Elelo lyaNgwediva lya londodha aakalimo yaa ekelehi iiyagaya shaampoka

Elelo lyondoolopa yaNgwediva olya holola omaipulo galyo kombinga yonkalo yokweekelahi iiyagaya shaampoka kwa vuka nayi, notali indile aakalimo yomondoolopa ya hulithe po omukalo nguka meendelelo.



Omupopiliko gwelelo Ottilie Shingenge oti indile Aangwediva ya longithe omandoloma giiyagaya ga tulwa po kumuni peha lyokweekelahi iiyagaya shaampoka.



Omahala ga tothwa mo

Shingenge okwa tumbula omapandaanda kondandalunde nomahala ngoka ga gumwa nayi konkalo ndjika yokweekelahi iiyagaya shaampoka, ogo nee: Ongwe, Buffalo, Lion, Kudu, nomapaandaanda lyaElikam Namundjebo nolyaKaxumba Kandola, noshowo kuuninginino wolukanda lwoExtension 14.



Oshikwawo, Namibian Sun okwa totha mo omahala mpoka hapu ekelwahi iiyagaya shaa li paveta notayi monika pooha nepandaanda lyOmatando moHannover, Ongwediva.



“Ongaakalimo yomondoolopa, ohamu futile omandoloma giiyagaya. Onkene, omukalo nguka gwongashingeyi kagu li owala gwaa li paveta ashike otagu kakeke efano ewanawa lyondoolopa yetu,” Shingenge a ti, okwa dhenge wo omuthindo kutya elelo oli li ompinge lela niilonga yoludhi ndoka.



Omandoloma giiyagaya opo ge li

Aakalimo mboka kaa ye na omandoloma giiyagaya golela otaya tsuwa omukumo ye ke ga lande koombelewa dhamuni kondando yodoola N$295 mendoloma limwe nenge ye ga lande moostola.



Ondoolopa oyi itula mo mokukaleka po okuyela kwawo notayi indile oshigwana shi dhane onkandangala yasho mokukwashilepaleka ondoolopa inayi kwatwa ko kokweelahi iiyagaya shaampoka.