Elcin a mutika kombinga yetidho lyaasita

Omuhogololwabisofi gwElcin koshikandjongerki shokuuninginino, Gideon Niitenge, okwa tindi okufatulula kutya omolwashike elelongerki lya kutha aasita yahamano moshilongayakulo konima sho ya mono iilongo moshikondo shoondholongo nezulonkalo.



Oshikundaneki shoNamibian Sun osha nongele kutya ontokolwa oya pitithwa mumvogu muApilili tayi tseyitha kutya aasita mbaka inaya landula omilandu dhokukonga iilonga, noya taaguluka ekotompango nomauthompango gaElcin.



Okatendo 45.1 nokatendo 40.5 mekotampango nomauthompango gaElcin otau ti aasita naya kuthwe oshinakugwanithwa shawo shuusitagongalo, oshoka oya taaguluka okatendo 77 kekotampango lyongeleka hoka taka popi kombinga yomaihumbato gaasitagongalo, ishewe ota ka ndjandjukununa nkene shi na okweendwa ngele omunashilonga a hala oku ka longela kiimpungulonga yilwe.



Mokatendo 77 kekotampango nomauthompango gaElcin, aanashilonga mongeleka oya pewa uuthemba wokukonga iilonga uuna ndoka omusita a tseyithila elelongerka neindilo lye lya ziminwa. Kakele, omukuluntu gwegongalo gumwe okwa fatulula kutya omusita ota ka longela kiimpungulonga yilwe shampa ashike elelongerka lye shi utha.



Maasita mboka ye li moshikumungu shika omwa kwatelwa nakusa Reverend Esron Heita Kapolo, ngoka a mana oondjenda oshiwike sha zi ko. Kapolo okwa li ha longele kondholongo kOkaiti.



Omusita gumwe okwa ti komufala ndjai gwoondholongo, Raphael Hamunyela, okwa nyolele Elcin te mu indile a tume omadhina gaasita ya ka yakule aanandholongo, ashike ongeleka inayi vula okutuma aasita, oshoka nayo kayi na aasita taya gwanene momagongalo gawo.



Omukuluntu gwegongalo gumwe okwa fatulula wo kutya Elcin ke wete shi li mondjila aasita taya thigi po ongeleka ya ka longele kiimpingulonga yilwe nonande ongeleka oyo ye ya futila oskola yuuteolohi, opo ya yapulilwe uusitagongalo.



Omahupilo



Aasita yatano opamwe naKapolo, oya ka konga iilonga yilwe omolwa omahupilo ge li nawa.

Oshikulukulu andola, shampa aasita ya penzelwa, ohaya vulu okutsikila ye ye ya yakule ongeleka natango.



Omusita omuwiliki muElcin ngoka inaa hala okutumbulwa kedhina okwa ti oompango ndhika oonkulu naasita mbaka hayo yotango ya kuthwa moshilonga yakulo molwashoka ya longela iimpungulonga yilwe nonande inaya pewa epitikilo kongeleka.



“Naasita yalwe osho ya ningilwe ngaaka. Shampa ya yi inaya pewa epitikilo ohatu ya kutha moshilongayakulo. Ayehe yahamano inaya pewa uuthemba kongeleka. Omulandu otagu ti Elcin ne ya pe uuthemba mboka. Omuntu iho yambuka owala e to yi. Mboka haya ningi ngaaka, ihatu ya tala ko we yekongo lyetu,” Omusita a ti.



Omusita gumwe gwongeleka yoshiveva okwa ti oompango dhaElcin osho dha kala ngaaka noitadhi ka lunduluka.



“Oongeleka dhimwe odhi hole oveta nelandulathano ashike dhimwe wo ohadhi dhiginine peuvitho neyakulathano. Uupyakadhi woongeleka dhetu ihadhi mono oshimaliwa kehe komwedhi. Shampa wa penzelwa oto vulu okugalukila moshilongayakulo natango. Inatu hala okupa ombedhi ongeleka ashike kombinga onkwawo aasita itaya vulu okukala moluhepo,” omusita a ti.



Amushanga ndjai gwElcin John Haufiku okwa ti omapulo agehe gaNamibian Sun nega ukithe ku Niitenge. Niitenge moonkundathana dhopangodhi paufupi mOlyomakaya, okwa ti kutya oshikundaneki nashi ninge oshilage nombelewa ye.



Okwa ti Elcin ngaashi owala omahangano galwe agehe naye oku na oompango nomalandulathano ngoka ge na okulandulwa.

“Egumbo kehe nombako. Ongeleka oyo onenenenene noyi na oompango omauthompango ngoka tage yi wilike,” Niitenge okwa ti.



Okwa pula wo kutya omolwashike oshifokundaneki shoNamibian Sun sha hokwa ehokololo ndika nokunyanyangidhwa kwehokololo ndika otaku kwatha ngiini oshigwana.



“Tu lombweleni kutya elalakano olya shike lyokuuva ehokololo ndika. Okunyanyangidha ehokololo otaku kwatha shike? Oli na oshilonga shini? Niitenge okwa pula. Okwa uvaneke kutya otaka ya moonkundathana noshifokundaneki shika, opo a fatululile oshigwana omatokolo gongeleka moshinima shika. - [email protected]