Ehuliloshiwike lyomaikuthomwenyo

Omwiilongo moshiputudhilo shaUnam gwomimvo 20 okwa si moshiponga sheimangeleko mEtitano, nehuliloshiwike olya tameke ngaaka nomaso ogendji gombaadhilila.

Olutu lwaKondyeni Abraham olwa adhika lwe endjelela mondunda ye momuhandjo gwaUnam mOvenduka( main campus).

Shi ikolela kopolisi, Abraham – ngoka a li omwiilongi gwiikwakompiuta – ina shanga ekonakono mEtitatu nEtine, noshe eta aanaskola pamwe naye ya limbililwe noye mu konge. Nakusa ina thiga uumbangi washa meimangeleko ndika.

Omwiilongi omukwawo, Oscar Kaziwapo Iipinge (23), okwa si moshiponga sheimangeleko mEtitano pondje yaMalinda.

Olutu lwe olwa adhika lwe endjelela momuti komweendanandjiila, ngoka a nothele ko opolisi.

Shi ikolela kopolisi, okwa li omulongwapangi momvula ya hugunina koWelwitchia University, ngoka a galukile kegumbo mEtitatu okuza kOvenduka nokulombwela kuume ke kutya ota lefe a shune esiku ndyoka. Nakusa ina thiga uumbangi washa meimangeleko ndika

Oshiponga shohauto she eta eikuthomwenyo

Natango mEtitano, omunamimvo 23 Tomas Nantinda okwa si moshiponga sheimangeleko sho a nyengwa okupangela osheenditho shomuniilonga pamwe naye shoka a li ta hingi.

Olutu lwe olwa adhika lwe endjelela kendhindhiliko lyomoondjila konima sho taku hokololwa a nyengwa okupangela osheenditho shomuniilonga pamwe naye mondjila yokuza koRosh Pinah okuya kOlange.

Shi ikolela kOpolisi yaNamibia, okwa nyengwa okupangela osheenditho nosha galangata. Konima yoshiponga, okwe ende ko oshinano konyala shoometa 800 manga inaa ikutha omwenyo.

Omahepekathano ga fala meso

Mofaalama Rooi Krans moshitopolwa//Karas, Tangeni Elias (28) okwa si moshiponga sheimangeleko konima yokudhenga omukadhona gwe nokanona kawo.

Olutu lwe olwa adhika lwe endjelela momuti popepi negumbo lyawo mOlyomakaya. Opolisi oya ti Elias okwa dhenge omukadhona gwe nokwa kambadhala okuponda okanona kawo sigo omeso ashike aashiinda oya popile yina nokanona. Kape na uulingilingi washa wa dhimbululwa meso ndika.

Moshikandjohogololo Musese moshitopolwa shaKavango Uuninginino, Kafuna Matheus Namwira okwiidhipaga konima yokwaauvathana naakwanezimo.

Olutu lwe olwa adhika lwe endjelela momuti.

Pokati mpoka, moshiningwanima inaashi faathana, Michael Rooi (26) okwa si konima yokutya ku uvite nawa.

Oshininingwanima osha ningilwa moshikandjohogololo Berseba moKaras.

Shi ikolela kopolisi, osheetithi sheso opo tashi konakonwa oshoka okwa lika koshinima shaa shiwike nokwa li moombete kuyele omwedhi nguka.