Ekonakona lya yakwa kOshikango lye etela aalongwa

Ongundu yaalongwa 26 oya kwatelwa mo molugodhi lwopaveta lwoskola nuuministeli molwa uulingilingili.

Aalongwa poskola Savo Nuts Private School mOshikango mOshitopolwa shaHangwena oya nyola ekonakono lyawo lyondondo 11 mumvogu, ihe oya kala nokutegelela iizemo yawo ayihe konyala oomwedhi ne. Sigo oompaka, oya mona po owala yimwe niikwawo ya kalekwa noya nyolwa nondanda Q kutya ‘inayi pwa’.

Shika osha landula uulingilingili tau popilwa oskola, mboka we eta olugodhi lwopaveta nuuministeli. Kakele , aanambelewa yuuministeli noyoskola oya mwena kombinga yoshikumungu shika.

“Oskola inayi tu pa uuyelele kutya aalongwa otaa ningwa ngiini. Otwa lombwelwa ku Isak Hamatwi, omukuluntuwiliki gwelongo mOhangwena, tu pule omayamakulo ga pewa oskola kuuministeli welongo, ihe oye tu lombwele oshiholekwa .” Ndahafa Nauyoma, omuvali gwa kamwe komuunona, okwa ti oyana otaa kanakana momagumbo yaa na etegameno, ya tegelela owala oshizemo shoontamanana, omanga yakwawo ya ya komeho kondondo 12.

Inashi yela

Omanga aavali ya lombwela uulingilingi owo etindi, inaa mona we uuyelele wa gwedhwa po.

Shi ikolela ku Nauyoma, okutalela po Hamatwi okwa holola oskola oya yakula owala oombilive okuza kuuministeli lwiikando iyali ya yooloka, muJanuali nApilili – miikando ayihe iyali uuyelele inau thika kuyo.

Moshigongi shomasiku ngaka, aavali inaa mona uuyelele washa wa pamba onakuyiwa yoyana.

“Otwa li tu shi oye tu ithana ye tu lombwele oshikalimo shoodokumente. Oya ti owala uulingilingi, ihe inaa holola owoludhi luni,” okwa ti.

Amushanga omukuluntu Sanet Steenkamp okwa tindi okutya ko sha.

“Otu uvite ko kutya aavali inaa nyanyukwa no inaa hala okutaamba ko oshizemo shi li ngaashi shi li. Ite vulu okutya ko sha koshipotha oshoka oshi li momake gooahende. Otatu vulu owala okugandja olopota yi ihwa po ngele oshikumungu shika sha adha pehulilo,” okwa ti.

Ya pulwa ya fute hahende

Kakele kokwaa tseya shoka tashi inyenge, aavali oya ti oskola oye ya pula ya fute hahende.

“Neyemato, oskola oyi indile N$2 000 komuvali kehe yi fute ahende omupe moshipotha – a landula ahende omukulu ngoka ya futu N$171 000,” Nauyoma a ti.

Okwa gwedha po kutya oskola oyi indile aalongwa yawo ya ye koskola nokushaina omaindilo getalululo kuuministeli li kwathele moshipotha. Shi ikolela kuye, oskola oya ti oshikalimo shoombilive oshaalongwa owala, haavali yawo.

Sho Savo Nuts a pulwa omolwashike a tindi okugandja omayamukulo, omukuluntuwiliki goskola Shingirai Mbuzi okwa ti oya tila aavali otaa ka andjaganeka uuyelele komalungula. “Shika otashi nyateke edhina lyoskola nolyuuministeli welongo wo,” okwa hokolola.

Pokati mpoka, aapopepi oya holola aalongwa yaali moshikumungu shika oya kambadhala okwiikutha omwenyo.

Nauyoma okwa koleke unene woshikumungu, ta ti osha dhigupalela aalongwa naavali.

“Otu li muudhigu. Uunona wetu owu na oshizimbi( wa ziyalala). Otwe wu fala kaahungimwenyo wu hungwe omwenyo oshoka owa haluka noonkondo. Ngashingeyi kaye shi wo kutya onkalamwenyo oyu uka peni.”