth Kandjoze.



Minista yuundjolowele Dr Kalumbi Shangula ina ya mo momahogololo.



Oominista ndhoka dha li methigathano dhimwe inadhi shi enditha nawa dhi kale momusholondondo gwiilyo 96, noonkwawo odhi li konimanima momusholondondo noshidhigu dhi shune moparliamende – okutala keyambidhidho lyoSwapo lyopomathimbo mpaka lya nkundipala. Unenene ngele otaku longithwa iipundi 63 yongashingeyi ongoshiyelekitho.



Mboka ye li muudhigu omwa kwatelwa /Hoebes, Nghipondoka naNujoma, mboka ye li ponomola onti- 85, onti-119 nonti- 124.



Nomupresidente Nangolo Mbumba ta zi koshipundi konima omulanduli gwe a ganithilwa moshilonga, nomolwa eso lyanakusa presidente Hage Geingob muFebuluali, Okabinete oka tegelela konyala ka lunduluke lela muMaarsa 2025.





Onakuyiwa ya dhimeya



Onakuyiwa yaapevi minista wo oyendji inayi yela nawa, oshoka oye li kondje yongamba ya tulwa po yo63. Omwa kwatelwa nee Verna Sinimbo (iipindi), Veikko Nekundi (iilonga), Maureen Hinda-Mbuende (iimaliwa) naAnna Shiweda (uunamapya).



Onakuyiwa yaapevi minista Sylvia Makgone (oohi), Natalia |Goagoses (elongo lyopombanda), Hafeni Ndemula (iilonga) naKornelia Shilunga (oomina) nayo inayi yela nawa.



Mokati kaaulikwa yahetatu ya hogololelwe kuGeingob ya ye moparliamende moshikako she oshitiyali shokulela okuza muMaarsa 2020, Ipumbu Shiimi (omutihamano momusholondondo ), Emma Theofelus (omutimugoyi) naEmma Kantema-Gaomas (ponomola onti-21) oye na ompito yokushuna moparliamende ngele Swapo okwa kala nomwaalu gwiipundi e na ngashingeyi.



Aaulikwa yalwe yaGeingob pethimbo ndiya oya li Dausab, |Goagoses, Shangula, Nekundi naPeter Vilho. Vilho okwa tidhwa miilonga mo2021, omanga Nekundi oku li ponomola onti-74 momusholondondo gwa pitithwa ohela.





Ookamana kandongo



Omupevi minista gwomauyelele Modestus Amutse oye gwotango momusholondondo gwaalumentu e na omawi 171, omanga mayola omukulu gwaLiindili Hilaria Mukapuli oye puutango momusholondondo gwaakiintu e na omawi 179 – nogo omawi ogendji ge niwe kuhandimwe moshigongi shika.



Omupevi presitende gwoSwapo Netumbo Nandi-Ndaitwah, ngoka a ningi omupresidente gwongundu konima yeso lyaGeingob, okwa ulike aantu 10 noya gwedhwa momusholondondo gwoparliamende– ngaashi paumatho gekotampango lyongundu. Okwa uvitha edhiminathapo sho a gwedha mo momusholondondo omukondjithi gwe mokongresa yo2022 Saara Kuugongelwa-Amadhila.



Omuleli gwewawa lyaagundjuka moSwapo (SPYL) Ephraim Nekongo naye omo e li momusholondondo gwaaulikwa, ngaashi wo ominista onkulu yomavi Alpheus !Naruseb, ngoka a li ta finyafinywa kOkakomisi kokukondjitha uulingilingi (ACC) mekwatathano nankene omwanamati gwanakusa Katrina Hanse-Himarwa a pewa ofaalama yomatulululo mOshitopolwa shaHardap. Inashi yela natango ngele ota konakonwa koACC shi na moshikumungu shika.



Momushondondo omu na wo omupeha amushanga omukuluntu muuministeli wuunamapya Dr Elijah Ngurare, noshowo omunangeshefa nomunawino miikwambaanga Dino Ballotti. Amushangandjai gwEhangano lyAailongi (Nanso) Fenny Tutjavi (22) omo e li momusholondondo, noshowo amushanga omukuluntu muuministeli waagundjuka Erastus Haitengela. Nokomushondondo okwa gowa ku Indileni Daniel, Ruth Maseke naLinda Mbwale.